DITEMANA TSA BAEBELE DI A TLHALOSIWA
Pesalema 37:4—“O Natefelwe ke MORENA”
“Jehofa o tla go tlisetsa boitumelo jo bogolo, e bile o tla go naya dilo tse o di eletsang.”—Pesalema 37:4, Baebele ya Thanolo ya Lefatshe le Lesha.
“O natefelwe ke MORENA, mme o tla go naya keletso ya dipelo tsa gago.”—Pesalema 37:4, Setswana Central Bible.
Se Pesalema 37:4 e se Kayang
Mopesalema o kgothaletsa batho ba ba obamelang Modimo gore ba itumelele botsala jo ba nang le jone le Modimo. Botlhe ba ba nang ditsala tsa ga Jehofaa Modimo, o tlile go tlhomamisa gore o ba direla dilo tsotlhe tse ba di eletsang.
“Jehofa o tla go tlisetsa boitumelo jo bogolo.” Mafoko ano a ka ranolwa jaana “itumelele go direla MORENA” kgotsa “itumelele se MORENA a go solofeditseng sone.” Ka mafoko a mangwe, re tla itumela fa re direla Jehofa. Goreng re rialo?
Ba ba obamelang Jehofa ba leba dilo jaaka a di leba, fela jaaka go tlhalositswe mo Baebeleng. Ga ba itse Modimo fela mme gape ba itse gore go botlhale go mo obamela. Seno se dira gore ba nne le segakolodi se se phepa le gore ba se ka ba dira ditshwetso tse di sa siamang. (Diane 3:5, 6) Ka sekai, fa ba bona batho ba ba pelotshetlha kgotsa ba ba sa ikanyegeng e kete ba atlega mo botshelong, seo ga se dire gore ba galefe kgotsa ba ba tswele pelo. (Pesalema 37:1, 7-9) Batho ba Modimo ba itumetse ka gonne ba itse gore mo nakong e e sa fediseng pelo, Jehofa o tlile go fedisa tshiamololo a bo a segofatsa batho ba ba ikanyegang mo go ene. (Pesalema 37:34) Gape ba itumedisiwa ke go itse gore Rraabone yo o kwa legodimong o a ba amogela.—Pesalema 5:12; Diane 27:11.
“O tla go naya dilo tse o di eletsang.” Mafoko ano a ka ranolwa jaana “o tla araba dithapelo tsa gago” kgotsa “o tla go naya se o se eletsang thata.” Gone Jehofa a ka se re neye sengwe le sengwe se re se kopang. Jaaka motsadi yo o siameng, Jehofa o a itse gore ke eng se re se tlhokang. Mo godimo ga moo, dilo tse re di kopang le tsela e re tshelang ka yone e tshwanetse go dumalana le thato ya gagwe le melaometheo ya gagwe. (Diane 28:9; Jakobe 4:3; 1 Johane 5:14) Fa e le gore re kopa dilo tse di dumalanang le melaometheo ya gagwe le tse di tsamaisanang le thato ya gagwe, re ka tlhomamisega gore “Moutlwi wa dithapelo” o tlile go re reetsa.—Pesalema 65:2; Mathaio 21:22.
Se go Buiwang ka Sone mo go Pesalema 37:4
Pesalema 37 e ile ya kwalwa ke Kgosi Dafide wa kwa Iseraele. O ile a kwala pesalema eno a dirisa mokgwa o o bidiwang acrosticb kgotsa mokgwa wa go kgaoganya ditemana go ya ka tatelano ya ditlhaka.
Dafide o ne a sa tshwarwe sentle. O ne a tsomiwa ke Kgosi Saulo le ba bangwe ba ba neng ba batla go mmolaya. (2 Samuele 22:1) Le fa go ntse jalo, Dafide o ne a tshepa Modimo. Dafide o ne a itse gore Jehofa o tlile go otlhaya batho ba ba bosula. (Pesalema 37:10, 11) Le fa ba ka lebega ba atlega jaaka “bojang jo bosha jo botala,” ba tlile go fedisiwa.—Pesalema 37:2, 20, 35, 36.
Pesalema 37 e bapisa se se tla diragalelang batho ba ba ikobelang melao ya Modimo le batho ba ba sa ikobeleng molao wa gagwe. (Pesalema 37:16, 17, 21, 22, 27, 28) Pesalema e re thusa gore re nne botlhale le gore re nne batho ba Modimo a ba amogelang.
Leba bidio eno e e khutswafaditsweng gore o bone se se mo bukeng ya Dipesalema.
a Jehofa ke leina la Modimo le le ranotsweng go tswa mo ditlhakeng tse nnê tsa Sehebera. Go bona gore ke eng fa dithanolo tse dingwe tsa Baebele di dirisa sereto “Morena” go na le go dirisa leina la Modimo, bala setlhogo se se reng, “Who Is Jehovah?”
b Temana kgotsa ditemana di simolola ka tlhaka ya ntlha ya Sehebera mme temana kgotsa ditemana tse di latelang di simolola ka tlhaka ya bobedi ya Sehebera, jalo le jalo. Mokgwa ono wa go kwala o ne o thusa gore batho ba kgone go gopola dintlha motlhofo.