Fa Dijo e le Mmaba wa Gago

Fa Jean a akanya ka nako ya fa a ne a le mo dingwageng tsa bolesome o gakologelwa sentle kafa a neng a sotlwa ka teng le go jewa setshego. Ka ntlha yang? E ne e le mosetsana yo moleele e bile a le mokima go ba feta botlhe mo tlelaseng ya bone kwa sekolong. Mme go ne go sa felele moo. Jean o bolela jaana: “Mo godimo ga gore ke ne ke le mokima, ke ne ke le ditlhong e bile ke itshoga fa ke na le batho ba bangwe. Gantsi ke ne ke jewa ke bodutu, ke batla gore ke amogelwe ke ba bangwe, mme gantsi ke ne ke ikutlwa ke le learogi.”

Jean o ne a tlhatswegile pelo gore ke mmele wa gagwe o o neng o mmakela mathata ano otlhe le gore go nna le mmele o mosesane, o o betlegileng go ne go tla rarabolola mathata a gagwe otlhe. Ga se gore Jean o ne a le mokima thata. Go na le moo, motho wa boleele jwa dimetara di le 1,83 le bokima jwa dikilogerama di le 66, nnyaa, o ne a se mokima. Le fa go ntse jalo, Jean o ne a ikutlwa a nonne, mme fa a ne a le dingwaga di le 23 o ne a swetsa gore a fokotse mmele. O ne a akanya jaana: ‘Fa ke le mosesane, batho ba bangwe ba tla batla gore ke nne ke ntse ke na le bone. Kgabagare, ke tla ikutlwa ke amogelesega e bile ke tsewa ke le botlhokwa.’

“Tsela eo ya boeleele ya go akanya e ne ya gogela kwa seraing se se tsereng dingwaga di le lesome le bobedi sa anorexia nervosa le bulimia,” Jean o tlhalosa jalo. “Ke ne ka nna mosesane wa utlwa, ke le mosesane mo ke batlileng ke swa, mme mo boemong jwa gore ke itumele mo botshelong, ke ne ka koafatsa botsogo jwa me mme ka ipakela go tshwenyega mo maikutlong le bohutsana jo bogolo tse di tsereng dingwaga tse di fetang lesome.”

GA SE Jean fela yo o nang le bothata jono. Go ya ka phopholetso nngwe, mosadi a le 1 mo go ba le 100 ba Baamerika o tshwarwa ke anorexia nervosa a sa ntse a le mo dingwageng tsa bolesome kana e le mosha yo o setseng a godile, mme gongwe batho ba palo eo e menagane gararo ba tshwerwe ke bulimia. Dr. Mary Pipher o bolela jaana: “Ke dirile mo dikolong le mo dikholetšheng ka dingwaga di le dintsi, mme ke iponetse ka matlho gore mathata a go ja a sa ntse a aname fela jalo.”

Gape a mefutafuta. Mathata ano a go ja a go kileng ga bo go akanngwa gore ke bothata jwa bahumi fela, jaanong ke bothata jwa batho ba merafe yotlhe, ba mefuta yotlhe le ba maemo otlhe a itsholelo. Tota le palo ya banna ba ba fitlhelwang ba na le bothata jono e ntse e oketsega, mo go dirileng gore makasine wa Newsweek o bitse mathata ano a go ja o re ke “batlhasedi ba ba sa tlhaoleng.”

Le fa go ntse jalo, se se tshosang thata ke gore dingwaga tsa batho ba ba alafelwang malwetse a a amanang le mathata a go ja go bonala di ntse di ya kwa tlase. “Go na le basetsana ba ba mo dingwageng tse di kwa tlase ga 10, tota le ba ba nang le tse 6, ba ba amogelwang mo ditheong tsa dipatela,” go bolela jalo Margaret Beck, e bong mokaedi wa nama o sa tshwere wa bookelo jwa malwetse a a amanang le bothata jwa go ja kwa Toronto. O oketsa jaana: “E sa ntse e le palo e nnye, mme gone e a oketsega.”

Ka kakaretso, malwetse a a amanang le mathata a go ja a ama dimilione tsa batho—segolobogolo basetsana le basadi ba basha.a “Ga ba akanye ka dijo kana go ja dijo ka tsela e bontsi jwa batho bo dirang ka yone,” go bolela jalo modirediloago mongwe e bong Nancy Kolodny. “Mo boemong jwa gore ba je fa ba tshwerwe ke tlala, ba jele gore ba bone dikotla le botsogo jo bontle, ba jele monate, kana ba jele go itumela le ba bangwe, ba leba dijo ka tsela e e sa tlwaelegang e bile ba dira dilo tse di sa tseweng gore di ‘tlwaelegile’—tse di jaaka go dira dilo dingwe tse di sa tlwaelegang pele ba ka ja, kana ba batle go ntsha dijo tse ba di jeleng mo mebeleng ya bone ka bonako fela fa ba se na go di ja.”

A re tlhatlhobeng malwetse a mabedi a a tlwaelegileng a a amanang le mathata a go ja: anorexia nervosa le bulimia nervosa.

[Ntlha e e kwa tlase]