Basha ba Botsa Jaana . . .

Nka Nna Tsala ya Modimo Jang?

“BOIKANYEGO.” “Boineelo.” Ano ke mafoko a gantsi batho ba a dirisang go tlhalosa lorato lwa bone go ditsala tsa bone tse ba di ratang thata. A o ne o itse gore mafoko ano gape a ka tlhalosa lorato lo o nang le lone go Mmopi yo Mogolo wa lobopo lo lo gakgamatsang—gore Modimo ka boene e ka nna tsala ya gago e e go ratang thata? Ee, Baebele e bua ka go nna le poifomodimo, mme lereo leo ga le akaretse fela go ikoba mme gape le akaretsa go rata Modimo thata, o mo rata jalo ka gonne o mo anaanela.

Ditlhogo tse di fetileng tsa metseletsele eno di bontshitse gore lorato lo lo ntse jalo lo a kgonega e bile lo solegela molemo.a Mme lefa go ntse jalo, o ka dira jang gore o tsalane thata jalo le Modimo? Ga se selo se o tsalwang ka sone kgotsa se o se gotsang mo batsading ba ba boifang Modimo. Go na le moo, ke selo se se tseelwang matsapa a mmatota. Moaposetoloi Paulo o ne a raya Timotheo wa lekau a re a ‘itshikinye mo poifomodimong.’ Ee, o ne a tshwanetse go tsaya matsapa a a tshwanang fela le a a tsewang ke moatleletiki fa a ikatisa! (1 Timotheo 4:7, 8, 10) Le wena o tshwanetse go dira jalo fa o batla gore Modimo e nne tsala ya gago. Mme gone o ka simolola jang go ikatisa ka tsela eno?

Go Itse Modimo ka Namana

E re ka poifomodimo e tswa mo pelong, o tshwanetse go tlatsa pelo ya gago ka kitso ya Modimo. Ka maswabi, fa basha ba ba fetang 500 ba bodiwa gore “O bala Baebele ga kae o le nosi?” diperesente di le 87 di ne tsa re “ka dinako dingwe,” “ka sewelo fela,” kana “le e seng.” Basha ba le bantsi ka gongwe ba akanya gore go bala Baebele go a lapisa e bile ga go monate. Mme ga go a nna jalo! Akanya ka se: Ke ka ntlha yang fa basha bangwe ba tshwarelela tshedimosetso e ntsintsi ya metshameko ka tlhogo kana ba ithuta mafoko a dipina tse ba di ratang? Ke ka gonne ba rata dilo tseo. Go ithuta Baebele le gone go monate fa o go kgatlhegela thata. (1 Timotheo 4:15) Moaposetoloi Petere o ne a rotloetsa jaana: “Lo tlhologelelwe maši a semowa a a se nang boferefere.” (1 Petere 2:2) Ee, o tshwanetse go tlhologelelwa kana o godise kgatlhego e e ntseng jalo mo Dikwalong. Seno se ka nna sa tlhoka matsapa, mme matswela a teng a molemo tota.b

Selo sa botlhokwa ke gore go bala le go ithuta Lefoko la Modimo le dikgatiso tse di theilweng mo Baebeleng go tla go senolela “bontle jwa ga Jehofa.” (Pesalema 27:4) Mokeresete mongwe yo mosha yo o bidiwang Amber o ne a ipeela mokgele wa gagwe go bala Baebele yotlhe. Seno se mo tsere lobaka lo lo ka dirang ngwaga. Amber o tlhalosa jaana: “Ga ke dumele gore go na le dilo tse dintsi mo botshelong jwa me tse di ntlhokang nako e ntsi le maiteko mme di lere dituelo tse dintsi jaana. Fa ke ne ke e bala, ke ne ka ikutlwa e kete Jehofa o ne a mpeile mo diropeng tsa gagwe jaaka rre a nthuta. Ke ithutile go le gontsi ka Jehofa—dilo tse di dirang gore ke mo rate thata mme di ntire gore ke mo tlotle botshelo jotlhe jwa me.”

