Ke Eng Se Se Diragetseng ka Di-Dinosaur?

“PALAEONTOLOGY ke thuto ya go ithuta difosile, mme difosile ke masaledi a ditshedi tsa dingwaga tsa bogologolo tse di fetileng.” Mme jaaka fa rrasaense mongwe yo o ithutang masaledi a dilo tsa bogologolo a ne a bolela, ke “saense e e phopholetsang dilo fela thata le ya botlhogo e thata.” Seno se bonala mo kgannyeng ya di-dinosaur. Fa rrasaense wa kwa Princeton ebong G. L. Jepson a ne a thathamisa dingwe tsa dilo tse di phopholediwang malebana le gore ke eng seo se diragetseng ka tsone, o ne a bolela jaana:

“Bakwadi ba ba nang le bokgoni jo bo sa tshwaneng ba ile ba ntsha kakanyo ya gore di-dinosaur di ile tsa nyelela ka gonne tlilimate e ne e senyegile . . . kana ka gonne go ne go senyegile dijo tsa tsone. . . . Bakwadi ba bangwe ba ile ba re seo se bakilwe ke bolwetsi, diparasite, . . . go fetoga ga kgatelelo mo lefaufaung kana go fetoga ga dilo tseo di leng mo go lone, digase tse di botlhole, lerole la sekgwa-molelo, oxygen e ntsi go feta tekano e e tswang mo dimeleng, didumedi, dikhomete, go fela ga mae a tsone a fediwa ke diamusi tse dinnyane tseo di jang mae, . . . marang a lobopo, go suta ga dintlha tse Lefatshe le dikologang mo go tsone, merwalela, go tsamaya ka bonya ga dikontinente, . . . go tšha ga mafelo a a loraga le ga ditikologo tse di nang le matsha, go fifala ga dikarolo dingwe tsa letsatsi.”—The Riddle of the Dinosaur.

Go bonala go tswa mo diphopholetsong tseo gore borrasaense ga ba kgone go araba potso eno ka tlhomamo ka gope: Go diragetseng ka di-dinosaur tseo?

Kgopolo ya Gore Di Nyeleditswe ka Ponyo ya Leitlho

Kgopolo nngwe ya malobanyana fela jaana e ile ya tlhagisiwa ke setlhopha sengwe se se bopilweng ke ngwana le rragwe, ebong Luis le Walter Alvarez. Walter Alvarez o ne a bona, ka kwa ntle ga toropo ya Gubbio e e mo bogareng jwa Italy, boalo bongwe jwa mmu wa taka jo bo sa tlwaelegang, jo bosesane, jo bohibidu bo le fa gare ga maalo a le mabedi a leje la kalaka mo go ikadileng letlapa gone. Boalo jo bo kwa tlase jwa letlapa la kalaka bo ne bo tlhagisa masaledi a dilo tsa bogologolo a le mantsi thata. Boalo jo bo fa godimo jone bo ne bo batla bo sena masaledi a dilo tsa bogologolo gotlhelele, mme seo sa dira gore borrajioloji ba swetse ka gore botshelo bo ile jwa nyelela ka ponyo ya leitlho mme le gore boalo jo bosesane, jo bohibidu joo jwa mmu wa taka bo ne bo amana ka tsela nngwe le go nyelela goo.

Fa seno se tlhatlhobiwa go ne ga lemogiwa gore mmu ono wa taka o ne o na le iridium (eleng metale) e ntsi thata, e feta eo gantsi e fitlhelwang mo matlapeng makgetlo a le 30. Ba ne ba itse gore selekanyo se se kalo se se kwa godimo sa selo seno se se bonwang ka sewelo se ne se ka nna gone fela se tswa mo gare ga khubu ya lefatshe kana mo dilong tse dingwe tse di ka kwa ntle ga lefatshe. Ba ne ba fitlha mo tshwetsong ya gore iridium e ne ya tlogelwa foo ke selo sengwe se se boitshegang se se tshwanang le naledi seo se ileng sa itaya lefatshe, se baka gore di-dinosaur di nyelele ka ponyo ya leitlho jalo.

Morago ga go senwa go bonwa mmu oo wa taka o o nang le iridium e ntsi kwa Gubbio, go ne ga bonwa masaledi a a ntseng jalo le mo dikarolong tse dingwe tsa lefatshe. A seno se ne se tshegetsa tumelo e e malebana le gore go ile ga nna le selo sengwe se se boitshegang se se tshwanang le naledi? Baitseanape bangwe ba santse ba na le dipelaelo ka seno. Mme jaaka fa buka ya The Riddle of the Dinosaur e dumalana, kgopolo ya ga Alvarez e ne ya tsenya “tlhabega e ntšha mo thutong ya gore di ile tsa nyelediwa le ya gore dilo di itlhageletse.” Mme rrasaense mongwe yo o ithutang masaledi a dilo tsa bogologolo ebong Stephen Jay Gould o dumalana gore seno se ne se ka dira kgopolo ya gore “go kgaratlha magareng ga ditshedi” e seka ya nna botlhokwa.

