Ditlou—A Ke Ditsala Kana Baba?

KA MMEGADIKGANG WA TSOGANG! MO AFRIKA BORWA

DITLOU di ratelwa le go ilelwa mabaka a a farologaneng. Mo bathong bangwe ke babereki ba ba mosola, di kgona go goga dikota tse dikgolo le go di baya sentle. Bangwe ba solegelwa molemo ke dinaka tsa ditlou, letlalo, le nama. Mme bangwe bone ba di tsaya e le dilo tse di ka nnang tsa ba senyetsa naga le dijalo.

Mme lefa go ntse jalo, babatlisisi ba le bantsi ba itse gore ditlou di mosola ka ntlha ya go bo di kgona go ntsha bodutu. Cynthia Moss o ne a tsaya dingwaga tse 13 a ithuta ka ditlou kwa lefelong la diphologolo la Kenya la Amboseli. Mo bukeng ya gagwe ya Elephant Memories, o kwala jaana: “Ke bone ditlou tse di namagadi tse di godileng tse di tlotlegang di eteletse pele le go sireletsa malapa a tsone mme gape ke di bone di latlhegelwa ke tlotlo mme di taboga di tshameka megatla ya tsone e le mo godimo ga mekwatla ya tsone mme di leba ka moitlho o o supang bogale.”

Daphne Sheldrick wa Kenya o ile a godisa ditlotswana tsa masiela di le dintsi mme a bo a di busetsa gape kwa sekgweng. E rile fa a botsolotswa ke makasine wa Getaway, o ne a tlhalosa jaana: “Ditlotswana tsotlhe tse di neng tsa tla di ne di na le maikutlo a a farologaneng fela jaaka go ntse ka bana ba batho. . . . Di na le mogopolonyana wa kgaisano, di a fufegelana mme fa o di kgalemela di ka nna tsa ngala. . . . Dingwe tsa tsone di nna diganana kana di tlhoka tsebe ka bomo. Re tlhoka go di otlhaya fela jaaka o ka otlhaya bana ba batho.”

Mo godimo ga go tlosa bodutu, ditlou di na le mosola mo tikologong. Palo e e lekanetseng ya ditlou mo kgaolong e e rileng e dira gore go nne le dimela tse di farologaneng ka bontsi. Buka ya Elephants, Economics and Ivory e thathamisa melemo e mengwe gape, jaaka go dira mafulo a masha, go jala peo, le go fokotsa “go nna teng ga ntsi ya tsetse.” Bakwadi ba konela ka gore: “Ditlou di na le mosola mo tikologong ya Afrika ya maboana le dikgwa.”

Mme le gale, fa go na le ditlou tse dintsi, di senya ditlhare. Di bo jaanong di nna baba mo bathong bangwe. Ka ntlha ya seno, basomaredi ba fokotsa palo ya ditlou mo dikgaolong dingwe tse di rileng. Mo dikarolong tse dingwe tsa Afrika koo ditlou di santseng di na le naga e ntsi, go di fokotsa ga go ise go dirwe. Seno se na le mosola. Makasine wa New Scientist o tlhalosa gore: “Mo lefelong la diphologolo la Kenya la Amboseli, koo go iseng go ko go fokotswe ditlou teng, di tsamaya fela ka tshosologo le batho di sa ba boife.”

Borasaense ba batla mekgwa e mengwe e ba ka fokotsang selekanyo se ditlou di tsalang ka sone. Mme mo nakong eno fa motho a ntse a ithuta mo gontsi ka ditlou, o tla kgona go nna le mabaka a mantsi a go di tsaya e le ditsala.

[Motswedi wa Setshwantsho mo go tsebe 31]

Animals/Jim Harter/Dover Publications, Inc.