Kopano ya Ntlha ya Boditšhabatšhaba ya Basupi ba ga Jehofa kwa Russia

ST. PETERSBURG, kwa Russia, e itsege thata ka seo baagi ba yone ba se bitsang “masigo a masweu”—eleng lobaka lwa dibeke tse tharo ka June loo ka lone loapi lo sekeng lo fifala gotlhelele. Mme legale June 26 go ya go 28 ka 1992 o ne a kgethegile.

Ka malatsi ao, Basupi ba ga Jehofa ba ne ba tshwere kopano e e neng e sa bue ka lesedi le le neng le apesitse toropo eo ya St. Petersburg le sa kgaotse, mme go na le moo ba ne ba bua ka la semoya leo Bakeresete ba boammaaruri ba le bontshang. Ke ka lebaka leo kopano ya bone e neng e na le setlhogo se se reng: “Batshodi ba Lesedi.”

Eno e ne e le kopano ya ntlha ya boditšhabatšhaba ya Basupi mo go se e kileng ya bo e le Soviet Union pele. Go ne go na le batlakopanong ba ba tswang kwa mafatsheng a a ka tshwarang 30 go dikologa lefatshe, go kopanyeletsa le Borithane, Canada, Denmark, Finland, Italy, Japane, Jeremane, Netherlands, Norway, Sweden, Switzerland, le United States.

Mo godimo ga bao, go ne go na le Basupi ba ka nna 29 000 go tswa mo go seo e kileng ya bo e le Soviet Union pele. Bangwe ba ne ba tswa kwa Estonia, Georgia, Latvia, Lithuania, Moldova, le Ukraine. Palo eo e ne e nametsa bogolo jang fa o akanya gore Russia e ne e na le mathata a diphetogo mo go tsa itsholelo. Seo se neng se itumedisa le go feta e ne e le go nna teng ga batlakopanong ba Ma-Russia bao ba neng ba ile ba tsamaya dikilomitara di le 8 000 go tswa kwa Vladivostok le kwa mafelong a mangwe a a mo lotshitshing lo lo kwa botlhaba lwa Russia.

Palo e ntsi ya batlakopanong ba mafatshe a sele e ne e tswa kwa Finland e e gaufi le koo, e e neng e na le batlakopanong ba le 10 000. Lebala le ne le kgaogantswe ka dikarolo tse pedi—ya Se-Russia le ya Se-Finland, nngwe le nngwe e na le serala se thulaganyo e neng e neelwa go tswa mo go sone.

Dipaakanyetso

Kopano e ne e tshwaretswe kwa Setadiamong sa Kirov se se nang le dingwaga di le 42, se se mo setlhaketlhakenyaneng sa Krestovsky, dikilomitara di sekae fela go tswa kwa bogareng jwa St. Petersburg. Se na le manno a batho ba ba ka tshwarang 60 000 mme ke sa bobedi ka bogolo mo ditadiamong tsotlhe tse di mo go se e kileng ya bo e le Soviet Union pele. Kwa moragonyana kwa metsi a Noka ya Neva a ne a bonala a ntse a tshela mo Kgogometsong ya Finland.

Lefa go le jalo, setadiamo seo se ne se tlhoka go baakanngwa. Diphaephe tsa metse a a leswe di ne tsa phepafadiwa, mme go ne ga agiwa le ditlamelo tsa matlwana a boithomelo go oketsa tse di ntseng di le teng. Manno a boleele jwa dikilomitara di le 30 a a tshwaragantsweng a a bileng a palamela a ne a tshwanelwa ke gore a pentiwe. Mo godimo ga moo, mangaubana a a neng a dikologile lebala a ne a fokotswa dikala, mme le bojang bo ne jwa pomiwa. Go ne ga tsaya dibeke di le dintsi go wetsa tiro eno.

