Fa Dirintlha Di ne Di Kaila mo Yuropa

KA MOKWADI WA TSOGANG! KWA ITALY

KA 1932 setlhopha sa badiri ba ditsela se ne se epa gaufi le Colosseum kwa Roma fa mongwe wa bone a ne a itaya sengwe se se thata. Go ne ga fitlhelwa gore selo seo e ne e le lonaka le logata lwa tlou. E ne e se la ntlha go ribololwa selo se se ntseng jalo. Go ralala dingwaga, masaledi a a omeletseng a ditlou tsa bogologolo a a ka nnang 140 a ne a fitlhelwa mo Roma le mo mafelong a a e dikologileng, lekgetlho la ntlha fa seno se direga e ne e le mo lekgolong la bo17 la dingwaga.

Batho ba ne ba akanya gore marapo ao e ne e le a ditlou tse di neng tsa tlisiwa mo Roma ya bogologolo kgotsa tse di neng tsa tlisiwa ke Mojenerale wa Mo-Carthage e bong Hannibal mo Italy. Moruti mongwe wa lekgolo la bo19 la dingwaga e bile e le porofesa ya Saense ya Tlholego kwa Viterbo e bong G. B. Pianciani, o ne a sa dumalane le dikgopolo tseo. Ka gonne gantsi marapo a ne a fitlhelwa mo matlakaleng a a gogotsweng ke metsi a a elelang, o ne a konela ka gore marapo ao e ne e le a diphologolo tse di neng tsa swela felo gongwe mme tsa gogolelwa kwa lefelong le lengwe ke metsi a morwalela.

Masaledi a mantsi a ditlou a a neng a fitlhelwa kwa Italy ga se a ditlou tse re nang le tsone gompieno. Go na le moo, ke a mofuta mongwe wa tlou o o bidiwang Elephas antiquus, kgotsa tlou ya bogologolo. (Bona tsebe 15.) Setshedi seno se ne se na le dinaka tse di batlileng di tlhamaletse mme se ne se gola go fitlha se nna dimetara di ka nna tlhano mo magetleng, mme seo se dira gore se nne boleele jwa dimetara di le pedi go feta ditlou tse re nang le tsone gompieno.

Dirintlha tseo di ne di itsege go le kana kang? Rekoto ya masaledi e bontsha gore nako nngwe di kile tsa bo di kaila go ralala Yuropa le Engelane, fela jaaka mofuta o mongwe wa tsone o o bidiwang mammoth. Mo godimo ga moo, ga se gantsi masaledi a ditlou a fitlhelwang a le nosi, go na le moo a fitlhelwa mo seretseng se se omeletseng se se nang le masaledi a a farologaneng a mefuta e mengwe ya diphologolo, e gantsi e neng e ka se fitlhelwe e le mmogo.

Diphiri le Dikubu

Masaledi a ditshedi tsa bogologolo a a neng a fitlhelwa kwa Lazio, kgaolo nngwe e e mo bogareng jwa Italy, a bontsha gore ka nako nngwe maemo a yone a bosa a ne a tshwana le a Afrika, e re ka dikubu, ditshepe, le dibatana tse dingwe tse dikgolo di kile tsa bo di kaila mo kgaolong eno. Tota e bile, masaledi mangwe a sengwe sa dibatana tseno, a a neng a bidiwa lengau la Monte Sacro, a ne a fitlhelwa fa gare ga motse wa Roma. Mo lefelong lengwe le le ribolotsweng gaufi le motse wa Polledrara, go ile ga fitlhelwa masaledi a ditshedi tsa bogologolo a a fetang 9 000, a e neng e le a mefuta e e farologaneng ya diphologolo: ditlou tsa bogologolo, dinare, dikgama, ditshwene tse di se nang megatla, ditshukudu le di-auroch—dipholo tse dikgolo tse di neng tsa fedisiwa dingwaga di ka nna 400 tse di fetileng. Musiamo mongwe o o mo lefelong leo o na le tsela e e ageletsweng kwa godimo gore bajanala ba tsamaye mo go yone go bona masaledi a a omeletseng a ditshedi a le mo mafelong a a neng a fitlhelwa mo go one.—Bona tsebe 16.

Logaga longwe gaufi le Palermo, kwa Sicily, lo ne lo tletse ka ditone tsa masaledi, go akaretsa le marapo a a omeletseng a dikgama, dipholo, ditlou le dikubu tsa dingwaga tse di farologaneng—tota le e e sa ntseng e le mo popelong ya mmaayone. Tota e bile, go ile ga rekisiwa ditone di le 20 tsa masaledi ano mo dikgweding di le thataro tse di neng tsa latela morago ga go ribololwa ga lefelo leo!

