Dikolo Di Mo Mathateng
Batsadi ba romela bana ba bone kwa sekolong e seng fela go ya go ithuta go bala, go kwala, le dipalo. Ba solofetse gore sekolo se rute bana ba bone sentle gore e tle e nne bagolo bao batsadi ba ka ipelafatsang ka bone. Mme gantsi ga go ke go nna jalo. Ka ntlha yang? Ka gonne dikolo di mo mathateng mo lefatsheng lotlhe.
MO DINAGENG di le dintsi selo se se bayang thuto ya bana mo kotsing ke go tlhoka madi le go tlhokega ga barutabana. Ka sekai, mo dikarolong di le dintsi tsa United States go tlhaela ga madi go dirile gore dikolo dingwe di patelesege go ‘rokaganya sesha dibuka tse di onetseng, go tlogela siling e onala, go fokotsa dithulaganyo tsa dithuto tsa botaki le tsa metshameko, kana di ile tsa tswala sekolo ka malatsinyana,’ go rialo makasine wa Time.
Mo Afrika dilwana tsa thuto di tlhaela fela jalo. Go ya ka Daily Times ya Lagos, naga ya Nigeria e na le morutabana a le 1 fela mo baneng bangwe le bangwe ba ba 70, mme “go ka direga thata gore a le mongwe mo barutabaneng bangwe le bangwe ba bararo e bo e le yo o sa katisiwang.” Mo Afrika Borwa—mo godimo ga go tlhaela ga barutabana—go kgobelelana ga barutwana mo diphaposing le go sa iketlang ga maemo a dipolotiki go baka se South African Panorama e se bitsang “tlhakatlhakano mo dikolong tsa bantsho.”
Ke boammaaruri gore, ga se gore fa sekolo se na le barutabana le didirisiwa tse di lekaneng se tla atlega. Ka sekai, kwa Austria, go begwa gore mo e ka nnang nngwetharong ya bana ba dingwaga tse 14 ga ba kgone go tlhakanya dipalo tse di motlhofo kana go bala sentle. Kwa Borithane, maduo a barutwana ba falolang mathemetiki, saense, le puo ya naga ka one “a kwa tlase thata go feta a ba kwa Jeremane, Fora le Japane,” go rialo The Times ya Lontone.
Kwa United States barutabana ba ngongoregela gore le mororo barutwana ba bona maduo a a kwa godimo mo ditlhatlhobong, ba le bantsi ba sala ba ntse ba sa kgone go kwala tlhamo, go rarabolola dipalo tsa mathemetiki, kana go sobokanya dintlha tsa botlhokwa mo dilong tse ba di rutilweng kana mo dibukeng tse di farologaneng. Ka ntlha ya seno, batlhankedi ba tsa thuto mo lefatsheng lotlhe ba akanyetsa go ntšhafatsa mananeo a thuto le mekgwa e e dirisiwang go tlhatlhoba kgatelopele e morutwana a e dirang.
Thubakanyo mo Dikolong
Dipego di supa fa go na le maemo a thubakanyo a a tshosang mo dikolong. Kwa Jeremane konferense ya barutabana e ne ya bolelelwa gore 15 lekgolong ya bana ba sekolo ga “e okaoke go dirisa dikgoka—mme 5 lekgolong ya bone ga e tshabe go dira ditiro tsa bosetlhogo, ka sekai, ba ka ragaka motho yo o rapaletseng fa fatshe a ntse a sa itwele.”—Frankfurter Allgemeine Zeitung.
Maemo a a ntseng jalo a a supang bosetlhogo a a tlhobaetsa. Baithuti ba sekolo se segolo sa Paris ba ne ba gwanta mo mebileng ba batla gore go tokafadiwe maemo a tshireletso kwa sekolong morago ga gore mosetsana mongwe wa dingwaga tse 15 a betelelwe ke basha ba le banè kwa botlhapelong. Batsadi ba tshwentswe ke koketsego ya ditlolomolao tse di amanang le tlhakanelodikobo, bogagapa le go kgerisa. Dilo tse di ntseng jalo ga di direge fela kwa Yuropa mme di simolola go anama le lefatshe lotlhe.
Kantoro ya Tona ya Thuto kwa Japane e bega fa go na le koketsego e e boitshegang ya thubakanyo mo baithuting ba dikolo tse dikgolo le tse dipotlana tsa koo. Pampiri ya dikgang ya The Star ya Afrika Borwa mo setlhogong se se reng “Baithuti ba ba Ebelang ka Dithunya Ba Laola Dikolo,” e tshwantsha maemo mo dikolong tsa Soweto le a “the Wild West [Go kgaratlha ga masetlelara a Maamerika gore a se ka a nyelediwa]” kwa United States mo lekgolong la bo19 la dingwaga. Go ya ka The Guardian ya Lontone, tota le tsela e New York City e tumileng ka thubakanyo ka yone e fitlha “kwa godimodimo mo e bileng feme nngwe ya tsa tshireletso e bolelang gore go otariwa diaparo tse di kganelang marumo go sutlhelela mo mmeleng wa motho di le dintsi thata kwa go yone, di rekelwa bana ba sekolo.”
Borithane le yone e na le bothata jwa thubakanyo ya kwa sekolong. “Mo dingwageng tse 10 tse di fetileng,” go rialo motlhankedi mongwe wa lekgotla la barutabana, “go rata go dirisa dibolao go ile ga anama thata. Go dirwa le ke bana ba ba santseng ba le babotlana e bile go anamela le mo go ba basetsana go tswa mo go ba basimane.”
Ga go gakgamatse gore batsadi bangwe ba bo ba swetsa ka go ntsha bana ba bone mo sekolong ba ba ithutela kwa gae. Ba ba bonang fa seno se sa kgonege gantsi ba tshwenngwa ke go bo sekolo se na le tlhotlheletso e e sa siamang mo baneng ba bone, mme ga ba itse gore ba ka dirang go lwantsha seno. Batsadi ba ka dirang go thusa bana ba bone go lepalepana le mathata a ba kopanang le one kwa sekolong? Mme gone, batsadi ba ka dirisana mmogo jang le barutabana go tlhomamisa gore bana ba bona thuto e e molemo? Ditlhogo tse di latelang di araba dipotso tseno.