A o Ne o Tlhamilwe?

Mosele o Mashi a Fetang ka One

◼ Fa e le gore o kile wa bona nku, podi kgotsa kgomo e tsala, gongwe o ile wa gakgamadiwa ke kafa namane ya yone e emelelang ka bonako ka teng e bo e ya kwa matseleng gore e anye. Diamusi tsotlhe di fepa bana ba tsone ka mashi. Mme diamusi tse dinnye tse di otlhang, tse di jaaka dikwanyana, dipotsane le dinamane di na le sengwe se se gakgamatsang se se sa bonweng.

Ela tlhoko: Dikgomo di na le mogodu o o nang le dikarolo tse nnè, tse di dirang ditiro tse dintsi tse di tlhokegang mo go sileng bojang le furu. Mme dinamane tsone di anya fela mashi, a a sa tlhokeng go silwa. Ka jalo, fa namane e anya, mosele mongwe o o kgethegileng o a bulega go letla mashi gore a fetele ka tlhamalalo mo karolong ya bofelo ya mogodu.

Fa go ne go ka direga gore mashi a tsene mo karolong ya ntlha ya mogodu (rumen), namane e ne e ka lwala ka gonne karolo eno e diretswe go sila dijo tse di popota ka dibakateria. Fa mashi a ne a ka silwa ka dibakateria go ne go tla tswa gase e dinamane di ka se kgoneng go e ntshetsa kwa ntle. Le fa go ntse jalo, fa diamusi tse dinnye di nwa mashi, e ka tswa e le ka go anya kgotsa go tswa mo kgamelong, ka tlholego fela mosele o o yang mo karolong eno ya mogodu o a tswalega.

Se se gakgamatsang ke gore, go direga se se farologaneng fa ngwana yo o sa tswang go tsalwa wa seamusi a nwa metsi. O tlhoka metsi a mantsi mo karolong eno ya mogodu gore dibakateria le megare di kgone go ata, gore e siamele fa ngwana a setse a tla simolola go ja tlhaga. Le fa mashi a ya ka tlhamalalo kwa karolong e e kwa bofelong ya mogodu, metsi a a se nang sepe a ya mo karolong ya ntlha ya mogodu. Tiragalo eno e e gakgamatsang ya go kgona go fetela mo karolong ya bofelo ya mogodu ga mashi e diragala fela fa e le mashi!

O akanya eng? A tiragalo eno ya go kgona go fetela ga mashi mo karolong ya bofelo ya mogodu e itiragaletse fela? Kgotsa ke tiro ya Mmopi yo o botlhale?

[Setshwantsho mo go tsebe 13]

(Go bona mokwalo o o feletseng, leba kgatiso)

Mashi a feta dikarolo tse tharo tsa ntlha tsa mogodu mo namaneng

[Setshwantsho]

Mosele o mashi a fetang ka one

1 Rumen

2 Reticulum

3 Omasum

4 Abomasum (karolo ya bofelo ya mogodu)