Yo O Tla Sireletsang Diphologolo tsa Rona tsa Naga
MOTHO o sale a ntse a itumelela go ithuta diphologolo tsa naga go tloga fela kwa tshimologong ya hisitori ya gagwe. Se se utlwisang botlhoko ke gore, fela fa Modimo o sena go letla motho go ja nama, o ne a se ka a tlhola a di anaanela me a di bolaya go sa tlhokege a bo a di tsoma ka bosetlhogo a batla ditlhogo tsa tsone fela.—Genesise 2:19, 20; 9:2; 10:9; 25:27.
Mme batho bangwe ba ne ba tswelela ba itumelela diphologolo tsa lefatshe tsa naga. Mo e ka nnang dingwaga di le 3 000 tse di fetileng, mafoko a a mo go Pesalema 104 a ne a kwalwa ke motho mongwe yo o neng a rata diphologolo tsa naga. O umaka diphologolo tse di farologaneng tsa naga ka maina, jaaka dipitse tsa naga, ditau, dipodi tsa dithaba, dipela le dinonyane. Dilo tse mopesalema a di ithutileng ka dinonyane, melodi ya tsone, le diphologolo, di ne tsa mo tlhotlheletsa gore a bolele jaana a baka: “[Jehofa] U di dihile ka botlhale cotlhe hèla.”—Pesalema 104:10-12, 17-21, 24.
Eleruri, go a tshwanela go bo Jehofa Modimo a itumedisiwa ke dilo tse dintlentle tse a di bopileng. (Genesise 1:31) Ka jalo, re ka tlhomamisa gore ga a kitla a letla gore diphologolo tsa lefatshe tsa naga tse di setseng di bolawe tsotlhe. Go dumelana le seo, Modimo o ne a tlhotlheletsa mopesalema gore a kwale tshedimosetso e e tshwanetseng go kgatlha botlhe ba ba ratang diphologolo tsa naga. Re bolelelwa gore ‘lefatshe . . . ga le kake la tshikhinngwa ka bosakhutleng.’ (Pesalema 104:5) Go amega ka tsela eo ka gore dilo tse di mo polaneteng eno di nnele ruri go akaretsa dibopiwa tse di leng mo go yone. (Isaia 45:18) Jesu Keresete o ne a gatelela gore Modimo o amega ka dibopiwa tsa naga fa a ne a bolela jaana: “Dithaga di le tlhano a ga di rekwe ka madinyana a le mabedi? me go bo go se epè ea cōna e e lebalwañ ha pele ga Modimo.” (Luke 12:6) Tsela e Modimo o amegang ka yone ka dibopiwa tsa gagwe e gatelelwa gape mo go Pesalema 104, temana ya 14, e e balegang jaana: “O tlhogisetse dikgomo boyañ, le eōna merōgō go nna thushō ea batho; gore a tlè a ntshè diyō mo mbuñ.”
Go dumelana le dintlha tseno, Jehofa Modimo ga a kitla a itshokela batho ba ba mo latolang gore o teng le ba ba tshosetsang go senya isagwe ya lefatshe leno le diphologolo tsa yone tsa naga ka bosakhutleng. Pesalema 104 e gatelela seno ka go konela ka mafoko ano a a re tlhomamisetsang: “A baleohi ba nyèlèdiwè ba tlogè mo lehatshiñ, me a baikepi ba se tlhole ba leeō gopè.”—Pesalema 104:35.
A bo go gomotsa jang ne go itse gore Modimo o boletse fa o ikaeletse go “senya ba ba senyañ lehatshe.” (Tshenolō 11:18) Ka nako eo boperofeti jo bongwe jo jaanong bo diragadiwang ka tsela ya tshwantshetso bo tla diragadiwa ka mmatota. Ka sekai, Jehofa Modimo o bolela jaana ka moperofeti wa gagwe Hosea: “Ke tla re mo motlheñ ouō ke ba dihèle kgōlaganō le diphōlōhōlō tsa naga, le dinōnyane tsa loapi, le dilō tse di gagabañ tsa lehatshe: ke tla rōba bora le chaka le tlhabanō mo lehatshiñ, me ke tla ba rōbatsa ka polokègō.”—Hosea 2:18; Isaia 11:6-9.
Ikakanye o setse o le mo lefatsheng le le tlang leo la Paradaise. A bo eo e tlile go nna nako e e itumedisang jang ne! ‘Lefa go ntse jalo,’ o ka nna wa ipotsa jaana, ‘ke eng se ke tlhokang go se dira gore ke bone masego a a ntseng jalo?’ Sa ntlha, o tshwanetse go ithuta Lefoko la Modimo. Mme jaanong, Jehofa Modimo o solofetsa ba ba ineelang gore ba kaelwe ke Bibela ka tsela eno e e itumedisang thata: “Basiami ba tla rua lehatshe, ba tla aga mo go yeōna ka bosakhutleng.”—Pesalema 37:29.