Gabon—Lefelo la Tshireletso ya Ditshedi

KA MOKWADI WA TSOGANG! KWA GABON

AKE O akanye ka ditlou di fula fa thoko ga lebopo lwa boboatsatsi, le dikubu di ntse di thuma, mme maruarua le didolofine di kgobokane mo lewatleng gaufi le losi! Mo losing lwa Afrika, go na le mabopo a dikilometara tse 60 mo o tla bonang se se umakilweng fa godimo fano.

Gore batho ba tle ba itumelele bontle jo bo ntseng jalo mo nakong e e tlang, lebopo leno le le tlhomologileng le tshwanelwa ke go sirelediwa. Se se itumedisang ke gore, go ile ga dirwa dithulaganyo tsa go sireletsa mabopo ano, ka September 4, 2002 fa poresidente ya Gabon a ne a bolela gore diperesente di le lesome tsa naga ya Gabon tse di akaretsang mabopo a mantle a ne a tla sirelediwa gore e nne diparaka tsa ditshedi le dimela.

Mafelo ano a a dikilometara tse 30 000—e leng bogolo jo bo lekanang le naga ya Belgium a na le dilo di le dintsi tsa tlholego. Poresidente Omar Bongo Ondimba o ne a re: “Naga ya Gabon e na le bokgoni jwa go ngoka bajanala ka ntlha ya mafelo a yone a mantle a tlholego, mo e leng gore batho ba ka tswa mo dikarolong tsotlhe tsa lefatshe go tla go bona masaledi a dilo tse di gakgamatsang tsa tlholego.”

Ke eng se se dirang gore mafelo ano a nne botlhokwa jaana? Diperesente di le 85 tsa Gabon e sa ntse e le sekgwa, mme gape mo e ka nnang diperesente di le 20 tsa mefuta ya dimela tsa Gabon ga e fitlhelwe gope gape mo lefatsheng. Mo godimo ga moo, dikgwa tsa yone tse di gaufi le ekhweitha ke legae la dikorila, di-chimpanzee, ditlou le mefuta e mengwe e mentsi ya diphologolo e e gaufi le go nyelela. Diparaka tse di sa tswang go agiwa di tla thusa go dira Gabon naga e e gatetseng pele mo go tlhokomeleng ditshedi tse di farologaneng tsa Afrika.

Loango—Lebopo Le le Sa Tshwaneng le a Mangwe

Go ka direga gore Loango National Park ke nngwe ya mafelo a diphologolo a mantle thata mo Afrika. Lefelo leno le na le karolo e kgolo ya naga e e nang le mabopo a mantle a a iseng a senngwe a a gaufi le makadiba a metsi a a se nang letswai le dikgwa tse di kitlaneng tse di gaufi le ekhweitha. Mme tota se se dirang gore mabopo a Loango a tlhomologe ke diphologolo tse di tsamayang fa thoko ga lebopo leno mo moshaweng tse di jaaka, dikubu, ditlou, dinare, mangau, le dikorila.

Ke ka ntlha yang fa lebopo leno le ratiwa ke diphologolo tseno tse di nnang mo sekgweng? Go bapa le lebopo leno lwa Loango le le nang le moshawa o mosweu, go na le mafulo a matala a a ikadileng mo dikubu le dinare di fulang gone. Ditlhare tsa mokolana tsa Rônier tse di golang gaufi le lebopo leno, di ungwa maungo a mantsi a a ngokang ditlou, fela jaaka dimonamone di ngoka bana. Mme se se botlhokwa le go feta ke go nna kwa thoko ga lefelo leno. Ke diphologolo fela tse di nnang mo lefelong leno.

Go se tshwenye lebopo leno ga batho go dirile gore dikhudu tsa lewatle tse di leng mo kotsing ya go ka nyelela tsa leatherback di tlhophe go beela mae mo lefelong leno. Mofuta wa dinonyane tse di bidiwang di-Rosy bee-eater le tsone di rata go beela mae mo lefelong leno, di dira mosima mo moshaweng mo makhubu a magolo a lewatle a ka se fitlheng gone. Ka dikgwedi tsa selemo, maruarua a a fetang sekete a humpback a kgobokana mo metsing ano a a sisibetseng a Loango go tla go gwela.