Fa mokwadi mongwe wa saense a akgela malebana le kgopolo eno e ntšha le go nyelela go go bonalang go diragetse ka ponyo ya leitlho ga di-dinosaur, o dumalana jaana: “Di ne di ka reketlisa metheo ya thutatshelo ya gore dilo di itlhageletse mme tsa dira gore kgopolo ya ga jaanong ya go itlhophelwa goo go dirwang ke tlholego go belaelwe.”

Rrasaense wa Yunibesithi ya Arizona ebong David Jablonski o konela ka gore ‘mo dimeleng di le dintsi le mo diphologolong di le dintsi, go nyelela gono go ile ga diragala ka ponyo ya leitlho ebile go kgethegile ka tsela e e rileng. Fa dilo di nyelela ka bontsi seo e ka seka ya nna diphelelo tsa fa di ne di swa ka iketlo fela. Go na le sengwe se se sa tlwaelegang seo se ileng sa diragala.’ Go ntse jalo le ka di-dinosaur. Go tlhaga ga tsone ga ka ponyo ya leitlho le go nyelela ga tsone ga ka ponyo ya leitlho go ganetsa kgopolo eo e dumelwang ke bontsi ya gore dilo di ile tsa itlhagelela ka bonya mo go tse dingwe.

Go Bala Dingwaga tsa Di-Dinosaur

Marapo a di-dinosaur a bonwa ka metlha mo maalong a lefatshe a a kwa tlase ga a marapo a batho a bonwang mo go one, eleng seo se dirang gore ba le bantsi ba swetse ka gore di nnile gone mo lobakeng lwa pele ga batho. Borrajioloji ba bitsa motlha ono ba re ke lobaka lwa Mesozoic ba bo ba lo kgaoganya ka dikarolwana gore e nne lobaka lwa Cretaceous, Jurassic, le lwa Triassic. Ditlhopha tse dinako tseo di dirisitsweng mo mabakeng ano di rulagantswe go ya ka ditlhopha tsa dingwaga di le dimilione di le masomesome. A mme seno se ile sa bontshiwa gore se boammaaruri ka tsela epe e e tlhomameng?

Mokgwa o mongwe o o dirisediwang go bona gore masaledi a dilo tsa bogologolo a na le dingwaga di le kae ka bogolo o bidiwa mokgwa wa go bala dingwaga tsa dilo wa radiocarbon. Mokgwa ono wa go bona gore dilo di bogolo bo kae ka dingwaga o lekanya selekanyo seo go bola ga radioactive carbon go diragalang ka sone go simolola ka nako eo setshedi se swang ka yone. “Fela fa setshedi se sena go swa, ga se tlhole se iphepa ka carbon dioxide e ntšha ka gope go tswa mo tikologong ya sone, mme selekanyo sa diatomo se nna se fokotsega fa nako e ntse e tsamaya fa di ntse di bola ka tsela ya radioactive [carbon],” go bolela jalo Science and Technology Illustrated.

Lefa go ntse jalo, go na le mathata a a masisi mo mokgweng ono. Jwa ntlha, fa go tsewa gore selo sengwe se eleng masaledi a dilo tsa bogologolo se na le dingwaga di ka nna 50 000, go bola ga sone go a bo go wetse tlase mo eleng gore go ka lemogwa ka bothata jo bo seng kana ka sepe. Jwa bobedi, le eleng mo dikaong tsa bosheng jaana, selekanyo seno se a bo se wetse tlase mo eleng gore go santse go le thata tota go ka se lekanya ka tsela e e leng boammaaruri. Jwa boraro, borrasaense ba kgona go lekanya selekanyo sa motlha wa segompieno seo radioactive carbon e diragalang ka sone mme ga ba na tsela epe eo ba ka lekanyang selekanyo sa carbon ya mo nakong ya bogologolo ka sone.

Jalo go sa kgathalesege gore a ba dirisa mokgwa wa go bala dingwaga tsa masaledi a dilo tsa bogologolo wa radiocarbon kana ba dirisa mekgwa e mengwe, e e ntseng jaaka go dirisa radioactive potassium, uranium, kana thorium, go bala dingwaga tsa matlapa, borrasaense ga ba kgone go tlhomamisa gore go ne go na le dilekanyo tse di kana kang tsa dilo tseno pele mo dingwageng tse di fetileng. Ka gone, moporofesara wa saense e e malebana le dimetale ebong Melvin A. Cook o akgela jaana: “Motho a ka kgona go phopholetsa selekanyo [sa dilo tseno tse di kgonang go ntsha marang a maikatlapelo], mme dingwaga tse o di bonang morago ga o sena go dira jalo di nna e ntse e le go phopholetsa fela.” Seo se ne se ka nna jalo segolo-bogolo fa re akanya ka ntlha ya gore Morwalela wa motlha wa ga Noa wa mo dingwageng tse 4 300 tse di fetileng o ile wa tlisa diphetogo tse di seng kana ka sepe mo lefaufaung mmogo le mo lefatsheng.

