Baebele ya Reng
A o Tshwanetse go Nna Kgatlhanong le go Fisiwa ga Setopo?
Batho bangwe ba ka nna ba ikutlwa gore go fisiwa ga setopo ke go tlontlolola mmele le se se ka gakologelwang ka motho yo o tlhokafetseng. Ba ka nna ba re ‘ke selo se se simologileng kwa boheitaneng, ka jalo batho ba ba ipolelang gore ba obamela Modimo ga ba a tshwanela go go dira.’ Ba bangwe ba dumela gore go fisa setopo ke tsela e e amogelesegang sentle e e nang le seriti ya go latlha masaledi a motho. Wena o ikutlwa jang ka kgang eno?
MO METLHENG ya ditiragalo tsa Baebele go ne go tlwaelegile gore batho ba ba tlhokafetseng ba fitlhiwe. Ka sekai, Aborahame o ne a fitlha mosadi wa gagwe e bong Sara mo logageng. Mmele wa ga Jesu o ne wa bewa mo lebitleng le le neng le gabilweng mo lefikeng. (Genesise 23:9; Mathaio 27:60) A Baebele e tlhalosa gore go fitlha motho ke yone fela tsela e e amogelesegang ya go latlha masaledi a motho? A e bontsha gore batlhanka ba Modimo ba bogologolo ba ne ba le kgatlhanong le go fisiwa ga setopo?
A go Bontsha Gore Modimo Ga a Amogele Motho?
Fa re bala re feta fela, ditemana tse dintsi mo Baebeleng di ka bonala di bontsha gore go ne go fisiwa ditopo tsa batho ba ba suleng ba sa itumedise Modimo. Ka sekai, Molao wa ga Moshe o ne o bolela gore fa morwadia mongwe wa baperesiti ba ga Jehofa a ka nna seaka, o ne a tshwanetse go “fisiwa mo molelong” fa a sena go bolawa. (Lefitiko 20:10; 21:9) Ka tsela e e tshwanang, fa go tlhoka kutlo ga ga Akane le ba lelapa la gagwe go ne go dira gore Iseraele e fenngwe kwa Ai, baagi ka bobone ba ne ba ba kgobotletsa ka maje mme morago ga moo ba “ba fisa ka molelo.” (Joshua 1:25) Bakanoki bangwe ba akantsha gore eno e ne e le tsela e batho ba ba neng ba swa ka tsela ya matlhabisa ditlhong ba neng ba tshwarwa ka yone le gore go fisiwa ga ditopo tsa bone go ne go dira gore batho ba ba dirileng bosula ba se ka ba nna le tshiamelo ya go fitlhiwa ka tsela e e nang le seriti.
Mo godimo ga moo, fa Kgosi Josia a ne a leka go phepafatsa Juda ka go tlosa kobamelo ya medingwana koo, o ne a thuba a ba a bula mabitla a baperesiti ba ba ileng ba ntshetsa Baale ditlhabelo mme a fisa marapo a bone mo dibesong tsa bone. (2 Ditiragalo 34:4, 5) A dikai tse di ntseng jalo di bontsha gore Modimo ga a rate batho botlhe ba masaledi a bone a ileng a fisiwa? Nnyaa, ga go reye jalo, jaaka go bontshitswe mo pegong e nngwe ya Baebele.
Fa Bafilisitia ba ne ba fenya Kgosi Saulo wa Iseraele mo ntweng, ka go ba ntlontlolola, ba ne ba bofa setopo sa gagwe le tsa barwa ba gagwe ba bararo mo loboteng lwa motse kwa Bethe-shane. Le fa go ntse jalo, fa Baiseraele ba ba neng ba nna kwa Jabeshe-gileade ba utlwa ka tlontlololo e e dirilweng ka ditopo tseno, ba ne ba di ntsha ba di fisa mme morago ga foo ba fisa le marapo. (1 Samuele 31:2, 8-13) Fa o utlwa la ntlha ka pego eno go ka nna ga bonala e kete seno se tlhomamisa kgang ya gore go fisa ditopo ga go a siama. Boammaaruri ke gore, Saulo le ene o ne a le bosula; mme o ne a lwa kgatlhanong le Dafide, motlodiwa wa ga Jehofa mme o ne a swa Modimo a sa mo itumelele.