Makadiba a mabedi a magolo a kgaoganya mabopo a Loango le dikgwa, mme gape ke lefelo le le siametseng dikwena le dikubu. Ditlhapi di dintsi mo lefelong leno la metsi, le dintshi tsa lone di tletseng ka dikgwa tsa mangrove. Bontsu le digodi tse di jang ditlhapi di nna di fofa fa godimo ga lekadiba di batlana le dijo, fa mefuta e e rileng ya dinonyane tsa di-kingfisher e ntse e batlana le ditlhapi mo metsing a a seng boteng. Ditlou tse di ratang metsi di thuma mo lekadibeng leno go kgabaganyetsa kwa lebopong gore di je sa mpana phatloga ga maungo a di a ratang.

Mo gare ga sekgwa seno, dikgabo di tlolaka mo godimo ga dikala, fa dirurubele tsa mebalabala tsone di phaphalala mo letsatsing. Bommamanthwane ba ba jang maungo ba robala fa godimo ga ditlhare motshegare, mme e re bosigo ba bo ba simolola tiro ya bone e e botlhokwa ya go anamisa dipeo go ralala le sekgwa. Mo sekgwa seno se felelang gone, dinonyane tsa sunbird di nna di monya matute a malomo mo ditlhareng le mo ditlhatshaneng. Go a utlwala gore, Loango e bo e bidiwa gore ke “lefelo le o ka itemogelang gore botshelo bo ntse jang mo ekhweitha mo Afrika.”

Lopé—Lengwe la Mafelo a Dikorila di sa Ntseng di Tshela mo go One

Lopé National Park e akaretsa gape le dikgwa tse di iseng di senngwe tsa pula le dikarolo tse di rileng tsa dipoa le dikgwa tse di gaufi le metsi tse di kwa bokone jwa paraka eno. Ke lefelo le le siametseng bajanala ba ba ratang go tla go bogela dikorila, di-chimpanzee, kgotsa ditshwene tsa mandrill mo sekgweng. Go na le dikorila tse di magareng ga 3 000 le 5 000 tse di nnang mo lefelong le le sireleditsweng la disekwerekilometara tse 5 000.

Augustin, yo e kileng ya bo e le modiredimogolo mo parakeng eno, o gopola tiragalo nngwe e e tlhomologileng e a nnileng le yone ka dikorila ka 2002. O tlhalosa jaana: “Fa ke ntse ke tsamaya mo sekgweng ke ne ka kopana le lelapa la dikorila tse nnè. Korila e e boitshegang e tonanyana e e ka nnang dingwaga di le 35 e e nang le mmala wa selefera mo mokwatleng e ne ya ema fa pele ga me. E ka tswa e ne e le bokete jo bo fetang jwa me gararo. Ke ne ka latela ditaelo tse ke neng ke di neilwe, ka bonako fela ke ne ka nna fa fatshe, ka inamisa tlhogo ke bo ke leba fa fatshe e le go bontsha gore ga ke lwe. Korila eno e ne ya tla ya nna fa thoko ga me e bo e baya letsogo la yone mo legetleng la me. E ne ya tsaya seatla sa me, ya se bula e bo e se sekaseka kafa gare. Morago ga gore e lemoge gore ga ke na matshosetsi mo lelapeng la yone, e ne ya retologa ya tsamaya ka bonya ya tsena mo sekgweng. Mo letsatsing leo le le sa lebalesegeng, ke ne ka kgatlhiwa ke go kopana le diphologolo di le mo lefelong la tsone la tlholego. Le fa batho ba bolaya dikorila gore ba je nama ya tsone, kgotsa ka ntlha ya dikgopolo tse di phoso tsa gore di ka ba ntsha kotsi, tota ruri ke diphologolo tse di ratang kagiso tse di tlhokang gore re di sireletse.”

Mo parakeng eno ya Lopé, ditshwene tse dikgolo tsa di-mandrill, di tsamaya ka setlhopha se segolo se ka dinako dingwe se fetang sekete. Seno ke sengwe sa ditlhopha tse dikgolo thata mo lefatsheng, le se se modumo thata. Mojanala mongwe wa kwa Cameroon o tlhalosa maitemogelo a a nnileng le one fa a ne a kopana le sengwe sa ditlhopha tseno tse dikgolo.

