Lefatshe Le ne Le Ntse Jang Dingwaga Tse 50 Tse di Fetileng?

AO MOGOLO mo o kgonang go gakologelwa kafa lefatshe le neng le ntse ka teng ka 1945? Le ne le santse le simolola go iphodisa dintho tsa Ntwa ya Lefatshe II e e neng ya simolola ka 1939 fa Boritane le Fora di ne di simolola ntwa le Jeremane ka gonne Ba-Nazi ba ne ba gapile Poland. Fa e le gore o monnye mo o sa gakologelweng seo, a o gakologelwa ntwa ya kwa Korea e e neng ya tlhagoga ka 1950? Kgotsa ntwa ya kwa Vietnam e e neng ya lowa go tloga ka 1950 go fitlha ka 1975? Kgotsa ntwa ya kwa Kuwait e e neng ya simololwa ke Iraq ka 1990?

A ga o gakgamadiwe ke gore fa re boeletsa ditiragalo tsa go tloga ka Ntwa ya Lefatshe II, re fitlhela di tletse ka dintwa tse di ileng tsa bakela dimilionemilione tsa batho masetlapelo le pogo le tse di ileng tsa bolaya dimilionemilione tse dingwe tsa batho? Ke matswela afe a Ntwa ya Lefatshe II e ileng ya a tlogelela batho ka nako eo?

Matswela a Ntwa ya Lefatshe II

Go ne ga bolawa batho ba ka nna dimilione di le 50 mo Ntweng ya Lefatshe II, mme ka 1945, dimilionemilione tsa batshabi di ne di kgarakgatshega mo Yuropa yotlhe, di leka go boela kwa magaeng a tsone mo ditoropong tse dikgolo le tse dinnye tse di neng di sentswe ke dibomo le go leka go aga matshelo a tsone sesha. Dikete di le makgolokgolo tsa basadi le basetsana, segolobogolo ba kwa Russia le Jeremane, di ne di leka go iphodisa matsadi a go betelelwa ke masole a a neng a tlhasela metse ya bone. Kwa dinageng di le dintsi tsa Yuropa batho ba ne ba lekanyediwa dilwana tse ba neng ba ka nna le tsone—dijo le diaparo di ne di tlhaela. Dikete di le makgolokgolo tsa batho ba e kileng ya bo e le masole di ne di senka ditiro. Dimilionemilione tsa batlholagadi le dikhutsana di ne di le mo khutsafalong ya go swelwa ke banna le batsadi.

Bajuta ba ne ba santse ba akanya ka Polao ya Kgailo e e neng ya bolaya Bajutakabone ba le dimilionemilione le kafa ba ka atisang losika lwa bone ka gone. Dimilionemilione tsa batho—go tswa Amerika, Boritane, Fora, Jeremane, Russia le dinaga tse dingwe—ba ne ba swa mo ntweng eo. Batho ba le bantsi ba ba neng ba ka nna ba tsala bana ba ba nang le ditalenta tse di farologaneng ba ne ba ka se ka ba kgona go dira jalo ka ntlha ya mabaka a dipolotiki le a kgwebo a mebuso e megolo le babusi ba yone.

Dinaga di le dintsi di ne di swafaditswe thata jaana ke Ntwa ya Lefatshe II mo e bileng maikaelelo a tsone a magolo e neng e le go tsosolosa maemo a tsone a ikonomi. Dijo di ne tsa tlhaela thata mo Yuropa dingwaga di sekae morago ga ntwa. Le mororo Spain e ile ya se ka ya nna le seabe mo Ntweng ya Lefatshe II, e ne e amilwe thata ke ntwa ya teng ya semorafe (1936-39) le dikiletso tsa kgwebisano—go ne go santse go dirisiwa dibuka tsa go lekanyetsa batho dijo go fitlha ka June 1952.

Kwa Botlhabakgakala batho ba Burma, China, Philippines le ba dinaga tse dingwe tsa Botlhaba, ba ne ba santse ba gakologelwa bosetlhogo jo ba bo diretsweng ke Bajapane. Le mororo United States e ne e le yone e fentseng ntwa eo, e ne e swetswe ke masole a yone a ka nna 300 000, mo e ka nnang halofo ya one a ne a swela mo karolong e go neng go lwelwa kwa go yone ya Pacific. Kwa Japane, baagi ba teng ba ne ba tshelela mo lehumeng, ba aparetswe ke thiibi e bile ba lekanyediwa dijo.

Boikuelo Jwa ga Churchill Jwa Gore go Tsewe Kgato

Fa a ne a eme batho ba Boritane ka lefoko ka May 13, 1945, Tonakgolo Winston Churchill o ne a bua jaana mo puong ya gagwe ya phenyo, fa Ntwa ya Lefatshe II e ne e tloga e fela kwa Yuropa: “Ke eletsa gore mo maitseboeng a gompieno nkabo ke lo raya ke re matshwenyego le mathata a rona a fedile. . . . Ke rata go lo tlhagisa . . . gore re santse re emetswe ke tiro e ntsi go e dira e bile lo tshwanetse go ipaakanyetsa go akanya le go dira le go intsha setlhabelo thata.” Fa a ne a bonela dilo pele e bile a solofetse gore Bokomonisi bo ile go anama le lefatshe, o ne a re: “Mo kontinenteng eno ya Yuropa re santse re tshwanetse go tlhomamisa gore . . . ga go fetolwe bokao jwa boammaaruri jwa mafoko ‘kgololesego’, ‘temokerasi’, le ‘kgololo’ go ya kafa re a tlhaloganyang ka teng.” Morago ga moo o ne a dira boikuelo jono jo bo gwetlhang: “Gatelang pele, lo tlhomame, lo sa fapoge, lo le pelokgale go fitlha lo wetsa tiro eno le go fitlha lefatshe lotlhe le babalesegile e bile le le phepa.”—Mokwalo o o sekameng ke wa rona.

