Ramatiki—Bolwetse jo bo Golafatsang

“GA O KA KE WA TLHALOGANYA GORE BOTLHOKO JWA TENG BO UTLWALA JANG GO FITLHELELA O BO UTLWA KA BOWENA. KE NE KE AKANYA GORE TSELA E LE YOSI FELA YA GORE KE TSWE MO BOTLHOKONG JONO KE GORE KE SWE.”—SETSUKO, JAPANE.

“E RE KA KE SIMOLOTSE GO TSHWARWA KE BOLWETSE JONO FA E SA LE KE LE DINGWAGA DI LE 16, KE AKANYA GORE BO NTSEETSE BOSHA JWA ME.”—DARREN, GREAT BRITAIN.

“KE LATLHEGETSWE KE DINGWAGA DI LE PEDI TSA BOTSHELO JWA ME GONNE KE NE KE SA KGONE GO TSWA MO BOLAONG.”—KATIA, ITALY.

“E NE YA RE FELA FA KE SIMOLOLA GO UTLWA BOTLHOKO MO MALOKOLOLONG OTLHE A ME, BOTSHELO JOTLHE JWA ME E NE YA NNA BOTLHOKO FELA.”—JOYCE, AFRIKA BORWA.

MAFOKO a a tlhomolang pelo ano a builwe ke batho ba ba tshwerweng ke bolwetse jono jo bo bidiwang ramatiki. Ramatiki e isa dimilionemilione tsa batho kwa dingakeng tsa bone ngwaga le ngwaga gore ba ye go okobaletswa botlhoko jo ba leng mo go jone, ba namolwe mo go palelweng ke go tsamaya le mo bogoleng, tse di bakwang ke bolwetse jono.

Kwa United States fela, batho ba feta dimilione di le 42 ba tshwerwe ke ramatiki, mme e golafatsa a le 1 mo go bangwe le bangwe ba ba 6 ba ba tshwerweng ke bolwetse jono. Tota e bile, mo nageng eo, ramatiki ke yone selo se segolo thata se se golafatsang batho. Go ya ka lekgotla la Mafelo a go Laola Malwetse Le go A Thibela tshenyo e bolwetse jono bo e bakang mo ikonoming “e batla e lekana le kwelotlase e nnye ya ikonomi,” ka gonne ngwaga le ngwaga e jela Baamerika madi a a fetang diranta di le dikete di le dimilione di le 524 ka ntlha ya ditshenyegelo tsa kalafi le tsa go sa kgone go ntsha dikungo tse di lebeletsweng. Go ya ka World Health Organization, dipatlisiso tse di dirilweng tse di akaretsang dinaga tse di tlhabologang tse di tshwanang le Brazil, Chile, China, India, Indonesia, Malaysia, Mexico, Pakistan, Philippines le Thailand, di ne tsa bontsha gore mathata a a bakwang ke malwetse ano a ramatiki mo dinageng tseno a batla a “lekana le a dinaga tse di tlhabologileng.”

Ga se boammaaruri gore ramatiki ke bolwetse jwa batsofe fela. Gone ke boammaaruri gore batho ba tshwenngwa thata ke jone fa ba ntse ba gola. Mme mofuta o o tlwaelegileng thata wa bolwetse jono, e leng rheumatoid arthritis, bo tshwara thata batho ba dingwaga tsa magareng ga 25 le 50. Kwa United States, mo e ka nnang batho ba le 3 mo go bangwe le bangwe ba le 5 ba ba nang le ramatiki ke ba ba kwa tlase ga dingwaga di le 65. Ka tsela e e tshwanang, kwa Great Britain, mo balwetseng ba le dimilione di le 8 ba bolwetse jono, ba le dimilione di le 1,2 ke ba ba kwa tlase ga dingwaga di le 45. Ba ba fetang 14 500 ba bone ke bana.

Ngwaga le ngwaga palo ya batho ba ba tshwarwang ke bolwetse jono jwa ramatiki e ntse e oketsega ka lobelo lo logolo. Kwa Canada, mo dingwageng di le lesome tse di latelang, palo ya batho ba ba nang le ramatiki e tlile go oketsega ka milione o le mongwe. Le fa gone ramatiki e le ntsi thata kwa Yuropa go feta mo Afrika le kwa Asia, e ntse e a oketsega le mo dikontinenteng tseno tsa Afrika le Asia. Ka gone go gola ga bolwetse jono jwa ramatiki go dirile gore World Health Organization e bolele 2000-2010 e le Ngwagasome wa Marapo le Malokololo. Mo lobakeng lono dingaka le bomankge ba bangwe ba tsa kalafi go dikologa lefatshe ba tla dira mmogo go leka go tokafatsa boleng jwa botshelo jwa batho ba ba tshwerweng ke malwetse a mesifa le marapo, a a tshwanang le ramatiki.

Ke eng se se itsiweng ka bolwetse jo bo botlhoko jono? Ke bomang ba ba mo kotsing ya go tshwarwa ke jone? Ba ba tshwerweng ke ramatiki ba ka itshokela jang manokonoko a jone a a golafatsang? A isagwe e ka lere kalafi? Ditlhogo tsa rona tse di latelang di tla tlotla ka dikgang tseno.

[Motswedi wa Setshwantsho mo go tsebe 3]

X ray: Used by kind permission of the Arthritis Research Campaign, United Kingdom (www.arc.org.uk)