Fa o bala Baebele, o ithuta ka ditiragalo tse dintsi tse Modimo ka boikanyego a neng a nonotsha ditsala tsa gagwe ka tsone. (Pesalema 18:25; 27:10) O lemoga gore melao ya gagwe ka dinako tsotlhe e molemo bogolo e bile e re siametse ka gale. (Isaia 48:17) Go bala ka dinonofo tsa Modimo tse di ka se lekanngweng le dipe, tse di jaaka lorato le botlhale jwa gagwe, di go tlhotlheletsa go mo etsa. (Baefeso 5:1) Mme lefa go ntse jalo, gore tshedimosetso eno e go tlhotlheletse, o tshwanetse go tlhatlhanya ka yone. Fa o ntse o bala, ipotse: ‘Seno se mpolelelang ka Jehofa? Nka dirisa seno jang fa ke akanya le mo ditirong tsa me? Ke jang seno se bontshang gore Modimo ke tsala ya mmatota e nka nnang le yone?’

Kitso eo o e bonang ka Modimo fa o ithuta ka namana le kwa phuthegong e tla go thusa go mo rata thata ka tsela e nngwe. Seane sa Sefora sa re: “Ke ditsala tsa boammaaruri fa fela di akanya ka go tshwana.” Mme ke jang o ka “akanyang ka go tshwana” le Modimo? Denise yo mosha o tlhalosa jaana: “Fa o ithuta le go batlisisa ka mo go oketsegileng ka kgang e e rileng, o bona ka moo Jehofa a lebang kgang eo ka gone. Go a thusa fa o itse ka moo a ikutlwang ka gone ka sengwe se se rileng.”

Boitshwaro jo bo Siameng bo Botlhokwa

Modimo o tlhopha fela ba ba tlotlang melao ya gagwe ya boitshwaro go nna ditsala tsa gagwe. Diane 3:32 ya re: “Leoma la gagwe le na le yo o thokgameng.” Mosha yo o lwelang go thokgama o tla “ela tlhoko go sepela mo molaong wa ga Jehofa.” (2 Dikgosi 10:31) Boitshwaro jo bo ntseng jalo jwa kutlo bo tla lere motho gaufi le Modimo go le kana kang? Jesu Keresete o ne a re: “Rre o tlaa mo rata, mme re tlaa tla mo go ene, re dira bonno jwa rona mo go ene.” (Johane 14:21-24) A bo seo e le setshwantsho se se nametsang pelo jang ne! Akanya fela, batho ba babedi ba bagolo thata mo lobopong ba gopola le go tlhokomela motho ka metlha! Seno se tla diragala ka wena fa o ela tlhoko gore o tsamaya mo melaong ya ga Jehofa.

A go thokgama go raya gore jaanong o tshwanetse go itekanela? Le e seng! Go dira phoso ka ntlha ya go bo o le bokoa ga go reye gore o latlhile ‘tsela ya ditaolo tsa Modimo.’ (Pesalema 119:35) Ela tlhoko se Baebele e re bolelelang sone ka Kgosi Dafite. Le mororo e ne e le tsala e e ikanyegang ya Modimo, o ne a dira diphoso tse di masisi ka ntlha ya bokoa. Lefa go ntse jalo, Jehofa o ne a bolela gore o ne a sepela “mo boitekanelong jwa pelo le mo thokgamong.” (1 Dikgosi 9:4) Kgosi Dafite o ne a bontsha boikwatlhao jwa mmatota mo phosong nngwe fela eo a neng a e dira mme o ne a leka thata go dira se se itumedisang Modimo.—Pesalema 51:1-4.

Lefa Dafite a ne a rata Modimo, o ne a itse gore go bokete jang ka dinako dingwe go dira se se siameng. Ke gone ka moo a neng a kopa Modimo jaana: “Ntsamaisa mo boammaaruring jwa gago.” Ee, o ne a godisa poifo ya gagwe e e tshwanetseng kana a tshaba go kgopisa Modimo. Ke gone ka moo Dafite a neng a ka re: “Maoma a ga Jehofa a na le ba ba mmoifang.” (Pesalema 25:5, 14) Poifo eno ga se go tshaba gore Mmopi o tla go tlhagisetsa kotsi, go na le moo, ke go mo tlotla thata le poifo e e molemo ya go mo utlwisa botlhoko. Poifo eno e e siameng ke motheo wa boitshwaro jo bo siameng. Go tshwantsha seno, ela tlhoko sekai sa mosha mongwe wa Mokeresete yo o bidiwang Joshua.