“Mokaedi wa rona o ne a kgona go bona di-mandrill gore di kwa kae, a thusiwa ke sedirisiwa sa radio se se rwesiwang diphologolo tse dingwe mo melaleng. Re ne ra di tlhaga kwa pele, mme ra ema mo lefelong le le fitlhegileng, re bo re di leta gore di tle. Mo metsotsong e 20 e re neng re letile ka yone re ne re reeditse melodi ya dinonyane le ditshenekegi mo sekgweng. Ka tshoganyetso fela melodi eno e e monate e ne ya kgorelediwa ke setlhopha sa di-mandrill se se neng se ntse se atamela. Modumo wa go robega ga dikala le leratla le le kwa godimo e ne e kete go tla sefefo se segolo. Mme e ne ya re fa ke bona ditshwene tse di eteletseng setlhopha seno pele, di ne di lebega jaaka e kete ke setlhopha sa masole a a eteletseng pele. Tse ditonanyana tse dikgolo di ne di eteletse pele, di gwanta ka bonako, fa tse di namagadi le tse dinnye di tlola go tswa mo kaleng e nngwe go ya go e nngwe. Ka tshoganyetso fela e nngwe ya tse dikgolo tseno e ne ya ema, mme ya lebaleba ka go belaela. Nngwe ya ditshwene tse dinnye, tse di neng di tlolaka mo ditlhareng e ne ya re bona mme ya itsise tse dingwe. Setlhopha seno se ne sa akofisa mogwanto wa sone, mme modumo wa sone o ne wa oketsega ka go bo di ne di tenegile. Mo metsotsong e se mekae fela di ne di setse di ile. Mokaedi wa rona o ne a fopholetsa gore go ne go fetile ditshwene tse di ka nnang 400 gaufi le rona.”

Di-chimpazee, tse le tsone di dirang modumo o mogolo fela jaaka di-mandrill, gape ga di bonwe motlhofo ka gonne di gwanta tota mo sekgweng fa di ntse di batlana le dijo. Ka fa letlhakoreng le lengwe, gantsi baeti ba kgona go bona le ditshwene tsa dinko tse ditshetlha tse gantsi di nnang mmogo mo dipoeng tseno tse di gaufi le sekgwa. Gongwe diphologolo tse di itlhaotseng thata mo lefelong leno la Lopé ke ditshwene tsa mogatla wa mmala wa letsatsi, tse e leng mofuta wa diphologolo tse di sa tswang go bonwa dingwaga di ka nna 20 tse di fetileng.

Dinonyane tse dikgolo tse di mebalabala tsa mo sekgweng—tse di jaaka di-turaco le bokorwe di ikitsise gore di teng ka go dira modumo o mogolo. Go fitlhetswe mefuta e ka nna 400 ya dinonyane mo parakeng eno, seno se dira gore e nne lefelo le le ngokang thata barati ba dinonyane.

Lefelo la Tshireletso ya Ditshedi Tse di Farologaneng

Loango le Lopé ke dingwe tsa diparaka tse 13 tsa diphologolo tsa kwa Gabon. Diparaka dingwe di sireletsa dikgwa tsa mangrove, le dimela tse di sa tshwaneng le dipe, le go sireletsa mafelo a dinonyane tse di fudugang. Lee White wa Mokgatlho wa Pabalelo ya Ditshedi Tsa Naga o tlhalosa jaana: “Kwa Gabon go na le mafelo a a tlhomilweng a tikologo a a molemo thata mo nageng yotlhe. Ga se fela bogolo jwa naga e e sireleditsweng bo leng botlhokwa mme le boleng jwa yone bo botlhokwa. Ka 2002 mo nakong e khutshwane fela, go ne ga dirwa tsamaiso ya diparaka tsa ditshedi le dimela ka selekanyo se segolo, e e neng e kgona go sireletsa ditshedi tse di farologaneng tsa naga ya Gabon.”

Gone ke boammaaruri, gore go sa ntse go na le mathata a mantsi, fela jaaka poresidente Bongo Ondimba le ene a ne a dumela mo pontsheng. O ne a re: “Fano re bua ka tiro e kgolo e e akaretsang lefatshe lotlhe, e kwantle ga pelaelo e tla tlhokang gore re tseye matsapa a nakwana kgotsa a nako e telele, gore re tle re kgone go fitlhelela maikaelelo a rona a go tlogelela dikokomana tse di tlang bontle jono jwa dilo tsa tlholego.”

[Mmapa mo go tsebe 17]

(Go bona mokwalo o o feletseng bona kgatiso)

AFRIKA

GABON

Diparaka tse 13 tsa ditshedi le dimela tsa kwa Gabon

Lopé National Park

Loango National Park

[Ditshwantsho mo go tsebe 16, 17]

Leruarua la “Humpback” le Loango e lebilwe go tswa kwa godimo

[Motswedi wa Setshwantsho]

Whale: Wildlife Conservation Society

[Ditshwantsho mo go tsebe 16, 17]

Tshwene ya “mandrill” (kafa molemeng) le korila (kafa mojeng)

[Motswedi wa Setshwantsho mo go tsebe 15]

Robert J. Ross