Kgopolo E e Mo Baebeleng

Ke Eng se se Tlhotlheletsang Boloi?

“BALOI.” Lefoko leno le dira gore o akanye ka eng? A le dira gore o akanye ka basadibagolo ba ba maswe ba ba loyang ba bangwe kgotsa basadi ba ba se nang boitshwaro ba ba dirisanang le Satane? Go farologana le kgopolo eno e ba le bantsi ba nang le yone, baloi ba le bantsi ba motlha wa segompieno, ba ba ipolelang gore ke baloi, ba tshwana fela le batho ba ba tlwaelegileng. Bangwe ke barutegi ba ba tlotlegang, jaaka babueledi, barutabana, bakwadi, le baoki. Go tsogile mekgatlho e le mentsi ya bodumedi mo lefatsheng lotlhe e go bonalang e sekametse thata mo dilong tsa masaitseweng, jaaka mekgatlho e e dumelang mo tlhagong le ya mofuta o mosha wa boheitane.a “Mo malatsing ano o ka ya gongwe le gongwe fela kwa Russia mme o tla fitlhela boloi e le selo fela se se tlwaelegileng mo botshelong,” go ne ga bolela jalo modiredimogolo mongwe wa mapodise kwa nageng eo. Kwa United States go lekanyediwa gore go na le baloi kgotsa “Ba-Wicca,”b jaaka bangwe ba ipitsa, ba ka nna 50 000 go ya go 300 000.

Gompieno lefoko leno “moloi,” gantsi le dirisiwa gongwe le gongwe fela mme le ka bolela dilo tse di farologaneng mo bathong ba ba farologaneng. Go ntsifala ga boloi ga motlha wa segompieno go bonala go amana thata le mokgwa o o ntseng o anama wa bodumedi jwa go obamela medingwana ya sesadi, jo bo dumelang mo tlhagong e bile bo dumela thata le mo maatleng a e seng a tlholego. Baloi bangwe ba itirela ba le bosi—ba dira dingwao tsa bone tsa boloi ba le bosi, ba ela tlhoko go fetoga ga dipaka, dikarolo tse di farologaneng tsa ngwedi, le ditiragalo tse dingwe tsa tlholego. Ba bangwe ba obamela le go loya ba le setlhopha, gantsi e le setlhopha sa baloi ba le 13.

Ke boammaaruri gore gompieno boikutlo jo batho ba nang le jone ka boloi kwa dinageng tsa Bophirima, bo farologane thata le boikutlo jo bo neng jwa tlhotlheletsa batho go fisa baloi ka Metlha ya Bogare. Le fa go ntse jalo, nako le nako go sa ntse go tle go direge gore baloi ba tlhaselwe mo go maswe. Ka sekai, kwa Indonesia mo masimologong a October 1998, batho ba ba fetang 150 ba ba neng ba belaelwa gore ke baloi, ba ne ba lobelwa dintsi ke digopa tse di neng di tshotse melelema ya dithipa. Mo Afrika Borwa, go ne ga begwa dikgetsi di feta di le 2 000 tse di malebana le go tlhaselwa ga baloi, go akaretsa le dipolao di le 577, magareng ga 1990 le 1998. Ka ntlha ya go bo batho ba leba boloi ka ditsela tse di farologaneng thata jaana—bangwe ba bo rata, fa ba bangwe ba ila baloi—Bakeresete bone ba tshwanetse go bo leba jang?

Ditlhoko Tse di sa Kgotsofadiwang

Ke eng se se tlhotlheletsang batho go dirisa boloi mo motlheng wa gompieno? Ba bolela gore lengwe la mabaka ke go bontsha gore ba tlotla tlhago le botshelo. Tota e bile, bangwe ba tlhagafalela go tlhalosa gore kobamelo ya bone ga e akaretse go ntsha ditlhabelo tsa diphologolo mo dingwaong tsa bone. Ba bangwe ba bolela gore ba inaakanya le boloi ka gonne ba leka go senka batho ba ba ka bulelanang mafatlha le bone, ba ba ka ba ikanyang, le ba ba kgatlhegelang dilo tse di tshwanang le tsa bone tsa semoya. Moloi mongwe wa motlha wa segompieno o bolela jaana: “Batho botlhe ba ke ba itseng mo mokgatlhong ono wa boheitane ba botsalano e bile ba bua ka tshosologo . . . Ke batho ba ba siameng thata.” Mme ba le bantsi ba latola gore ba dirisana le Satane, ba bolela gore ga go na modimo yo o boikepo mo bodumeding jwa bone.