Tsa Mosepele le Marobalo

Ereka go ne go laleditswe batlakopanong ba le 17-000 go tswa kwa mafatsheng a sele, dithulaganyo tsa mosepele le marobalo e ne ya nna namane e tona ya tiro. Badiredi ba Russia ba ne ba le tirisanommogo thata eseng fela mo diofising tsa boemedi tse di farologaneng mme gape le kwa molelwaneng le kwa lebaleng la difofane la boditšhabatšhaba la St. Petersburg.

Go ne ga dirwa dithulaganyo le dihotele di le 32 go amogela bontsi jwa batlakopanong ba mafatshe a sele ba ba 17 000. Batlakopanong ba ba 29 000 ba ba neng ba tswa kwa dikarolong tse di farologaneng tsa mo e kileng ya bo e le Soviet Union pele ba ne ba bonelwa boroko mo dikolong le mo dikheretšheng di le 132. Batlakopanong gape ba ne ba tlhoka dipalangwa tsa go ya kwa mabaleng a kopano letsatsi le letsatsi, mme go ne ga hirisiwa dibese di le 390 go ba pega.

Bontsi jwa batlakopanong ba mafatshe a sele ba ne ba a ja kwa dihoteleng tse ba neng ba robetse kwa go tsone. Lefa go le jalo, dikgwedi di le mmalwa pele ga kopano, badiredi ba puso kwa St. Petersburg ba ne ba bolela fa ba tlhobaediwa ke mathata a go bona dijo tse di ka lekanang diketekete tsa batlakopanong ba ba tlileng go tswa mo dikarolong tse di farologaneng tsa mo e kileng ya bo e le Soviet Union pele. Ba ne ba tlhalosa gore go ne go se kitla go nna le dijo tse di lekaneng mo toropong eo le gore Basupi ba ne ba tla tshwanelwa ke go itlela ka dijo go tswa kwa mafelong a mangwe.

Mme ba ile ba dira fela jalo. Makala a le mantsi a Mokgatlho wa Watch Tower a ile a ntsha dijo tse dintsi go di isa koo. Lekala la Finland le le losi le ne la aba ditone di le 200 tsa dijo go di isa kwa kopanong! Mo godimo ga moo, bontsi jwa batlakopanong ba mafatshe a sele ba ile ba itlela ka mefago ya nama e e mo metemeng, maungo le manoko a a omisitsweng, borotho, le dijo tse dingwe tsa botlhokwa. Mo letsatsing la bofelo la kopano, mekowakowa ya dibokose tsa dijo e ne ya abelwa batlakopanong ba ba tswang mo go se e kileng ya bo e le Soviet Union pele kwa lebaleng e le gore ba tle ba nne le mofago fa ba boela gae.

Letsholo Le Legolo la go Itsise ka Kopano

St. Petersburg ke toropo ya bobedi ka bogolo mo Russia, e e nang le batho ba le dimilione di ka tshwara botlhano mo go yone. E le la ntlha mo botshelong, Basupi ba ga Jehofa ba ne ba letlelelwa go tswa letsholo le legolo la go itsise ka kopano eno kwa Russia.

Letsholo leno le legolo le ne la simolola dibeke di le mmalwa pele ga kopano. Dipampitshana tse di ka tshwarang milione di ne tsa kwalwa ka Se-Russia mme tsa anamisiwa. Tsebe ya ntlha ya pampitshana eo e ne e na le taletso go botlhe go tla puong ya phatlalatsa ka Matlhatso thapama. Kafa morago e ne e tlhalosa ka thulaganyo ya Sontaga. Mo godimo ga moo, baagi ba St. Petersburg ba ne ba tsamaisediwa dikaelo tsa pampitshana e go tweng Basupi ba ga Jehofa ba Dumela Eng? di ka nna 750 000. Seno se ne sa ba tlwaelanya le dithuto tsa Basupi.

