Dizuu—A ke Tsone Fela Tse Ditshedi Tsa Naga di di Ikantseng?

BOSHENG jaana go nnile le phetogo e kgolo thata mo dizuu tsa lefatshe tse di gatetseng pele. Jaaka bosupi jo bo bonalang, ba agile sesha mafelo a di bontshang diphologolo mo go one tumalanong le kgopolo e e siameng ya “popego ya naga e e baakantsweng sentle”—go etsa tikologo ya diphologolo ya tlholego, e e tletseng ka dimela, maje, mefine, mouwane, medumo le e leng diphologolo le dinonyane tse dingwe tse di tshelang mmogo. Le fa seno se ja madi a mantsi—go dirisiwa didolara di ka nna dimilione di le 1200 (diranta di le dimilione di le 5600) mo go tlhabololeng dizuu le diakwariamo ngwaga le ngwaga kwa United States fela—diphetogo tseno di tsewa e le tse di tlhokegang ka ntlha ya seabe se sesha se dizuu di ikaeletseng go se dira.

Tiro ya Lekgolo le le Latelang la Dingwaga

E re ka ditshedi di tloga di nyelela tsotlhe mo polaneteng eno, dizuu tse dikgolo mo lefatsheng di tlhalosa fa go somarela ditshedi, thuto le patlisiso ya saense e le tiro ya tsone ya lekgolo la bo21 la dingwaga. Dizuu tse dingwe ka ntlha ya kgwetlho eno le go bo e di tlhoka gore di akofe, di setse di latlhile leina la zuu gotlhelele, go na le moo di rata maina a a jaaka “botshabelo jwa ditshedi tsa naga” kgotsa “paraka ya pabalelo.”

Kgatiso e e di eteletseng pele mo go seno ke ya The World Zoo Conservation Strategy. Mokwadi mongwe o tlhalositse Strategy e le “buka e e botlhokwatlhokwa go gaisa tsotlhe tse dizuu di kileng tsa e kwala,” sentlentle, ke buka ya ditshwanelo ya dizuu; e “tlhalosa maikarabelo le ditshono tsa dizuu le diakwariamo tsa lefatshe malebana le go somarela mefuta e e farologaneng ya ditshedi tsa naga mo lefatsheng lotlhe.” Strategy e ne ya oketsa jaana e le go tlosa dipelaelo dipe fela ka thulaganyo eno e ntšha: “Gore dizuu kana diakwariamo di tswelele pele di le teng totatota go ikaegile ka seabe se di nang le sone mo go somareleng ditshedi tsa naga.”

Go ruta setšhaba le dipatlisiso tsa saense, segolobogolo malebana le go tsadisa diphologolo tse di ageletsweng, di botlhokwa thata mo tirong eno ya tsone e ntšha. Gareng ga basha ba gompieno go na le ba ba tlileng go nna batlhokomedi ba dizuu mo isagweng, ba ba tla nnang le boikarabelo jwa go boloka masalela a a faloditsweng a lenaane le le golang la mefuta ya ditshedi e e nyelelang mo nageng. A ba tla dira tiro eno e e botlhokwatlhokwa ka botlhale le ka boineelo? Mme a batho ka kakaretso ba tla leba dilo tsa tlholego ka tsela e e supang gore ba na le kitso? Ka ntlha ya seno, Strategy e kgothaletsa zuu nngwe le nngwe go tshwarega mo tirong ya go ruta, e ipone e na le seabe mo “tirong ya lefatshe lotlhe ya go lemotsha batho.”

Dizuu di a Kopana go Nna Lekgotla le le Lengwe mo Lefatsheng Lotlhe

Ka ntlha ya bogolo jwa tiro ya tsone, bontsi jwa dizuu di a kopana go nna lekgotla le le lengwe mo lefatsheng lotlhe, le gone jaanong le akaretsang dizuu di ka nna 1000. Mekgatlho ya boditšhabatšhaba e e jaaka The World Zoo Organization le International Union for the Conservation of Nature and Natural Resources, e dira dizuu tseno selo se le sengwe e bile e di thusa go dirisana mmogo le go di neela kaelo.