Sephatlo sa Lekgolo la Dingwaga la Dintwa le Dintsho

Fa a ne a bua ka 1992, Mokwaledikakaretso wa Lekgotla la Ditšhaba Tse di Kopaneng, Boutros Boutros-Ghali o ne a dumela gore “fa e sale Lekgotla la Ditšhaba Tse di Kopaneng le tlhongwa ka 1945, go ile ga nna le dintwa tse dikgolo di feta 100 tse di bolaileng dimilione di ka nna 20 tsa batho mo lefatsheng lotlhe.” Fa makasine wa World Watch o sena go umaka palo e e kwa godimonyana ga eno ya batho ba ba suleng, o ne wa bolela jaana: “Leno e nnile lekgolo la dingwaga le le neng le na le kagiso e nnye go a gaisa otlhe.” One makasine ono o ne wa nopola modiradipatlisiso mongwe a bolela gore “go ile ga swa batho ba le bantsi mo dintweng tsa lekgolo leno la dingwaga go gaisa palo ya ba ba suleng mo hisitoring yotlhe ya motho e kopantswe. Dimilione di le 23 tsa batho bao ba ba suleng, di ile tsa swa fa e sale ka Ntwa ya Lefatshe II.”

Lefa go ntse jalo, The Washington Post, e ne ya bega palo e nngwe gape e e neng e e fopholetsa: “Fa e sale Ntwa ya Lefatshe II e fela, go ile ga lowa dintwa di ka nna 160 mo lefatsheng lotlhe tse di neng tsa bolaya masole a le dimilione tse 7 le baagi ba le dimilione tse 30. Mo godimo ga moo, go ile ga nna le batho ba ba gobalang, ba ba betelelwang le ba ba neng ba patelesega go nna batshabi.” Seno ga se akaretse dimilionemilione tsa batho ba ba ileng ba tlhaselwa ke dinokwane mo lefatsheng lotlhe mo dingwageng tse 50 tse di fetileng!

Gone jaanong ka 1995, re santse re bona dintwa tse di bakwang ke letlhoo le legolo tse mo go tsone go sa sweng fela masole a a dumetseng go lwa, mme gape go swa diketekete tsa baagi mo Afrika, kwa dinageng tsa Balkan, kwa Botlhabagare le Russia.

Ka gone, a mo dingwageng di le 50 morago ga 1945, re ka re “lefatshe lotlhe le babalesegile e bile le phepa”? Ke kgatelopele efe e motho a e dirileng gore lefatshe la rona e nne lefelo le le babalesegileng le le le siametseng gore go ka tshelwa mo go lone? Re ithutile eng mo dingwageng tseno tse 50? A motho o kgonne go gatela pele mo dilong tse di leng botlhokwatlhokwa—mekgwa e mentle, boitsholo jo bontle, go itse se se siameng le se se phoso? Ditlhogo tse pedi tse di latelang di tla araba dipotso tseno. Setlhogo sa bonè sone se tla tlotla ka se rotlhe re ka se solofelang mo motseng ono wa rona mo isagweng.

[Lebokoso mo go tsebe 4]

Go Gopola Motlha wa Morago ga Ntwa ya Lefatshe II

Moesemane mongwe yo jaanong a leng mo dingwageng tsa bo60 o gakologelwa jaana: “Bogologolo mo dingwageng tsa bofelo tsa bo1940 re ne re sena thelebishene mo gae. Radio e ne e le yone selo se segolo se se neng se dira gore re bone dilo ka leitlho la mogopolo. Fa ke santse ke tsena sekolo, ke ne ke tlhola ke boloka mogopolo wa me o le matlhagatlhaga ka go bala le go dira tiro ya ko gae ya sekolo. Ke ne ke ya baesekopong gangwe fela mo kgweding. Fa go le Matlhatso ke ne ke tlhola ke tsamaya dikilometara di le mmalwa ka baesekele go ya go lebelela setlhopha se ke se ratang sa kgwele ya dinao. Ke malapa a sekae fela a a neng a kgona go nna le koloi kana founo. Fela jaaka dimilionemilione tse dingwe tsa batho ba Boritane, re ne re sena phaposi ya go tlhapela. Ntlwana ya boithomelo e ne e le kwa ntle, mme bata ya go tlhapela e ne e le mo kitšhing e gape e neng e le phaposi ya go tlhapela. Ka nako ya ntwa re ne re tshela ka dijo tse di omisitsweng—mae, mashi le ditapole tse di sitsweng. Maungo a a jaaka dinamone le dipanana e ne e le dijo tsa maemo tse di neng di jewa ka sewelo. Fa di ne di goroga kwa lebenkeleng la merogo, batho ba ne ba itlhaganelela go ya go dira mela e meleele gore ba reke di sekae. Basadi ba le bantsi ba ne ba tshwanelwa ke go bereka mo madirelong a marumo a ditlhobolo. Ka nako eo batho ba ne ba sa itse diphetogo tse dikgolo tse di neng di ba letile—lefatshe la dithelebishene, dibidio, dikhomputara, cyberspace, go tlhaeletsana ka fax, go sutlha lefaufau le go fetola dijini.”