Bontsi jwa batlakopanong ba ne ba goroga kwa St. Petersburg go setse letsatsi go ya kwa go a le manè pele ga kopano e simologa. Ka malatsi ao, diketekete tsa batlakopanong ba ne ba eme mo mekgwatheng ba tsamaisa dipampitshana le dibuka tse dingwe ka Se-Russia. Mo godimo ga seo, go ne ga dirwa diboto tsa kanamiso di le mmalwa tse dikgolo mme di ne tsa bewa mo mebileng e e tletseng batho thata ya ntlha ya tlase ya St. Petersburg. Di ne di le bogodimo jwa dimitara di le 3 le bophara jwa dimitara di le 1,5, di na le taletso e e kwadilweng ka mebala e mentle e e laleletsang batho puo ya phatlalatsa kafa pele le kafa morago ga tsone. Tse dingwe di ne di beilwe fela kwa dikgorong tsa diteishane tse di kafa tlase ga lefatshe tse di nang le batho ba le bantsi.

Thulaganyo

Kgabagare, letsatsi la ntlha la kopano le ne la goroga, mme batho ba ba neng ba le teng ba ne ba le 45 000! Thulaganyo e ne ya fetolwa gore e tle e solegele molemo batlakopanong ba ba neng ba sa bue Se-Russia kgotsa Se-Finland. Ka sekai, dipuo di le dintsi di ne tsa neelwa ka Seesemane mme tsa ranolelwa mo puong ya Finland le ya Russia. Maloko a le supa a Setlhopha Se Se Laolang sa Basupi ba ga Jehofa a ne a neela dipuo di le mmalwa tsa mofuta ono.

Mo letsatsing lengwe le lengwe la kopano, go ne go na le dipego le maitemogelo go tswa kwa mafatsheng a sele a a tlhomololang kafa Jehofa a segofatsang tiro ya go rera ka teng kwa dinageng tseo. Dipego tseno, go kopanyeletsa le maitemogelo a le mantsi, le tsone ka mo go tshwanang di ne tsa neelwa ka Seesemane mme di bo di ranolelwa mo puong ya Russia le ya Finland.

Puo ya phatlalatsa e e neng e neelwa karolo ya Se-Russia e ne e tlotla ka kgang e e tshwentseng Ma-Russia a le mantsi thata gompieno. Setlhogo sa yone se ne se re “A Ruriruri Modimo O Amega Ka Rona?” Morago ga polelo batlakopanong ba ne ba itumelela go amogela boroutšhara e ntšha e go tweng A Ruriruri Modimo O Amega Ka Rona? ka Se-Russia le Se-Finland.

Kopelo e e dirisiwang ke Basupi ba ga Jehofa kwa dipokanong tsa bone ga ise e nne teng ka Se-Russia. Ke ka lebaka leo he, Mokgatlho wa Watch Tower o ileng wa gatisa boroutšhara e e kgethegileng e e nang le mafoko otlhe a dipina tse di neng di tlile go dirisiwa mo kopanong. Batlakopanong ba Ma-Russia ba ne ba amogela dikaelo tsa bone jaaka fa ba ne ba ntse ba tsena mo lebaleng. Abo go ne go itumedisa jang ne go utlwa batho ba le 46 000 ba ba tswang mo mafatsheng a le 30 a a farologaneng ba opelela Jehofa Modimo dipako ka dipuo tsa bone, go akaretsa le Se-Russia!

Thutotlhagelelo e ile ya rutwa mo dikarolong di le dintsi tsa lefatshe go kopanyeletsa le dinaga tse di kileng tsa bo di bopa Soviet Union ka masomesome a dingwaga. Mme jaanong Basupi ba ga Jehofa mo dinageng tseno ba na le didirisiwa tse ka tsone ba ka senolang maaka a thuto eno le go anamisa boammaaruri kaga Modiri wa botshelo. Abo batlakopanong ba ile ba itumela jang ne fa kwa bofelong jwa thulaganyo ya Sontaga mo mosong leloko lengwe la Setlhopha Se Se Laolang le golola buka ya Life—How Did It Get Here? By Evolution or by Creation? ka Se-Russia! Mongwe le mongwe o ne a fiwa mpho ya sekaelo.

