Basha ba Botsa Jaana . . .

Ke Eng Fa Ke Tshwanetse go Bua ka Modimo?

“Mongwe le mongwe o na le bodumedi jwa gagwe. Ga o a tshwanela go pateletsa batho ba bangwe go dumela mo Modimong wa gago.”—Racish, wa dingwaga tse 14, wa kwa Guyana.

“Ke tlhabiwa ke ditlhong go bua ka Modimo ka gonne ke boifa gore go tla dirwa metlae ka nna.”—Rohan wa dingwaga tse 17, wa kwa Guyana.

“Re tshwanetse go bua ka Modimo ka gonne ke ene Mmopi wa rona e bile re mo kolota matshelo a rona.”—Marco, wa dingwaga tse 13, wa kwa Jeremane.

REETSA setlhopha sa basha se tlotla fela, kwantle ga pelaelo o ka swetsa jaana ka maswabi: Ruri go bua ka Modimo ke sengwe se basha ba sa bueng thata ka sone fa ba tsere dikgang. Bua fela ka metshameko, diaparo, dibaesekopo tsa bosheng, kana batho ba bong bo sele, ke gone motlotlo o tla nnang monate. Lefa go ntse jalo, leka fela gore o bue sengwe ka Modimo o bone kafa go tla sisibalang ka teng.

Basha bangwe bone ga ba dumele mo Modimong. Ba ka nna ba bolela gore ka gonne ba sa kgone go mmona, go raya gore ga a yo—go bua ka ene ke go senya nako fela. Lefa go ntse jalo, ga se basha ba bantsi ba ba latolang gore Modimo o teng. Go ya ka patlisiso ya Gallup, mo e ka nnang 95 lekgolong ya basha ba United States ba dumela mo Modimong. Totatota, Gallup e ne ya konela jaana: “Mo basheng ba le bantsi, Modimo o ba dumelang mo go ene ga se selo fela se e seng sa mmatota, mme ke Modimo wa sebele yo o etseng ditiro tsa bone tlhoko a ba duela le go ba otlhaya fa go tshwanela.” Mme jaanong, ke eng fa basha ba bantsi jaana ba okaoka go bua ka se ba se dumelang?

Lebaka la Go Bo Bangwe ba Ikgogona

Bangwe bone ba akanya fela gore ga go a siama go bua ka dilo tse o di dumelang le gore dilo tsa bodumedi di tshwanetse ya nna sephiri sa gago fela. Basha ba bangwe bone go bonala ba tlhabisiwa ditlhong ke go bua ka Modimo. Ba re, ‘Ga o a tlhalefa fa o dira jalo.’

Go sa kgathalesege gore balekane ba gago bone ba leba kgang eno jang, wena o eme fa kae mo kgannyeng eno? Kgang eno e go tshwanela tota fa e le gore o godisitswe jaaka mongwe wa Basupi ba ga Jehofa. Ka ntlha yang? Ka gonne go nna mosupi, o bolelela ba bangwe ka Modimo, ke selo sa botlhokwatlhokwa mo tumelong wa bone!—Isaia 43:9, 10; Mathaio 24:14.

Lefa go ntse jalo, basha bangwe ba Basupi ka ntlha ya go bo ba tle ba ganediwe, ba ikgogona go nna le seabe mo tirong ya go rera phatlalatsa—kana ba dira jalo fela ka gonne ba patelediwa ke batsadi. Bangwe bone ba nna le seabe mo tirong eo, fela mo pelong ba eletsa e kete ditsala tsa bone tsa sekolo di se ka tsa ba bona ba dira jalo. Fa ba le kwa sekolong, bangwe ba leka go boloka dilo tse ba di dumelang e le sephiri. Gantsi seno ke ka gonne ba tshaba gore ba tla tshegwa. “Ke ne ke tshaba go bua ka Modimo ka gonne ditsala tsa me di ne di tla nthaya maina mme ke ne ke sena bopelokgale jwa go tsweletsa motlotlo,” go ne ga ipolela jalo Ryan yo mmotlana.

Mme gape go na le ba ba ikgogonang ka gonne ba boifa gore ba ka se kgone go tshela ka melao ya Baebele ka botlalo. Ka ntlha ya serai sa “dithato tsa bokau,” ba akanya gore go molemo gore go se ka ga itsege gore ke Bakeresete, fa go ka direga gore ba dire sengwe se se phoso.—2 Timotheo 2:22.