Mo go ba le bantsi ba bone lebaka la konokono le le dirang gore ba nne baloi, ke gore ba ikutlwa ba le lolea mo semoyeng le gore ba batla go ikgolola mo madumeding a magolo. Fa moperesiti mongwe yo mogolo wa mosadi wa bodumedi jwa Wicca e bong Phyllis Curott, a bua ka setlhopha sa gagwe sa baloi, a re: “Rotlhe re ne re sa kgotsofadiwe ke dithuto le ditiro tsa ditumelo tse re godiseditsweng mo go tsone.” Currott o tlhalosa gore baloi ba motlha wa segompieno ba leka go araba dipotso di tshwana le gore, ‘Re ka boa ra bona baitshepi jang gape?’ Le fa go ntse jalo, a boloi bo ka isa batho kwa bomoyeng jwa mmatota?

Bomoya Jwa Mmatota—Bo ka Bonwa Kae?

Baebele e bolela ka phepafalo gore Jehofa ke ene fela Modimo wa boammaaruri le Molaodimogolo wa Lobopo lotlhe. (Pesalema 73:28; 1 Petere 1:15, 16; Tshenolo 4:11) O laletsa batho botlhe gore ba mo senke “mme ruri ba [mo] bone.” (Ditiro 17:27) Ka jalo, bomoya jwa mmatota bo ka bonwa fela ka go anya kitso e e tlhomameng ka Modimo wa boammaaruri, Jehofa. Seno se ka dirwa ka go ithuta Lefoko la gagwe, Baebele e e Boitshepo. Mokwadi mongwe wa Baebele e bong Jakobe o re tlhomamisetsa jaana: “Atamelang Modimo, mme o tla lo atamela.”—Jakobe 4:8.

Le fa go ntse jalo, Lefoko la Modimo le tlhagisa kgatlhanong le motswedi mongwe o o sa siamang wa bomoya jo bo boikepo. (1 Johane 4:1) Le tlhalosa Satane Diabolo, mmaba yo mogolo wa ga Jehofa, le badimona ba gagwe e le motswedi wa bomoya jo bo tsietsang batho ba le bantsi gompieno le jo bo anameng thata.c Go ya ka Baebele, Satane “o [foufaditse] megopolo” ya batho ba le bantsi. Tota e bile o “[timetsa] lefatshe lotlhe le le nang le banni,” go akaretsa le ba ba inaakantseng le boloi—go sa kgathalesege gore a ba a dumela gore ba obamela Diabolo kgotsa nnyaa. Ke ka ntlha yang go le jalo?—2 Bakorintha 4:4; Tshenolo 12:9.

Ditlwaelo le dingwao di le dintsi tse di amanang le boloi jwa motlha wa gompieno di tshwana thata fela le dikarolo tse di sa tlwaelegang tsa kobamelo ya ga Satane. Ka gone, tota le se go tweng ke go batla go itse fela go go se nang kotsi, go ka dira gore motho a feleletse a dirisana le dilo tsa masaitseweng. Ee ruri, eno ke yone tsela e ba le bantsi ba wetseng mo seraing sa tlhotlheletso e e bosula ya ga Satane ka yone.

Ntlha e e sa tshwanelang go tlhokomologiwa ke gore batho ba ba dirisang boloi jwa motlha wa segompieno ba ngokwa ke jone ka gonne ba batla go nna le nonofo kgotsa go ipusolosetsa. Moloi mongwe wa motlha wa segompieno e bong Jennifer o ne a bolela jaana: “Go na le batho ba ba kgonang go ipitsa baloi mme ba bo ba bo dirisetsa maikaelelo a a bosula fela thata.” Le fa go ntse jalo, baloi ba ba nang le maikaelelo a bopelontle le ba ba batlang go ipusolosetsa botlhe fela ba mo kotsing ya go laolwa ka botlalo ke Satane le badimona. Baloi bangwe ba ka nna ba ganetsa gore meya e e ntseng jalo e e boikepo e teng, mme seno se dira gore ba tsiediwe motlhofo fela thata ke yone meya eno.—Bapisa 1 Bakorintha 10:20, 21.

Baebele e nyatsa go laola ka bola, boloi, go dirisa maselamose, go kolopa ba bangwe, le maiteko ape fela a go leka go buisana le baswi. E bolela jaana ka phepafalo: “Gonne le fa e le mang yo o dirang dilo tse, o makgapha mo go Jehofa.” (Duteronome 18:10-12) Gone mme, Bakeresete ba ikemiseditse go “[dira] se se molemo mo go botlhe,” mme ka bodiredi jwa bone ba thusitse batho ba le bantsi go ikgolola mo mefuteng yotlhe ya tirisabadimo. (Bagalatia 6:10; Ditiro 16:14-18) Le fa go ntse jalo, Bakeresete ba boammaaruri ba tila go nna le seabe sepe fela mo kobamelong ya maaka, go akaretsa le mofuta ope fela wa boloi.—2 Bakorintha 6:15-17.

[Dintlha tse di kwa tlase]

[Motswedi wa Setshwantsho mo go tsebe 31]

Picture Book of Devils, Demons and Witchcraft/Ernst and Johanna Lehner/Dover