Babegadikgang ba Russia ba Akgola Basupi ba ga Jehofa
DIKAGO tsa lekala la Basupi ba ga Jehofa ba Russia di ne tsa kgakolwa ka June 21, 1997. Kago eno e akaretsa mafelo a bonno a le supa, Holo ya Bogosi e kgolo, ntlo ya bojelo, kago e kgolo ya diofisi le lefelo la bobolokelo. E dikilometara di ka nna 40 kwa bokonebophirima jwa St. Petersburg, mo motseng wa Solnechnoye.
Babegadikgang ba ba neng ba laleditswe kwa thulaganyong eno ya kgakolo ba ne ba bega thata ka yone. Mongwe wa bone o ne a kwala jaana mo go Literaturnaya gazeta ya Moscow, e leng lokwalodikgang lo lo gatisiwang ka palo e e fetang kwatara ya milione: “Selo sa ntlha se motho a se lemogang fa a e bona ke, Ruri eno ke kago ya maemo a a kwa godimo!”—Bona senepe se se mo go tsebe 14 le 15.
Sergey Sergiyenko yo e leng mokwadi o ne a tlhalosa jaana: “Sengwe le sengwe fano se ne sa dirwa ke badumedi ba teng ka diatla tsa bone: Tiro ya go aga e ne e dirwa segolobogolo ke Ba-Finland, Ba-Sweden, Ba-Denmark, Ba-Norway le Bajeremane. Ditsela tse dintle tsa ditena; llono e e pomilweng; dikago tse di nang le marulelo a dithaele tse di kgabisitsweng, difensetere tse dikgolo, le dikgoro tsa galase—ke kafa kago ya botsamaise jwa mokgatlho wa bodumedi wa Basupi ba ga Jehofa ba Russia e leng ka teng.”
Go ne go laleditswe babegadikgang go tswa kwa Moscow e e dikilometara di le 650 kwa borwabotlhaba jwa lekala leno go tla kgakolong eno e bile ba ne ba thusiwa ka dipalangwa. Ba ne ba tsamaisiwa le dikago gore ba di bone, mme morago ga foo, go ne ga nna le nako ya dipotso le dikarabo e go neng go tla go jewa dijo tse di botlhoswana ka yone. Rre Sergiyenko o ne a kwala jaana go ya ka se a neng a se lemogile:
“Fela jaaka seane se bolela, Basupi ke batho ba ba bori le ba ba sa ikgantsheng . . . Fa ke dirisa mafoko a seane se se itsegeng thata sa Se-Russia, nkare, ‘Basupi ba tshela [mo legaeng leno la bone] jaaka e kete ba mo sehubeng sa ga Jehofa.’ . . . Ka metlha Basupi ke batho ba ba pelonomi mo bathong botlhe, mme gone, ba supa go amega thata ka bakaulengwe ba bone.”
Setlhogo sengwe se se kwadilweng ke S. Dmitriyev se ne sa gatisiwa mo Moskovskaya Pravda, lokwalodikgang lwa letsatsi le letsatsi lo lo gatisiwang ka palo e e ka tshwarang 400 000. Mo setlhogong seno sa gagwe se se reng “O ka Ikagela Lefatshe la Gago ka Diatla Tsa Gago,” mokwadi o ne a tlhalosa jaana:
“Morago ga fa mokgatlho wa bodumedi wa Basupi o sena go letlelelwa semolao mo Russia [ka 1991], go ne ga tsoga kgang e e malebana le go agiwa ga ntlokgolo ya bone. Ba ne ba batla setsha kwa Moscow fa go tshogana ka go utlwala gore setsha sa kampa ya basha e e gaufi le St. Pete[rsburg] se a rekisiwa. Ba ne ba reka setsha seno, mme ba simolola go aga. . . .
“Mo ngwageng le sephatlo e e fetileng, ka January 1, 1996, kago eno e e mo motsaneng wa Solnechnoye e ne ya nna ofisi ya lekala ya mokgatlho ono wa bodumedi. E ne ya re fa June a le fa gare, setlhopha sa babegadikgang ba Moscow sa nna le tshono ya go itshekatshekela ka bosone ka go fetsa nakonyana kwa St. Pete[rsburg], gore Basupi bano ba ga Jehofa ke bomang?”