Buka ya Zoo—The Modern Ark fa e bontsha lebaka le le pateletsang gore go nne le tirisanommogo e e ntseng jalo ya re: “Fa sekukuni se se sa lemotshegeng, e leng go tsadisa diphologolo tsa mofuta o o tshwanang fela, se ne se ka fokodiwa, seo se ne se tla dira gore zuu e se ka ya tlhola e kgotsofalela go tlhokomela fela setlhotshwana se sennye sa, ka sekai dinkwe tsa Siberia. Go na le moo, dinkwe tsotlhe tsa Siberia tse di ageletsweng mo dizuu tsotlhe mo kontinenteng e e rileng—kana le e leng mo lefatshe lotlhe—di tshwanetse go tsewa e le selo se le sengwe.” Eleruri, go tlhokega makgolokgolo a mofuta mongwe le mongwe wa ditshedi e le gore go fokodiwe kana go fedisiwe go tsadisa tsa lefelo le le lengwe fela—e leng sone selo se se dirang gore diphologolo di se ka tsa tsala le gore di nyelele—mme go phepafetse gore seno se ka se kgone go dirwa ke zuu e le nngwe fela. Strategy ya re: “Matsapa a magolo ao a go kgobokanya gotlhe mo go leng teng, a a tlhokega e le gore re neye tikologo eno ya Lefatshe la rona . . . tshono e e ka tswang e le teng ya gore e tswelele pele e le teng. Go na le batho ba le bantsi ba ba dumelang gore fa re ka retelelwa ke go boloka mefuta e mengwe ya ditshedi re tla retelelwa ke go ipoloka.” Gone mme, boikutlo jono jo bo senang tsholofelo ga bo tseye tsia tsholofetso ya Baebele ya lefatshe le le baakantsweng la paradaise.—Tshenolo 11:18; 21:1-4.

Dilo Tse di ka Thusang Dizuu go Atlega

Bothata jono jwa go nyelela ga ditshedi bo dirile gore go tlhamiwe dilo tsa boranyane jwa maemo a a kwa godimo tse di fitlhelwang mo dinageng tse dintsi go thusa mo go tsadiseng diphologolo tse di ageletsweng: dibuka tsa masika a diphologolo tse di jaaka International Zoo Yearbook (IZY), le lekgotla la dikhomputara la International Species Information System (ISIS).

Buka nngwe le nngwe ya masika a diphologolo e thathamisa tshedimosetso ka mofuta mongwe le mongwe wa diphologolo tsotlhe tse di mo dizuu, gongwe le gongwe mo di leng teng mo lefatsheng. E re ka e le rekoto ya dinaga tse dintsi, e ka thusa gore go kgobokanngwe dijini tse di molemo tsa mefuta e e farologaneng ya ditshedi le gore go fokodiwe ‘sekukuni se se sa lemotshegeng,’ e leng go tsadisa diphologolo tsa mofuta o o tshwanang fela. Zuu ya kwa Berlin e ne ya simolola go nna le buka ya ntlhantlha ya masika a diphologolo ka 1923 fa e ne e simolola go tsadisa wisent kgotsa nare ya Yuropa, e e neng e setse e nyeletse ka nako ya Ntwa ya Lefatshe I.

Go thusa go anamisa tshedimosetso ya saense mo lefatsheng lotlhe, e e jaaka dibuka tsa masika a diphologolo, IZY le tshedimosetso e e ka ga dipalopalo tsa ditshedi, ISIS e ne ya simolola go lomagangwa ka 1974 kwa United States. Mafaratlhatlha a yone a a ntseng a oketsega le mabolokelo a yone a tshedimosetso a a ntseng a gola go ya pele a thusa dizuu go dirisana mmogo le go dira gore kgopolo ya gore dizuu tsotlhe di nne selo se le sengwe e atlege.