Joshua o ne a amogela lekwalo le le tswang kwa mosetsaneng mongwe yo o tsenang sekolo le ene a re o a mo kgatlhegela mme o batla go “ratana” le ene. Lefa Joshua a ne a mo kgatlhegela, o ne a lemoga gore go tsalana le motho yo o sa dumelang go ka dira gore a wele mo boitsholong jo bo sa siamang mme a senya botsala jwa gagwe le Jehofa. Ka jalo o ne a mmolelela ka phepafalo gore ga a na kgatlhego! Moragonyana fa a ne a bolelela mmaagwe ka moo a neng a rarabolola bothata joo ka teng, o ne a kua jaana kwantle ga go akanya: “Joshua, gongwe o mo utlwisitse botlhoko!” Joshua o ne a fetola jaana: “Mme gone Mma. Nka mpa ka utlwisa ene botlhoko go na le gore ke utlwise Jehofa botlhoko.” Poifo ya gagwe e e siameng, le go tshaba go utlwisa Tsala ya gagwe ya legodimo botlhoko, e ne ya mo tlhotlheletsa go nna a thokgame.

Senka Ditsala Tse di Molemo

Lefa go ntse jalo mosha mongwe yo o bidiwang Lynn, o ne a nna a tsena mo mathateng. Bothata e le eng? O ne a itsalantse le batho ba ba sa siamang. (Ekesodo 23:2; 1 Bakorinthe 15:33) Tharabololo e ne ya nna efe? Go bona ditsala tse di ntšha! Lynn o ne a konela ka gore: “Fa o na le ditsala tse di ratang Jehofa, go go thusa go nna le segakolodi se se bosisi le go tila mathata. Fa ba tlhalosa kafa ba tenwang ke go dira boleo ka teng, go go dira gore le wena o ikutlwe ka tsela e e tshwanang.”

Tota e bile, go nna le ditsala tse di sa siamang ke gone go ka go kgoreletsang mo go nneng tsala ya Modimo. Ann wa dingwaga tse 18 o ne a dumela jaana: “Ditsala tsa gago di ka go tlhotlheletsa thata. Go ise go ye kgakala o tla bo o tshwana le tsone. Ba go tlhotlheletsa gore o akanye jaaka bone. Gongwe ba ka rata go bua thata ka tlhakanelodikobo. Go ka nna ga go dira gore o batle go utlwa. O ipotsa gore go utlwala jang.” Ann o ne a ithuta seno ka tsela e e botlhoko. A re: “Ke a itse gore seno ke boammaaruri. Ke ne ka tsenelela mo boitsholong jo bo sa siamang mme ka ima ke le dingwaga tse 15.”

Kgabagare Ann o ne a lemoga boammaaruri jwa mafoko ano a Baebele: “Ke gone, yo o ratang go nna tsala ya lefatshe, o itira mmaba wa Modimo.” (Jakobe 4:4) Ee, Ann o ne a batla—mme a ititaya sehuba go nna—tsala ya lefatshe. Mme lefa go ntse jalo seno sa mo leretse mahutsana a a latelanang. Ka lesego, Ann o ne a itharabologelwa. O ne a ikwatlhaela ditsela tsa gagwe mme a batla thuso go batsadi ba gagwe le go bagolwane mo phuthegong ya gaabo. Gape a iponela le ditsala tse disha. (Pesalema 111:1) Morago ga go dira maiteko a a tseneletseng, Ann o ne a boa a nna tsala ya Modimo. Jaanong, dingwaga di le dintsi morago ga moo, a re: “Ke tsalana thata le Jehofa.”

Ka thuto ya motho ka namana ya Baebele, go tlhatlhanya, go nna o thokgame le ditsala tse di molemo, le wena o ka tlhagolela go tsalana thata le Modimo. Lefa go ntse jalo, go boloka botsalano joo ke kgang e nngwe. O ka dira seno jang go sa kgathalesege mathata le makoa a motho ka namana? Setlhogo se se latelang mo metseletseleng eno se tla tlotla ka seno.

[Dintlha tse di kwa tlase]

[Setshwantsho mo go tsebe 24]

A ditsala tsa me di tla nthusa go nna tsala ya Modimo?