Batlakopanong ba mafatshe a sele ba ne ba boleletswe go le pele gore Basupi ba kwa Russia ga ba na Dibibela. Ka jalo ba ne ba tla ka dimpho tse di diketekete tsa Dibibela tsa Se-Russia. Dibibela di ne tsa phuthelwa golo go le gongwe gore di tle di isiwe kwa diphuthegong tsa Basupi ba ga Jehofa e le gore di tle di neelwe ba ba tlhokang sekaelo sa yone.

Ba Ne Ba Gakgametse Fela Thata!

Ka Matlhatso, mo mosong otlhe le ka ditshokologo, go ne go thelesegela baeng ba eseng Basupi mo lebaleng. Ba ne ba batla thata go iponela ka a bone matlho se se neng se diragala. Bontsi jwa bone ba ne ba gakgametse thata. Bontsi jwa bone bo ne bo ise bo ko bo utlwe sepe ka Basupi ba ga Jehofa pele ga ba amogela taletso e e neng e ba laleletsa puo ya phatlalatsa. Bangwe ba ne ba utlwa ka kopano eo mo dikgannyeng tsa thelebishene. Tlhora ya batlakopanong e ne e le 46 214.

Mohumagatsana mongwe yo eleng leloko la Kereke ya Russian Orthodox o ne a akgela jaana: “Basupi ba nkgatlhile fela thata. Ke batho ba ba kagiso, ba ba maitseo, le ba ba nang le seriti.” Yo mongwe gape wa baeti o ne a re: “Re solofela gore Basupi ba ga Jehofa ba santse ba tla tshwarela dikopano tse dingwe gape tse dintsi mo St. Petersburg.” Sajene mongwe yo mogolo wa sepodisi sa Russia, yo o neng a abetswe go ya go theogelela kwa lefelong la kopano o ne a re go ne “go itumedisa go nna teng mo kopanong.”

Modiredi mongwe wa lefelo leo o ne a akgela ka gore ‘Basupi ba ga Jehofa ba tsewa ke bangwe e le setlhopha sa sephiri se se ipogisang le go bogisa bana ba sone. Mme nna ke iponela batho fela ba ba siameng, ba ba nyenyang, ba ebileng ba le botoka thata mo bathong ba le bantsi ba ke ba itseng. Ba rata kagiso ebile ba wetse dibete, le go rata bangwe ka bone fela thata.’ O ne a tlatsa ka gore: “Ga ke kgone go tlhaloganya gore tota ke eng fa batho ba re bolelela maaka a a ntseng jalo ka lona.”

Ka Matlhatso thapama baganetsi bangwe ba ne ba leka go kgoreletsa kopano. Ba ne ba tshwere dipolakate tse ditona tse di neng di kwadilwe ditatofatso tsa maaka kgatlhanong le Basupi. Jaaka fa segopa seo sa bangongoregi se ne se ntse se gola le go tsosa modumo thata, mapodisi a ile a bitsa a mangwe go a thusa go sireletsa batlakopanong. Bangongoregi bao ba ile ba felela fela kwa mejakong e e kwa pele. Kwa bokhutlong ba ile ba boela morago, ba bolailwe ke pelo.

Mongwe wa batlakopanong yo o neng a bona se se neng sa diragala o ne a kgatlhilwe thata ke tirisanommogo ya mapodisi. “Okare ke a lora go bona mapodisi a dira maiteko a a tseneletseng go re sireletsa. Dingwaga di sekaenyana fela tse di fetileng Basupi ba ga Jehofa ba ne tsewa jaaka baba ba Puso. Mme jaanong one mapodisi ka namana a a re sireletsa!” Mongwe wa mapodisi o ne a bua maikutlo a gagwe ka boammaaruri fa a ne a bolelela batlakopanong jaana: “Ga re batle gore lo re tshabe. Re fano go lo sireletsa le go tlhomamisa gore sengwe le sengwe se tsamaya sentle.”