Didirisiwa tsa thutotshelo tse dizuu di neng tsa itumelela go di dirisa di akaretsa go tshwantshanya di-DNA go ya ka dipopego tsa tsone, go tlosa namanyane ya phologolo mo popelong ya yone go e tsenya mo go ya phologolo e nngwe, go kopanya peo le lee ka tsela ya maitirelo le di-cryogenic (go gwamisa peo le namanyane e e santseng e le mo popelong ka serame). Go tshwantshanya di-DNA go ya ka dipopego tsa tsone go thusa dizuu go tlhomamisa sentle ka diperesente di le 100 gore phologolo e tsetswe ke efe, e leng selo se se botlhokwa thata mo go laoleng tsela e diphologolo tsa mofuta o le mongwe di tsadisiwang ka yone, tse di jaaka diphologolo tse di ratang go tsamaya di le motlhape tse go leng thata go lemoga gore e e rileng e tsetswe ke efe. Ka fa letlhakoreng le lengwe, go tlosa namanyane mo popelong ya phologolo go e tsenya mo go ya e nngwe le go kopanya peo le lee ka tsela e e itiretsweng, go akofisa lobelo lo diphologolo di ikatisang ka lone. Tsela e nngwe e di kgonang go dira seno ka yone ke ka go atolosa “botsadi” jwa ditshedi tse mefuta ya tsone e nyelelang. Dinamanyane tsa tsone di ka nna tsa tsenngwa mo dipopelong tsa diphologolo tse di bapileng thata le tsone ka losika—le e leng diphologolo tsa legae—tse jaanong e tla nnang tsone di di tsalelang bana. Mokgwa ono o dirile gore kgomo ya holstein e tsale gaur (kgomo ya naga) le katse ya legae e tsale katse ya sekaka ya kwa India e e leng mo kotsing ya go nyelela. Gape e fokotsa ditshenyegelo, dikotsi le mathata a a ka nnang a tlhaga fa go fudusiwa diphologolo tse di mo kotsing ya go nyelela. Se se tlhokegang fela ke gore go fudusiwe sephuthelwana sa namanyane e e santseng e le mo popelong kana peo tse di gwamesitsweng ka serame.

Ka ntlha ya go bo go na le kgonagalo ya gore mefuta mengwe ya ditshedi e nyelele gotlhelele, dizuu di le mmalwa di simolotse go dirisa saense ya di-cryogenic—go gwamisa peo le dinamanyane tse di santseng di le mo popelong ka serame e le gore di bolokiwe lobaka lo loleele. Dilo tseno tse di gwamisitsweng ka serame, di thusa gore go nne le tsholofelo ya gore bana ba diphologolo tseo ba tsalwe masomesome a dingwaga le e leng makgolokgolo a dingwaga di sena go nyelela! Le fa go na le dilo di le dintsi tse di sa tlhomamisiweng ka mokgwa ono, o ile wa kaiwa e le “one fela mokgwa wa go namola.”

Dipatlisiso Tsa Kwa Nageng di Thusa Dizuu go Dira Bana ba Bantsi

Patlisiso nngwe ya saense ya diphologolo e e akaretsang mekgwa ya tsone kwa mafelong a tsone a tlholego ke ya botlhokwa mo go tsadiseng diphologolo tse di ageletsweng, gape ke tsone tse di tlhotlheletsang gore ba leke go “etsa” mafelo a tsone a tlholego. E le gore diphologolo di nne di itekanetse le go ikoketsa, dizuu di tshwanetse tsa ela tlhoko mekgwa ya tsone ya tlholego le go di boloka di “itumetse.”

Ka sekai, letlotse le le tona le le le namagadi a nna a katogane mo nageng mme a golagana fela ka monko o o mo morotong le mo mantleng a one. Nko ya le le tona e a le bolelela ka nako ya fa le le namagadi le siametse go gwelwa mme le tlhola le lone fela letsatsi kana a mabedi. E ne ya re fa dizuu di sena go lemoga mokgwa ono, di ne tsa fetola mafelo a one gore a matonanyana a se ka a bonana le a manamagadi ntle fela le ka nako e khutshwane ya go gwelana ga one, mme seno se ne sa thusa; a ne a nna le bana.

Le mororo go kgaoganya matlotse jalo go dira gore lorato lwa one lo tuke, ga go a nna jalo ka dinonyane tsa di-flamingo. Di gwelana fela fa di le dintsi e leng palo e ntsi go feta e dizuu di kgonang go nna le yone. Ka jalo zuu ya kwa Engelane e ne ya lekeletsa—e ne ya “oketsa gabedi” bogolo jwa segopa sa tsone ka go dirisa seipone se segolo. E ne ya nna la ntlha dinonyane tseo di bonwa di ikonka ka tsela ya tsone ya go batla go gwelana! A dikai tseno di go thusa go lemoga ka fa botshelo jwa ditshedi tsa naga tsa lefatshe bo raraaneng ka teng? Eleruri dizuu di lebane le kgwetlho e e boitshegang.

Mokgele wa go Boloka Diphologolo o Kgonega go le Kana Kang?

Go bontsha gore thulaganyo eno e ntšha e a atlega mefuta mengwe ya ditshedi tse di tsetsweng mo mafelong a a ageletsweng e setse e buseditswe mo mafelong a di tlholegileng kwa go one. Gareng ga tseno ke lenong la California, nare ya Yuropa le ya Amerika, phala ya Arabia, golden lion tamarin le pitse ya Przhevalski. Le fa go ntse jalo, go bonala ba se na tsholofelo ya gore seno se tla atlega ka lobaka lo loleele.

