Go Bona Kitso Malebana le ‘Digagabi tse Dikgolo’ tsa mo Nakong E E Fetileng

FA O eme mo dintshing tsa mokgatsha wa Red Deer River, kafa borwa fela jwa toropo ya Drumheller kwa Alberta, Canada, o a bo o eme mo dintshing tsa mafatshe a mabedi a a sa tshwaneng. Go ya go fitlha mo matlho a leng gone, gongwe le gongwe kwa o lebang gone, go na le masimo a mabele ao go lebegang go sena kwa a felelang teng a lenagatlhaga la Alberta. Mme fa o leba go ela kwa tlase ga magaga o leba moteng ga mokgatsha oo o o omeletseng oo o senang dimela, baeti ba ka akanya ka lefatshe la mofuta o mongwe leo le farologaneng gotlhelele le la bone—eleng lefatshe la di-dinosaur.

Mo mokgatsheng ono, ka mengope ya one e e nang le mekong ya leje la seretse le le nang le mebalabala, go ile ga epololwa marapo a di-dinosaur a le makgolokgolo gone. Batho bangwe ba mo tulong eno ba bitsa lengope leno le le senang dimela ba re ke “lefatshe le le sa siamang.” Mme baeti, ba basha le ba ba godileng ka go tshwana, ba ja kgakge fa ba bona boswa jono jwa masaledi a dilo tsa bogologolo jwa diphologolo dingwe tseo eleng tse di gakgamatsang go gaisa dipe tse di kileng tsa nna gone mo lefatsheng.

Go Bona Kitso Malebana le Di-Dinosaur

Pele ga 1824, motho o ne a sa itse sepe kaga di-dinosaur. Mo go yone ngwaga eo go ne ga epololwa marapo a mefuta e e farologaneng ya digagabi kwa Engelane ao a neng a le mo masaleding a dilo tsa bogologolo. Rrasaense wa kwa Borithane yo o ithutang masaledi a dilo tsa bogologolo ebong Richard Owen o ne a bitsa diphologolo tseno a re ke Dinosauria, leo le tswang mo mafokong a mabedi a Segerika eleng deinos le sauros, ao a kayang “mokgantitswane o o maswe thata.” Leina leno le santse le dirisiwa thata le eleng go fitlha gompieno, lemororo di-dinosaur e le digagabi, ga se mekgantitswane.

Fa esale go tloga ka 1824, masaledi a dilo tsa bogologolo a di-dinosaur a ile a bonwa mo kontinenteng nngwe le nngwe. Pego ya masaledi a dilo tsa bogologolo, eleng ao a neng a setse mo lejeng la seretse, kana leo le dirilweng ke metsi, e bontsha gore go ne go na le di-dinosaur tsa palo e e seng kana ka sepe ebile e le tsa mefuta e e farologaneng ka nako nngwe mo historing ya lefatshe eo e neng e bidiwa Motlha wa di-Dinosaur. Tse dingwe di ne di nna mo lefatsheng, fa tse dingwe tsone di ne di nna mo go leng loraga gone. Tse dingwe gongwe ebile di ne di nna le eleng mo metsing, fela jaaka gontse jalo ka kubu ya motlha wa segompieno.

Masaledi a le mantsi a di-dinosaur—ao a kopanyeletsang bosupi jo bo senang letlhotlho jaaka metlhala ya tsone—a ile a epololwa kwa Great Central Plain ya Amerika Bokone. Lenagatlhaga la kwa bogare jwa Alberta le ile la tlhagisa masaledi a le mantsi a di-dinosaur, go kopanyeletsa le matlhotlho a ka nna 500 a a feletseng. Ka bo-1920, matsholo mangwe a ile a bona marapo a di-dinosaur kwa Setlhaketlhakeng sa Gobi sa kwa bogare jwa Asia. Ka bo-1940 letsholo la kwa Soviet kwa Mongolia le ile la bona letlhotlho la dinosaur leo le neng le le botelele jwa dimitara di ka nna 12.

Ka 1986 borrasaense ba kwa Argentina ba ne ba bona masaledi a dilo tsa bogologolo a dinosaur nngwe e e jang dimela kwa Antarctica. Go tla go fitlhela ka nako eo, Antarctica e ne e ntse e le yone fela tulo e e nang le lefatshe le legolo koo masaledi a di-dinosaur a neng a ise a bonwe gone. Pelenyana fela ga moo, mmatlisisi mongwe wa Moamerika o ne a bona marapo a di-dinosaur kwa North Slope ya kwa Alaska. Go ralala dingwaga di le lekgolo tse di fetileng, masaledi a marapo a di-dinosaur a ile a bonwa mo mafatsheng a le mantsi mo eleng gore go mo pepeneneng gore di-dinosaur di ne di bonwa gongwe le gongwe bogologolo tala.

Ke Nako Efe Eo Di Neng Di Tshela ka Yone?

Di-dinosaur di ne di na le seabe se segolo mo botshelong mo lefatsheng ka nako eo di neng di le gone ka yone. Mme lefa go ntse jalo ya re morago ga moo tsa nyelela. Maalo a maje ao a nang le masaledi a bogologolo a batho nako le nako a tlhaga a le mo godimo ga maalo ao a nang le masaledi a bogologolo a di-dinosaur. Ka ntlha ya seno, borrasaense ka kakaretso ba swetsa ka gore batho ba tlile mo lefatsheng morago ga tsone.