Kwa Borwa jwa Engelane, moithuti wa ditshedi tsa bogologolo e bong J. Manson Valentine o ne a bona mafelo a seretse se se omeletseng a a neng a na le marapo a mannye a diphologolo di le dintsi tsa mofuta o le mongwe, mmogo le diphiri le di-polar bear. Go tla jang gore masaledi a a omeletseng a diphologolo tsa bogologolo a bo a fitlhelwa mo mafelong a a farologaneng thata jaana?

Baitsesaense bangwe ba dumela gore tsela e diphologolo tseno di ileng tsa swa ka yone e dumalana le gore di bolailwe ke masetlapelo a tlholego. Go sa kgathalesege gore ke eng se se dirileng gore di swe jaana ka bontsi, seo se ile sa ama karolo e kgolo e e akaretsang naga yotlhe ya Yuropa, Siberia le Alaska.

Masaledi a a omeletseng a diphologolo tsa bogologolo a re thusa go akanya ka tsela e lefatshe la bogologolo le neng le farologane ka teng le lefatshe le re tshelang mo go lone gompieno. Eleruri kwa Italy fela, fa o ne o ka boela morago makgolo a dingwaga a a fetileng, o ne o ka akanya gore o mo dikgweng tsa Afrika.

[Lebokoso mo go tsebe 17]

FOSELE KE ENG?

Fa o bona fosele la ntlha o ka tsaya gore ke lerapo le le tlwaelegileng fela. Boammaaruri ke gore, ke ditlamorago tsa go fetoga ga dikhemikale—go fetoga ga sengwe se se rileng go nna masaledi a bogologolo a ditshedi—go go diregang pele ga diphologolo tse di suleng di bola.

Tsela e nngwe e e tlwaelegileng ya go fetoga ga sengwe go nna fosele, ke ya go fetoga ga dilo dingwe go nna diminerale. Fa seno se direga, masalela a dilo tse di tshelang a emisediwa gotlhelele kgotsa bontlhanngwe ke diminerale tse di leng mo masaleding a a kolobileng. Ka jalo, dilo di fetoga difosele mo maemong a a rileng a tikologo. Maemo ao a akaretsa go nna le masalela a le mantsi a seretse le gore diphologolo tse di suleng di fitlhwe ka bonako mme di se ka tsa bola. Mo maemong a a tlwaelegileng, ditoto tsa diphologolo tse di sa jewang ke diphologolo tse dingwe di felelediwa ke dibakateria le ke dilo tse dingwe tse di jaaka phefo le metsi. Ka jalo, go fetoga ga dilo go nna difosele ke sengwe se se diregang sewelo.

[Lebokoso/Setshwantsho mo go tsebe 17]

DI-MAMMOTH KWA HEMISEFERENG E E KWA BOKONE

Pego ya masaledi a ditshedi tsa bogologolo e bontsha gore di-mammoth tse di boboa di ne di kaila mo lefelong le legolo le le neng le akaretsa Asia, Yuropa le Amerika Bokone. Kwa Yuropa, go bonala fa Italy e ne e le karolo e e kwa borwa jo bo kgakala jo diphologolo tseno di neng di le kwa go yone.

Mammoth e e boboa e e batlang e le bogolo jo bo lekanang le ditlou tsa kwa Asia tsa gompieno, e ne e na le moriri o o golang go fitlha boleele jwa disentimetara di le 50 mme tse ditonanyana tsone di ne di na le manaka a maleele a a obegileng a a neng a gola go fitlha boleele jo bo ka nnang dimetara di le tlhano. Go fitlhetswe selekanyo se segolo sa manaka a di-mammoth kwa Siberia—di ne di le dintsi jaana mo e leng gore mo metlheng ya bogare di ne di romelwa kwa China le Yuropa.

[Motswedi wa Setshwantsho]

Photo courtesy of the Royal BC Museum

[Setshwantsho mo go tsebe 16, 17]

Lefelo la Polledrara le le nang le masaledi a a omeletseng a diphologolo

[Motswedi wa Setshwantsho]

Soprintendenza Archeologica di Roma

[Metswedi ya Ditshwantsho mo go tsebe 15]

Top: Museo di Paleontologia dell’Università degli Studi “La Sapienza” di Roma; bottom: © Comune di Roma - Sovraintendenza Beni Culturali (SBCAS; fald. 90, fasc. 4, n. inv. 19249)