Strategy ya re: “Botshelo jwa batho bo raraane mme mathata a lefatshe a mantsi mo e leng gore le fa ba lemoga dilo tse disha ka tlholego le tikologo e bile ba simolola go amega thata ka tsone, ga ba ise ba kgone go emisa bontsi jwa ditiragalo tse di kgoreletsang.” Ka ntlha ya seno, e oketsa ka gore “basomarelatlholego ba tshwanetse go ipaakanyetsa mokgwa wa go itshokela nako e e masisi e e solofetsweng.” Ga go pelaelo gore, seno se tlhoka tirisanommogo ya mongwe le mongwe mo setšhabeng. Go ya ka mokwadi mongwe wa saense, tirisanommogo e e leng teng jaanong, e “tlhaela thata go feta ka moo e tlhokegang ka teng.” Fa e le gore mathata a a bakang go nyelela gono a fokotsega fela mme ga a fetoge, le e leng maiteko a a botlhokwa a ka nna a itaya sefololetse. Go tshwanetse ga agiwa mafelo a tsone a mmatota le a a di tshwanelang sentle—e seng fela mafelonyana a mannye, a a dirang gore go tsadisiwe fela diphologolo tsa mofuta o o tshwanang. Fa dizuu di sena go dira jalo, ke gone fela di ka kgonang go busetsa diphologolo tse di ikgodiseditseng tsone kwa nageng. A mme seo se ka kgonega kgotsa a ke toro fela?

Go thata le e leng go feta go dumela gore tharabololo e tla tla ka gore dizuu tsa lefatshe lotlhe di nne selo se le sengwe. Porofesa Edward Wilson a re: “Boammaaruri jo bo sa itumediseng ke gore dizuu tsotlhe tse di leng mo lefatsheng gompieno di ka kgona go nna le mefuta e le 2000 fela ya diamusi, dinonyane, digagabi le ditshedi tse di nnang mo metsing le mo lefatsheng”—palo e nnye tota. Ka jalo, dizuu di na le namane e tona ya tiro ya go swetsa gore ke mefuta efe e e tshwanetseng go tlhophiwa gore e bolokiwe fa e mengwe yone e tsena mo lenaaneng le leleele la e e nyelelang.

Mo go bomankge ba tsa go somarela tlholego, seno se tsosa potso e e sa itumediseng ya gore, Ka ntlha ya go ikaega ga ditshedi tse dingwe ka tse dingwe, ke leng mefutafuta ya ditshedi e tla fokotsegang go fitlha mo selekanyong se se masisi mo e leng gore seno se ka nna sa baka go nyelediwa ga bontsi jwa ditshedi tse di setseng mo lefatsheng, tse di akaretsang le motho? Se borasaense ba ka se dirang ke go fopholetsa fela. Linda Koebner a re mo go Zoo Book: “Go fedisiwa ga mofuta o le mongwe kana e le mebedi kana e le masome a matlhano go tla nna le diphelelo tse re ka se keng ra di bolelela pele. Dilo tse di nyelelang di dira phetogo le pele ga re tlhaloganya diphelelo tsa gone.” Go sa le jalo, buka ya Zoo—The Modern Ark ya re “dizuu e santse e le lone fela lefelo le le nosi le le namolang matshelo a ditshedi mo ntweng eno e lefatshe le e lwang ya go nyeletsa diphologolo e re sa kgoneng go bolelela pele gore e tla nna kgolo go le kae mme e le e dikokomana tsa mo isagweng di tlileng go re pega molato o mogolo ka ntlha ya yone.”

Ka jalo, a go na le motheo wa tsholofelo? Kgotsa a dikokomana tsa mo isagweng di tlile go iphitlhela di le mo lefatsheng le le senang ditshedi dipe, fa le tsone di ntse di letile gore di nyelele?

[Ditshwantsho mo go tsebe 7]

Motho ke mmaba wa tsone yo mogolo

[Motswedi wa Setshwantsho]

Tiger and Elephants: Zoological Parks Board of NSW

[Ditshwantsho mo go tsebe 8]

Diphologolo dingwe tse di nyelelang—nare, matlotse le tshukudu e ntsho

[Metswedi ya Ditshwantsho]

Bison and Cheetahs: Zoological Parks Board of NSW

Rhinoceros: National Parks Board of South Africa