Rre Dmitriyev o ne a araba jang potso eno? “Ke batho fela ba ba tlwaelegileng.” Le fa go ntse jalo, ba farologane, jaaka fa a ile a bolela jaana fa a ne a konela setlhogo sa gagwe: “Ba rata kagiso e bile ba tshedisana ka kagiso. A ke toro fela? Ee. Mme gone ba ntse jalo.”
Mokwaladikgang yo mongwe wa kwa Moscow e bong, Maksim Yerofeyev o ne a kwala mo Sobesednik, e leng lokwalodikgang lo lo gatisiwang ka palo e e fetang 300 000 a akgela jaana: “Go dirisana mmogo ga motsenyana ono go ikaegile ka molaomotheo ono: Ga go ope yo o patelediwang go bereka le fa go ntse jalo mongwe le mongwe o ithaopela go bereka.”
Fa Rre Yerofeyev a sena go bua ka lefelo le mogokaganyi wa Komiti ya Lekala e bong Vasily Kalin, a nnang mo go lone, o ne a akgela jaana: “Badirikarona ba bangwe ba babegadikgang ba ba neng ba na le dipelaelo ba ne ba batla go bona dikamore tse dingwe tse ba di itlhophetseng. Dikamore tsa ba bangwe di ne di sa farologane go le kalo ka bogolo le tebego le kamore ya ga Vasily Kalin e e rulagantsweng sentle ka bori.”
Mmegadikgang yo mongwe e bong Anastasiya Nemets, o ne a kwala setlhogo se se reng, “Go Tshela o Ritibetse Maikutlo.” Setlhogwana sengwe sa setlhogo seo sa Vechernyaya Moskva se ne se re “Seno ke se Batho ba Ithutang Sone Kwa Motsaneng Ono O o Sa Tlwaelegang o o Kwa Ntle ga St. Pete[rsburg].”
O ne a kwala jaana a tlhalosa lefelo le tebego ya kago eno ya lekala: “E dikaganyeditswe ke dikgwa le naga ya majang. Ga e kgakala le Kgogometso ya Finland. Go na le matlwana a a agilweng ka tsela ya Seyuropa, ditsela tse di phepa tse di dirilweng ka ditena le ditshingwana tsa ditšheshe tse di mebalabala.
“Difeme tsa kgwebo di agela ‘batho ba ba humileng ba Russia’ metsana e e ntseng jalo. Le fa go ntse jalo, mo motsaneng ono gone, go nna batho ba ba sa humang . . . Ba tshela monate mme se se botlhokwa thata ke gore, ba tshela mmogo jaaka ditsala. Go nna batho ba le 350 fela teng, ba ba tswang kwa dikarolong tsotlhe tsa lefatshe; motho o kgona go utlwa dipuo tse di farologaneng di buiwa—go tloga ka Se-Spain le Sepotokisi go fitlha ka Se-Finland le Se-Sweden.
“Totatota ono ke motsana wa batho ba ba tshelang mmogo: Motsana ono o na le mafelo a one a go betla le go baakanya dilo, a go dirwang sengwe le sengwe fela se lelapa leno le legolo la batho ba dipuo tse di farologaneng le ka se tlhokang; e bile ba na le tlileniki ya bone.”
Ruri kgakolo eno e ne e le tiragalo e e monate tota mo bathong ba le 1492 ba ba tswang kwa dinageng tse 42 ba ba neng ba le teng kwa Solnechnoye. Bontsi jwa ba ba neng ba le teng koo e ne e le batho ba ba neng ba dira koo masomesome a dingwaga a a fetileng ka nako e tiro ya go rera e neng e thibetswe ka yone. A o ka akanya fela kafa batho bano ba kgale ba neng ba gakgamala ka teng le kafa ba neng ba ipela ka teng fa ba ne ba bontshiwa dikago tseno tse dintle tse di agilweng mo setsheng seno se e keteng ke tshingwana sa diheketara di le 6,9? Go a utlwala go bo ba ne ba ka akanya gore ba a lora.
[Ditshwantsho mo go tsebe 22]
Babegadikgang ba bontshiwa dikago tsa lekala
Ka nako ya dipotso le dikarabo