Ee sengwe le sengwe se ne sa tsamaya sentle. Le maemo a bosa e ne e le one sentle. Mo malatsing otlhe a kopano, go ne go se bongola, go le bothitho, go bile go sena lefa e le leru.

Diketekete Di A Kolobediwa

Mo go ba le bantsi ntlha ya konokono mo kopanong eo e ne e le go kolobediwa ga ba le diketekete. Phuthego nngwe kwa St. Petersburg, e e nang le baboledi ba le 254, e ne ya bega ba le 108 ba ba kolobeditsweng! Go thata go tlhalosa ka mafoko kafa batlakopanong ba neng ba ikutlwa ka teng fa ba ne ba bona ba ba tlileng go kolobediwa ba le 3 256 ba ema ka dinao. Sebui se ne sa ba botsa dipotso di le pedi tse di mabapi le go ineela ga bone mo go Jehofa, mme ba ne ba araba ka “da” (ee) ka lentswe le le neng le kibanya ditsebe.

Morago ga thapelo, bommè ba ba yang kolobetsong ba ile supediwa kwa dikamoreng tsa bone tsa go ya go ipaakanyetsa kolobetso teng, mme le borre fela jalo. Jaaka fa makgolokgolo a bone a ne a tloga fa a neng a le teng, bone le bareetsi ka kakaretso ba ne ba dumedisana ka go tsholeletsana mabogo.

Ba le bantsi mo bareetsing ba ne ba tsholola dikeledi tsa boitumelo. Bangwe ba ne ba opa diatla ba ne ba lesa ba boe ba di ope gape ka metsotso e le 45. Mongwe wa batlakopanong go tswa kwa Finland o ne a palelwa ke go itshwara mme a simolola go lela. O tlhalosa jaana: “Ka 1943, ke ne ka tsena mo bosoleng jwa Finland go lwa kgatlhanong le Ma-Russia. E ne e le ntwa e e matlho mahibidu. Mme jaanong, mo kopanong eno, ke bone diketekete tsa Ma-Russia ba neela matshelo a bone mo go Jehofa! Ke ne ka lela fa ke ne ke bona bangwe ba bone ba tsamaya ka ditulo tsa maotwana mme ba bangwe ba tlhotsa. Ke ne ka ipotsa jaana: ‘A le bone ke ba ba kileng ba ya ntweng? A ba ne ba golafaditswe ke masole a Finland?’ Ekete Jehofa o ka nthusa mo nakong eno gore ke tswe bakaulengwe ba me ba Ma-Russia thuso.”

A mme gone bakaulengwe ba Ma-Russia ba ne ba itumelela mpho eo Jehofa a ba e fileng ka kopano eno ya malatsi a le mararo ya moletlo wa semoya oo ba neng ba o baakanyeditswe, eleng kopano eno e eleng ya ntlha e kgolo mo St. Petersburg? Fa sebui sa bofelo se ne se konela mafoko a sone se ne sa re: “Mo go tsotlhe bogolo jang re leboga Jehofa Modimo ka ntlha ya kopano eno e e molemolemo.” Bareetsi ba ne ba ema ka dinao mme ba opa diatla ka boipelo ka metsotso e e fetang e le metlhano. E ne e le kgalaletso go Jehofa!