Le fa go ntse jalo, ela tlhoko gore ke mang yo o ileng a swa mmogo le Saulo. E ne e le mongwe wa bomorwawe e bong Jonathane, yo le ene setopo sa gagwe se ileng sa fisiwa. E ne e se motho yo o bosula. Go na le moo, Jonathane e ne e le tsala e kgolo ya ga Dafide e bile e le mothusi wa gagwe. Malebana le Jonathane, Baiseraele ba ne ba dumela jaana: “O ne a dira le Modimo.” (1 Samuele 14:45) Fa Dafide a utlwa ka se banna ba Jabeshe-gileade ba se dirileng, o ne a ba baka le go ba lebogela se ba se dirileng a re: “A Jehofa a lo segofatse, ka gonne lo diretse Saulo morena wa lona bopelonomi jono jwa lorato.” Go bonala fa kgang ya go fisiwa ga setopo sa ga Saulo le sa ga Jonathane e sa ka ya tshwenya Dafide.—2 Samuele 2:4-6.
Go ka Se Kgoreletse Motho go Tsosiwa
Baebele e bontsha sentle gore Jehofa Modimo o tla dira gore ba le bantsi ba gone jaanong ba robetseng mo losong ba boe ba tshele gape. (Moreri 9:5, 10; Johane 5:28, 29) Fa buka ya Tshenolo kgotsa Apokalipisi e tlhalosa ka tsela ya boporofeti nako ya fa baswi ba tla bo ba tsosiwa, ya re: “Lewatle la ntsha baswi ba ba mo go lone, le loso le Hadese tsa ntsha baswi ba ba mo go tsone.” (Tshenolo 20:13) Gore Modimo Mothatayotlhe a kgone go dira seno, ga go re sepe mo go ene gore a setopo sa motho se fitlhilwe, se fisitswe, se timetse mo lewatleng, se jelwe ke dibatana kgotsa le e leng gore a se nyeleditswe ke go thunya ga bomo ya atomiki.
Baebele ga e re neele kaelo e e rileng malebana le gore re direng ka ditopo tsa baswi. Jehofa ga a kgale go fisiwa ga setopo. Le fa go ntse jalo, ga go na pelaelo gore phitlho e tshwanetse go nna le seriti le go tlotlega.
Le fa go ntse jalo, sengwe se se ka tlhotlheletsang ditshwetso tse motho a di dirang malebana le dithulaganyo tsa phitlho, ke tsela e batho ba lefelo la bone ba lebang dingwao tsa phitlho ka teng. Batho ba ba latelang melaometheo ya Baebele ba ka se ka ba batla go dira sengwe se se tla kgopisang baagelani ba bone go sa tlhokege. Mme go tla bo go sa tshwanela gape go dira sengwe se se ka bontshang gore motho o dumela mo dithutong tsa maaka tsa bodumedi, tse di jaaka gore moya ga o swe. Le fa re ka tswa re akanyetsa dilo tseno tsotlhe, tshwetso le fa e le efe e motho a ka e dirang malebana le gore go dirwe eng ka setopo sa gagwe kgotsa sa motho yo mongwe, tota ke kgang ya motho ka esi kgotsa kgang ya lelapa.
A O KILE WA IPOTSA GORE. . .
◼ Ke moobamedi ofe yo o ikanyegang yo o umakilweng mo Baebeleng yo setopo sa gagwe se ileng sa fisiwa?—1 Samuele 31:2, 12.
◼ Dafide o ne a tshwara jang banna ba ba neng ba fisa setopo sa ga Saulo?—2 Samuele 2:4-6.
◼ Ke eng se se bontshang gore go fisa setopo ka bogone ga go ne go dira gore motho a se ka a tsosiwa mo baswing?—Tshenolo 20:13.
[Mafoko a a mo go tsebe 11]
Baebele ga e re neye kaelo epe e e rileng malebana le gore go tshwanetse ga dirwa eng ka ditopo tsa baswi