Basha ba Botsa Jaana . . .

Nka Nna Botsalano Thata Jang?

“Ga ke ise ke tsamaye ke nne motho yo o tlotlang thata. Ke ne ke ikutlwa e kete fa nka bua sengwe, batho ba ne ba tla intlhokomolosa. Mmè ke motho yo o ditlhong thata, mme ke akanya gore ke ka ntlha ya moo le nna ke leng ditlhong jaana.”—Artie.

A KA dinako dingwe o eletsa e kete o ka bo o se ditlhong thata—mme o kgona go tlotla e bile o le botsalano? Jaaka setlhogo sa rona se se fetileng mo motseletseleng ono se supile, go nna ditlhong ke selo se se tlwaelegileng.a Ka jalo ga go na sepe se se phoso ka wena fa o le motho yo o itidimaletseng, o sa tshege kana o sa bue thata. Mme go nna ditlhong mo go feteletseng e ka nna bothata jwa mmatota. Tota e bile go ka go kgoreletsa go nna le ditsala. E bile go ka dira gore go nne thata go ikutlwa o phuthologile kana go dira dilo fa o le mo bathong.

Gantsi le e leng bagolo ba na le bothata jwa go nna ditlhong. Barryb ke mogolwane mo phuthegong ya Bokeresete. Mme o rata go itidimalela fela fa a le fa gare ga batho. O dumela jaana: “Ga ke bone nka kgona go bua sengwe se se utlwalang.” Mosadi wa gagwe e bong Diane, le ene o ne a na le bothata jo bo tshwanang. O rarabolola jang bothata jono? O bolela jaana: “Ke rata go nna le batho ba ba ratang go bua thata ka gonne ke tsaya gore e ka nna bone ba ba tlotlang thata.” Ke ditsela dife tse dingwe tse o ka kgonang go nna botsalano thata ka tsone?

Tlogela go Inyatsa

Sa ntlha, o ka nna wa tlhoka go sekaseka gape tsela e o itebang ka yone. A ka dinako tsotlhe o a inyatsa, o ipolelela gore ba bangwe ga ba kitla ba go rata kana ga o na sepe se se molemo se o ka se buang? Go nna le maikutlo a a sa siamang ka wena go ka go kgoreletsa gore o nne botsalano thata. Mo godimo ga moo, Jesu o ne a bolela jaana: “O tshwanetse go rata moagelani wa gago jaaka o ithata”—e seng bogolo go wena! (Mathaio 19:19) Ka jalo ke selo se se siameng le se se tshwanetseng gore o ithate ka tsela e e lekaneng. Go ka go naya go itshepa mo o go tlhokang gore o atamele ba bangwe.

Fa o tshwenngwa ke maikutlo a go itseela kwa tlase, o ka nna wa go fitlhela go thusa go bala kgaolo 12, “Ke ka Ntlhayang Fa ke Sa Ithate?,” mo bukeng ya Dipotso Tse Basha ba di Botsang—Dikarabo Tse di Nang le Ditharabololo.c Tshedimosetso eo e ka go thusa go bona gore le wena o na le go le gontsi go o ka go nayang ba bangwe. Ebu, kgang fela ya gore o Mokeresete e bontsha gore Modimo o na le sengwe sa botlhokwa se a se bonang mo go wena! Mo godimo ga moo, Jesu o ne a re: “Ga go na motho ope yo o ka tlang mo go nna fa Rara, yo o nthomileng, a sa mo goge.”—Johane 6:44.

Kgatlhegela ba Bangwe

Diane 18:1 e tlhagisa jaana: “Yo o itomololang o batla keletso ya gagwe ka esi.” Ee, fa o ikgogona, o tla tlhoma mogopolo thata mo go wena ka nosi. Bafilipi 2:4 e re kgothaletsa gore re nne ‘re beile leitlho, e seng mo molemong wa ka namana mo dilong tse di amang rona fela, mme gape le mo molemong wa ka namana mo go tsa ba bangwe.’ Fa o tlhomile mogopolo mo dilong tse di amang ba bangwe le tse ba di tlhokang, ga o kitla o akanya thata ka wena. Mme fa o amega thata ka ba bangwe, o tla kgona go tlhotlheletsega go tsaya kgato ya go ba itse.