Jehofa Modimo, eleng Motswedi wa lesedi, ka boammaaruri o eme nokeng diketekete tsa batshodi ba lesedi ba ba mo dinageng tseno tse e kileng ya bo e le karolo ya Soviet Union pele. Morago ga go thibelwa le go bogisiwa ka dingwaga tse di fetang 70, go ne ga bonala sentle gore mo nakong eo yotlhe Jehofa o ne a ntse a diragatsa tsholofetso ya gagwe e a e dirileng mo go Isaia 60:22, koo a bolelang jaana teng: “Eo monnye o tla tla a nna makgolo a le shomè, le eo mmōtlana a nna morahe o o thata: Nna Yehofa ke tla go akohisa mo motlheñ oa gōna.”

Fa e kare morago ga o sena go bala makasine ono, o bo o nna le dipotso dipe go tswa mo Bibeleng, tsweetswee o seka wa tshaba go ikgolaganya le Basupi ba ga Jehofa kwa Holong ya Bogosi ya mo lefelong la lona, kana o kwalele bagatisi ba makasine ono. (Bona tsebe 5.)

[Lebokoso mo go tsebe 31]

Dikopano Tse Dingwe Gape

Palo yotlhe ya dikopano tse di neng di tshwerwe mo selemong se se sa tswang go feta kwa go se e kileng ya bo e le Soviet Union pele, e ne e le borataro. Palokakaretso ya ba le 91 673 ba ne ba di tlile, mme ba le 8 562 ba ne ba kolobediwa. Seno se raya gore 9,3 lekgolong ya batho ba ba neng ba le teng ba ne ba kolobediwa. Tota ebile, fa e ne e se ka ntlha ya go bo go ne go na le batlakopanong ba mafatshe a sele ba le 17 000 kwa kopanong eo ya boditšhabatšhaba kwa St. Petersburg diperesente tseo di ka bo di ne di le kwa godimo.

Visoki Zamok, e e gatisiwang kwa Lviv (e e kileng ya bo e le Lvov), e ne ya bega jaana: “Go ne go rena bopelonomi le go tlhoka boitimokanyi kwa lebaleng leo ka nako ya kopano ya malatsi a le mararo. Le mororo go ne go na le batho ba ba kalo, mabala a ne a santse a le phepa fela a ntse jaaka pele ga kopano. Kagiso le thulaganyo e go ka tsewang malebela mo go yone di ne di le gongwe le gongwe.”

Ereka jaanong Basupi ba ga Jehofa ba itumelela go obamela Modimo ka kgololesego ba sa iphitlhe mo go se e kileng ya bo e le Soviet Union pele, bontsi jwa batho ba koo jaanong ba na le sebaka sa go iponela ka namana gore tota Basupi ke batho ba mofuta mang. Pampiri ya dikgang ya Russia e go tweng Krasnoyarskii Komsomolets, e ile ya re: “Ke batho ba ba kgatlhang, ba ba botsalano thata, le ba ba sa tseneng mo dipolotiking gotlhelele; ba kgothaletsa bonatla, eseng go ipatlela fela ‘madi ka ditsela tse di motlhofo.’”

Dikopano Tse Di Neng Di Le kwa Go Seo E Kileng ya Bo E le Soviet Union

LETLHA TOROPO TLHORA YA BATLAKOPANONG KOLOBETSO

June 26-28 St. Petersburg, Russia 46 214 3 256

July 10-12 Lviv, Ukraine 15 011 1 326

Alma-Ata, Kazakhstan 6 605 829

July 17-19 Kharkov, Ukraine 17 425 2 577

July 24-26 Irkutsk, Siberia 5 051 536

Tallinn, Estonia 1 367 38

PALOKAKARETSO 91 673 8 562

[Setshwantsho mo go tsebe 28]

Diboto di ne tsa itsise ka kopano

[Ditshwantsho mo go tsebe 29]

Mongwe wa batlakopanong ba Ma-Russia o amogela sekaelo sa gagwe sa Bibela

Diboroutšhara tse di kgethegileng tsa dipina di ne tsa dirisiwa

[Ditshwantsho mo go tsebe 30]

Palo e e itumedisang thata ya ba le 3 256 e ne ya kolobediwa