Malebana le seno buka ya Palaeontology, e e kwadilweng ke James Scott, e bolela jaana: “Le eleng mefuta ya bogologolo thata ya di-Homo sapien (eleng motho) e ile ya nna teng lobaka lo lotelele morago ga di-dinosaur di sena go nyelela . . . Morago ga go sekama (goo go nnang gone fa lefatshe le suta) go sena go diragala, maje a a nang le masaledi a bogologolo a batho a tlhaga nako le nako a le fa godimo ga ao a nang le marapo a bogologolo a digagabi tse dikgolo tsa di-dinosaur mme seno se bolela gore marapo ao a di-dinosaur ke a bogologolo go gaisa masaledi a batho.”

Kwa mokgatsheng wa Red Deer River, go na le boalo bongwe jwa leje la seretse joo bo nang le marapo a di-dinosaur mo go jone. Fela fa godimo ga boalo jono, go na le boalo bongwe jwa mmala o o borokwa jo bo elang kwa bobududung jo bo mokgona joo bo iphaphathang le losi lwa mohapha wa thaba. Mo godimo ga boalo jono jwa mmala o o borokwa jo bo elang kwa bobududung jo bo mokgona go na le boalo bongwe jo bo borokwanyana jwa leje la mmukgogodi jo bo nang le masaledi a bogologolo a dibatadikgagane tsa boboatsatsana, eleng seo se bontshang tlilimate e e mogote. Mo godimo ga jone, go na le maalo a le mmalwa a magala. Fa o ntse o tlhatlogela kwa godimo le mohapha wa thaba go na le maalo a lefatshe a a nang le lekgwaripane. Ga go na marapo ape a di-dinosaur mo go ape a maalo ano a a kwa godingwana.

Buka ya A Vanished World: The Dinosaurs of Western Canada e bolela gore “mefuta yotlhe e le 11 e megolo ya di-dinosaur . . . e ile ya khutla go nna gone mo karolong ya bogare jwa bophirima mo e ka nnang ka nako e le nngwe.” Seno, le lebaka la go bo marapo a batho a ise a ko a bonwe a na le marapo a di-dinosaur, ke lebaka la go bo borrasaense ba le bantsi ba swetsa ka gore Motlha wa Di-Dinosaur o ile wa khutla pele ga batho ba nna gone.

Lefa go ntse jalo, go tshwanetswe ga lemogiwa gore go na le bangwe ba ba bolelang gore marapo a di-dinosaur le marapo a batho ga a fitlhelwe a le mmogo ka gonne di-dinosaur di ne di sa nne mo mafelong ao batho ba agileng mo go one. Dikgopolo tse di ntseng jalo tse di sa tshwaneng di bontsha gore pego ya masaledi a dilo tsa bogologolo ga e bipolole diphiri tsa yone motlhofo fela go le kalo le gore ga go na ope mo lefatsheng gompieno yo tota a itseng dikarabo tsotlhe.

Mekgwa ya Tsone

Borrasaense ba ile ba swetsa ka gore go kile ga bo go na le lewatle lengwe le legolo le le seng boteng go le kalo kwa botlhaba jwa North American Rocky Mountains. Lewatle leno le ne le le dikilometara di le makgolokgolo ka bophara, le tloga kwa go leng Lewatle la Arctic gompieno go fitlha kwa Mexico. Go iphaphatha le losi lwa lone lo lo ikadileng fa fatshe go ne go tletse dikgwa tsa mo go leng ditsobotla gone. Masaledi a dilo tsa bogologolo a dira gore go swediwe ka gore mefuta e le mentsi ya di-dinosaur e ne e kgona go tshela ka katlego mo tikologong ya go nna jaana. Edmontosaurus, eleng dinosaur e e nang le molomo o o tshwanang le wa pidipidi o o dimitara di le robongwe ka botelele, go bonala di ne di gobea ka metlhape jaaka dikgomo mo lefelong leno le le loraga. Metlhala ya mo di gatileng teng e e nang le menoto e le meraro e e bolokilweng sentle mmogo le moswang wa bogologolo o o neng o le mo mogodung wa tsone o o bolokilweng sentle o ile wa dira gore borrasaense ba ba ithutang masaledi a dilo tsa bogologolo ba dire tshwetso eno.

Bosupi jo bongwe bo bontsha gore di-dinosaur dingwe di ne di na le mekgwa e e tshwanang le ya batho. Go ka diragala gore di bo di ne di nna mmogo jaaka motlhape, gongwe di le ka ditlhopha tsa di le makgolokgolo kana go feta. Go bonwa ga maalo a a latelanang a ditlhaga mmogo le a mae di le mo lefelong le le lengwe go bontsha gore di-dinosaur dingwe di ne di boela mo lefelong le le lengwe leo di agelang mo go lone dingwaga ka go latelana ga tsone. Masaledi a matlhotlho a bana ba di-dinosaur a a leng gaufi le ditlhaga, go bolela jalo Scientific American, ‘a bontsha thata gore bana ba tsone ba ne ba tshela mmogo ebile a bontsha gape gore go ka diragala gore batsadi ba ne ba tlhokomela bana ba bone morago ga ba sena go thubiwa.’

Bosupi jwa masaledi a dilo tsa bogologolo ka gone bo bontsha gore go ne go na le dipalopalo tsa di-dinosaur ebile e le tsa mefuta e e farologaneng. Mme tota di ne di lebega ka tsela e e ntseng jang? A tsotlhe e ne e le ditshedi tse di boifisang, tse di boitshegang—eleng “mekgantitswane e e maswe thata”? Ke ka ntlhayang fa go lebega di ile tsa nyelela fela ka ponyo ya leitlho jaana?

[Motswedi wa Setshwantsho mo go tsebe 3]

Smithsonian Institution, Washington, D.C.: Photo Number 43 494