Ka sekai, tsaya Lidia, mosadi yo o neng a itsege jaaka sekao sa go nna botsalano le go amogela baeng. Baebele e re bolelela gore morago ga go utlwa mafoko a ga moaposetoloi Paulo le go kolobediwa, o ne a kopa Paulo le balekane ba gagwe jaana: “Fa lo nkatlhotse gore ke boikanngo mo go Jehofa, tsenang mo ntlong ya me.” (Ditiro 16:11-15) Le fa gone Lidia e ne e le modumedi yo mosha, o ne a dira maiteko a go itse bakaulengwe bano—mme ga go na pelaelo gore o ne a bona masego a le mantsi ka ntlha ya seo. Fa Paulo le Silase ba sena go gololwa kwa kgolegelong, ba ne ba ya kae? Se se kgatlhisang ke gore ba ne ba boela kwa legaeng la ga Lidia!—Ditiro 16:35-40.

Ka mo go tshwanang, o tla fitlhela gore bontsi jwa batho bo tla tsibogela kgatlhego e o ba bontshang yone. O ka simolola go dira seno jang? Go na le dikakantsho di le mmalwa fano tse di ka go thusang.

● Simolola ka dilo tse dinnye. Go nna botsalano thata ga go bolele gore jaanong o nne motho yo o tlholang a nnetse ruri le batho kana yo o tlholang a tshwaregile mo setšhabeng. Leka go tlotla le batho, ka bongwe. O ka nna wa itirela mokgele wa go simolola motlotlo le mo e ka nnang motho a le mongwe nako le nako fa o ile kwa pokanong ya Bokeresete. Leka go nyenya. Itlwaetse go leba batho mo matlhong.

● Simolola motlotlo. O ka nna wa botsa gore, ‘Jang?’ Gone fa e le gore ruri o kgatlhegela ba bangwe, gantsi ga go thata go bona dilo tse lo ka buang ka tsone. Mosha mongwe wa kwa Spain yo o bidiwang Jorge o bolela jaana: “Ke lemogile gore go botsa fela ba bangwe gore ba ntse ba tswelela jang kana go ba botsa ka tiro ya bone go go thusa go ba itse botoka.” Mosha mongwe yo o bidiwang Fred o akantsha jaana: “Fa o sa itse gore o reng, simolola go botsa batho dipotso.” Gone mme, ga o batle go dira gore batho ba ikutlwe e kete ba thamathamisiwa ka dipotso. Fa motho a okaoka go araba dipotso, leka go mo tlotlela tshedimosetso e e rileng ka wena.

Mary, motsadi wa ngwana wa dingwaga tsa bolesome, o bolela jaana: “Ke fitlhetse gore tsela e e molemo ya go dira gore batho ba ikutlwe ba phuthologile ke go ba dira gore ba bue ka ga bone.” Kate yo mmotlana o oketsa jaana: “Go a thusa go akgola batho ka se ba se apereng kana ka sengwe se sele. O ba dira gore ba ikutlwe gore ba a ratiwa.” Gone mme, bua boammaaruri mme o tile go ba fora. (1 Bathesalonika 2:5) Gantsi batho ba tla tsibogela mafoko a boammaaruri a a molemo e bile a le monate.—Diane 16:24.

● Nna moreetsi yo o molemo. Baebele e bolela jaana: “Nna bofefo kaga go utlwa, bonya kaga go bua.” (Jakobe 1:19) Ee, motlotlo ke wa batho ba le babedi—e seng selo sa motho a le mongwe. Ka jalo, fa e le gore o motho yo o ditlhong go bua, seno se ka go solegela molemo thata! Batho ba anaanela bareetsi ba ba molemo.

● Kopanela le ba bangwe mo motlotlong wa bone. Fa o setse o kgona jaanong go tlotla le motho a le mongwe, simolola go bua mo bathong ba bantsi. Gape, dipokano tsa Bokeresete ke lefelo le le molemo la go bapala bokgoni jono. Ka dinako tse dingwe tsela e e motlhofo thata ya go nna le seabe mo motlotlong ke ka go kopanela mo go o o setseng o tsweletse. Gone mme, temogo le maitseo di botlhokwa fano. O se ke wa phasumela fela mo motlotlong o go bonalang sentle gore ke wa batho ba babedi fela. Mme fa go bonala gore setlhopha se itlotlela fela, leka go latlhela la mo tla pitsong. Nna kelotlhoko; o se ke wa tsena batho mo ganong le go leka go dira gore go utlwiwe ka wena fela. Leka go reetsa ka nakwana. Fa o ntse o phuthologa, o ka nna wa batla go akgela go sekaenyana.