Bangwe bone ga ba bue ka Modimo fela ka gonne ba inyatsa. Wilton wa dingwaga tse 19 o tlhalosa kgang eno jaana: “Go ne go se motlhofo gore ke bue le ba ke dirang le bone ka Modimo gonne ke ne ke ikutlwa ke se na bokgoni jwa go tshegetsa dintlha tsa me ka mabaka. Ke ne ke ikutlwa gore fa mongwe a ne a ka ganetsa se ke se dumelang, ke ne ke se kitla ke kgona go mo araba ka tsela e e kgotsofatsang.”

Boikarabelo jwa Mokeresete

A e ka tswa e le gore o ntse o ikgogona go bua ka Modimo ka ntlha ya lengwe la mabaka ano? Fa e le gore go ntse jalo, ga se wena fela. Basha ba bangwe ba ile ba kgaratlha le maikutlo a a ntseng jalo. Lefa go ntse jalo, ba le bantsi ba ile ba lemoga gore le mororo go na le dilo tse di kgobang motho marapo gore a se ka a dira jalo, gone go na le mabaka a a pateletsang motho go bua le ba bangwe ka Modimo. Ke afe?

Marco yo mmotlana yo o neng a umakiwa kwa tshimologong, o ne a tlhalosa kgang sentle thata fa a re Modimo “ke Mmopi wa rona, mme ka jalo, re mo kolota matshelo a rona.” (Tshenolo 4:11) Ee, botshelo ke mpho e e botlhokwatlhokwa. Mopesalema o ne a bua jaana ka Modimo: “Motswedi wa botshelo o ntse nao.” (Pesalema 36:9) E re ka o neilwe mpho eno, a ga wa tshwanela go bontsha fa o e itumelela?

Tsela e nngwe e re ka bontshang gore re a e itumelela ka yone ke ka go galaletsa Jehofa Modimo mo go ba bangwe. Ke ene Modiri wa letsatsi, ngwedi, pula, mowa o re o hemang le dijo tse re di jang. (Ditiro 14:15-17) “Neo nngwe le nngwe e e molemo, le se se molemo sengwe le sengwe se se tletseng, se tswa kwa godimo,” morutwa Jakobe o ne a rialo. (Jakobe 1:17) A o lebogela Modimo dimpho tseno? (Bakolosa 3:15) Ke tsela efe e nngwe e o ka supang tebogo ka yone go gaisa go bua ka Modimo?—Luke 6:45.

Totatota Modimo o laela gore re bue ka ene. Morwaawe, Jesu Keresete o ne a laela Bakeresete jaana: “Ke gone tsamayang, lo dire merafe yotlhe barutwa.” (Mathaio 28:19, 20) Basha le bone ba tshwanetse go nna le seabe mo tirong eno. Mopesalema o laela gore: “Bakang Jehofa . . . makau a na la basetsana; banna bagolo le banyana; a ba bake leina la ga Jehofa; gonne leina la gagwe ke lone losi le le goletsegileng; kgalalelo ya gagwe e godimo ga lefatshe le legodimo.” (Pesalema 148:7, 12, 13) Lefa go ntse jalo, ga o a tshwanela go leba tiro eno e le mokgweleo. Eleruri, ke tshiamelo—tota o ka nna mongwe wa “badiri mmogo le Modimo.”—1 Bakorinthe 3:9.

Mme go tweng fa o ikutlwa o inyatsa? Moperofeti Jeremia le ene o ne a ikutlwa fela jalo mo metlheng ya go kwalwa ga Baebele. O ne a re: “Ao, Jehofa Modimo! Bona, ga ke itse go bua, gonne ke ngwanyana fela.” Jehofa o ne a reng? “Se re: ‘Ke ngwanyana fela’; gonne le fa e le bomang ba ke tlaa go romang kwa go bone o na le go ya fela, mme le fa e le eng se ke se go laolelang, o na le go se bua fela.” (Jeremia 1:6, 7) Jeremia o ne a fetsa dingwaga tse 40 a dira fela jalo a thusiwa ke Jehofa!