Borrajioloji ba Koletšhe ya Dartmouth ebong Charles Officer le Charles Drake ba bolela se sengwe gape seo se dirang gore go belaelwe boammaaruri jwa go bala dingwaga tsa dilo ka go dirisa dilo tseo di kgonang go ntsha marang a maikatlapelo. Ba bolela jaana: “Re konela ka go re iridium mmogo le dilo tse dingwe tse di amanang le yone ga di a ka tsa nna gone mo di leng gone ka ponyo ya leitlho . . . mme go na le moo gore di ile tsa tshelegela ka bontsi mme di le ka dilekanyo tse di farologaneng mo lobakeng lo lokhutshwane thata lwa nako ya jioloji lwa selekanyo sa dingwaga di le 10 000 go ya go di le 100 000.” Ba bolela gore fa dikontinente di ne di kgaogana le ka nako eo di neng di suta ka yone seo se ne sa baka tlhakatlhakano mo lefatsheng lotlhe, se baka gore go nne le dikgwamolelo, go fifala ga lesedi la letsatsi le gore moya o nkge. Eleruri, ditiragalo tse di ntseng jalo tse di bakang tlhakatlhakano di ne di ka fetola dilekanyo tsa dilo tse di ntshang marang a maikatlapelo, ka gone di dira gore nako e e bontshiwang ke dilo tsa segompieno tse di ntshang marang a maikatlapelo tse di dirisediwang go bala dingwaga tsa dilo e seka ya nna boammaaruri.

Pego ya Genesise le Di-Dinosaur

Lemororo mokgwa wa go bala dingwaga tsa dilo ka go dirisa dilo tse di ntshang marang a maikatlapelo e le o mosha, o santse o theilwe mo go phopholetseng dilo le go akanya gore di boammaaruri. Go farologana le seo, pego ya Bibela e e mo kgaolong ya ntlha ya Genesise e bolela thulaganyo ya popo ka kakaretso motlhofo fela. E letla dingwaga tseo go ka diragalang gore e bo e nnile tse di dikete tse di dimilionemilione tseo lefatshe le ileng la bopega ka tsone le dingwaga di le dikete di le dintsi tsa mo metlheng e le merataro, kana “matsatsi,” eo go dirilweng popo ka yone go baakanngwa lefatshe gore batho ba age mo go lone.

Di-dinosaur dingwe (le di-pterosaur) eleruri di ka nna tsa tswa di ile tsa bopiwa mo motlheng wa botlhano oo o bontshiwang mo go Genesise, oo Bibela e bolelang gore Modimo o ne wa dira “dinōnyane” le “maruarua a magolo a lewatlè” ka one. Gongwe mefuta e mengwe ya di-dinosaur e ne ya bopiwa mo motlheng wa borataro. Metlhape ya di-dinosaur ka ntlha ya go ja bobe ga tsone e ne e tla bo e tshwanetse fa o akanya ka dimela di le dintsi tse go bonalang di ne di le gone ka nako eo ya tsone.—Genesise 1:20-24.

Fa di-dinosaur di ne di sena go diragatsa maikaelelo ao di neng di a bopetswe, Modimo o ne wa khutlisa botshelo jwa tsone. Mme Bibela ga e bue sepe malebana le ka moo a neng a dira seo ka gone kana gore o ne a se dira leng. Re ka tlhomamisega gore di-dinosaur di bopilwe ke Jehofa a di bopela boikaelelo jo bo rileng, le eleng fa re sa tlhaloganye sentle gore boikaelelo joo e ne e le bofe ga jaanong. Di ne di sa bopiwa ka phoso, di ne di sa nna teng ka ntlha ya go itlhagelela ga dilo. Lebaka la go bo di tlhaga ka ponyo ya leitlho go ya ka rekoto ya masaledi a dilo tsa bogologolo mme di sena batsadi bape bao di tswang mo go bone mo masaleding a dilo tsa bogologolo, mme gape di bo di nyelela di sa tlogele sepe mo masaleding a dilo tsa bogologolo seo di ileng tsa fetoga go nna sone, ke bosupi jo bo leng kgatlhanong le kgopolo ya gore diphologolo tsa go nna jalo di ile tsa itlhagelela ka bonya mo nakong ya dingwaga di le dimilionemilione. Ka gone, pego ya masaledi a dilo tsa bogologolo ga e tshegetse kgopolo ya gore dilo di itlhageletse. Mo boemong jwa seo, e utlwana le kgopolo ya Bibela ya ditiro tsa popo tsa Modimo.

[Mafoko a setshwantsho mo go tsebe 10]

Pego ya masaledi a dilo tsa bogologolo ya di-dinosaur ga e tshegetse thuto-tlhagelelo mme e tshegetsa popo