● O se ke wa lebelela gore o tla dira dilo sentle ka metlha. Ka dinako dingwe basha ba tshwenyega thata ka gore ba tla bua dilo tse di phoso. Mosetsana mongwe wa kwa Italy e bong Elisa o gakologelwa jaana: “Ka metlha ke ne ke boifa gore fa nka bua sengwe, se tla tsewa ka tsela e e sa siamang.” Le fa go ntse jalo, Baebele e re gakolola gore rotlhe ga re a itekanela, ka jalo ga re kitla re kgona go nna le puo e e itekanetseng. (Baroma 3:23; bapisa Jakobe 3:2.) Elisa o bolela jaana: “Ke ne ka lemoga gore batho bano ke ditsala tsa me. Ka jalo ba tla tlhaloganya fa ke bua sengwe se se phoso.”

● Dira gore o kgone go itshega. Gone ke boammaaruri gore go tlhabisa ditlhong go bua selo se se sa tshwanelang o ne o sa ikaelela. Mme gone jaaka Fred a lemogile, “fa o ritibala fela mme o itshega, seo se tla feta ka bonako. O dira selo se se sa reng sepe bothata jo bogolo fa o itetla gore o galefe, o kgobege marapo kana o tshwenyege.”

● Nna pelotelele. Lemoga gore ga se mongwe le mongwe yo o tla tsibogang ka yone nako eo. Fa go na le tidimalo e e seng monate mo motlotlong ga go reye gore motho yono ga a go rate kana gore o tlogele go leka go bua. Ka dinako dingwe batho ba bo fela ba tshwaregile—kana ba le ditlhong jaaka wena. Mo maemong a a ntseng jalo, go ka thusa go naya motho yono nako e e rileng gore a go tlwaele.

● Leka go bua le batho ba bagolo. Ka dinako dingwe batho ba bagolo, segolobogolo Bakeresete ba ba godileng, ba kgona go nna kutlwelobotlhoko mo basheng ba ba lwantshanang le go nna ditlhong. Ka jalo o se ke wa boifa go leka go simolola motlotlo le motho yo o godileng. Kate o bolela gore: “Ke kgona go ritibala fa ke na le bagolo ka gonne ke a itse gore batho ba bagolo ga ba kitla ba ntshwaya diphoso, ba nkgoba kana ba nnyatsa jaaka dithaka tsa me di dira.”

Go Tlhotlhelediwa ke Lorato

Le fa gone dikakantsho tseno di ka thusa, ga go na mokgwa o o motlhofo wa go fenya go nna ditlhong. Fa nako e ntse e ya, ga se kgang fela ya go dirisa mengwe ya mekgwa kana dithulaganyo tse di rileng tse di botlhale. Selo sa konokono se se tla go thusang ke “go rata moagelani wa gago jaaka o ithata.” (Jakobe 2:8) Ee, ithute go amega ka batho ba bangwe—segolobogolo bakaulengwe le bokgaitsadi ba gago ba Bakeresete. (Bagalatia 6:10) Fa o na le lorato lwa mmatota mo pelong ya gago, o tla fenya poifo le go sa ritibale mme o dire maiteko a go tlotla le ba bangwe. Jaaka Jesu a buile, “molomo o bua se se tletseng mo pelong.”—Mathaio 12:34.

Barry yo o umakilweng kwa tshimologong o lemogile jaana: “Fa ke ntse ke itse batho ba bangwe, ke kgona go bua le bone.” Ka mafoko a mangwe, fa o itlwaetsa go nna botsalano thata, o tla kgona go dira jalo. Mme fa o ntse o kgona go dira ditsala tse disha le go ikutlwa o amogelwa thata ke ba bangwe, kwantle ga pelaelo o tla utlwa gore go ne go tshwanela go dira boiteko!

[Dintlha tse di kwa tlase]

[Setshwantsho mo go tsebe 15]

Dira maiteko mme le wena o tlotle!