Le ka Bakeresete gompieno, “Modimo ke one o o dirang gore re tshwanele sentle.” (2 Bakorinthe 3:5, NW) Tota lefa o le ditlhong ka tlholego, o tshaba batho, Modimo o ka go thusa gore o nne pelokgale go bua. Mo phuthegong ya Bokeresete go na le dithulaganyo tse di thusang motho go nna morutisi wa Lefoko la Modimo o o “tshwanelang sentle.” Fa o ikutlwa o tlhoka go thusiwa ka namana, ke eng fa o sa bue le mongwe wa balebedi mo phuthegong? Gongwe o ka tlhoka fela gore o thusiwe go nna le thuto ya gago ka namana ya Baebele kana o dire le mongwe yo o nang le maitemogelo.

Se O Ka Se Kgonang

Go bua ka Modimo go ka go dira gore o ikutlwe o kgotsofetse tota. Kana tota, bontsi jwa balekane ba gago ba ipotsa dipotso tse ba batlang dikarabo tsa tsone. Ba tlhoka go kaelwa e bile ga ba itse se isagwe e se ba tsholetseng. Ba ipotsa gore, ‘Ke go reng fa re le mono? Re ya kae? Ke eng fa lefatshe le tletse mathata jaana?’ Jaaka Mokeresete, o itse dikarabo tsa tsone e bile gongwe ke wena yo o ka kgonang thata go itsise balekane ba gago tshedimosetso eno. Ka gonne o lekana le bone, ba ka gololesega go bua le wena go na le go bua le batho ba ba godileng.

Ke boammaaruri gore ka dinako tse dingwe ba ka nna ba se ka ba go reetsa. Lefa go ntse jalo, go santse go ka nna le ba ba reetsang molaetsa wa gago wa Baebele. Mosha mongwe wa Mosupi o ne a le mo beseng a bala buka ya gagwe ya Dipotso Tse Basha Ba Di Botsang—Dikarabo Tse Di Nang Le Tharabololo.a Mosimane mongwe yo o neng a bapile le ene, o ne a simolola go e bala le ene. “Buka eno e ntle tota!” mosimane yono o ne a rialo. “Buka eno e bua thata ka Modimo. Batho ba le bantsi ga ba kgatlhegele bodumedi.” Mosha yono wa Mosupi o ne a dirisa tshono eo go buisana le ene thata ka leina la Modimo.

Gone ke boammaaruri gore, fa o ipolela gore o Mokeresete, o patelesega go itshwara jaaka ene. (1 Petere 2:12) Lefa go ntse jalo, fa o itshwara sentle jaaka Mokeresete, seno se tla dira gore batho ba reetse molaetsa wa gago. Akanya fela ka kgang ya mosha mongwe yo o bidiwang Eric. O ne a kgatlhiwa thata ke tsela e basha ba Basupi ba neng a itshwara ka yone kwa sekolong sa bone. Seno se ne sa mo dira gore a kgatlhegele go ithuta go le gontsi ka Modimo. Go ne ga simololwa thuto ya Baebele le ene, mme gompieno ke Mokeresete yo o kolobeditsweng yo o dirang kwa ntlokgolo ya lefatshe lotlhe ya Basupi ba ga Jehofa kwa New York.

Go bua ka Modimo go ka go thusa le wena! Go ka go sireletsa. Fa ditsala tsa gago di itse gore o mongwe wa Basupi ba ga Jehofa, bontsi jwa bone bo tla go tlotla. Ba ka nna ba tshaba go go rotloeletsa go dira dilo tse di sa siamang ka gonne ba lemoga gore o motho wa maitsholo a a kwa godimo le go itse gore o ka nna wa tsibogela seo ka go ba neela bosupi.

Lefa go ntse jalo, seno ga se bolele gore nako le nako fa o bua sengwe o bo o nopola dikwalo. O santse o tla kgatlhegela metshameko, diaparo, kana mmino, o tlotla le bone gangwe le gape ka tsone. Lefa go ntse jalo, gakologelwa: “Molomo o bua se se tswang mo botlalong jwa pelo.” (Mathaio 12:34) Fa e le gore o rata Modimo thata, go tla itlela fela gore o bue ka ene. Mo tokololong e e latelang re tla tlhalosa gore o ka dira seno jang ka tsela e e nang le matswela.

[Ntlha e e kwa tlase]

[Setshwantsho mo go tsebe 15]

A o tlhabiwa ke ditlhong fa ba o tsenang sekolo le bone ba go bona o le mo tirong ya go rera phatlalatsa?