DIPOTSO TSE DI TSWANG KWA BABADING

A go siame gore Bakeresete ba fise setopo?

Dikwalo ga di gane mokgwa wa go fisa setopo.

Go na le dipego tsa Baebele tse di bontshang gore ditopo kgotsa marapo a batho ba ba suleng a ne a fisiwa. (Josh. 7:25; 2 Ditir. 34:4, 5) Seno se ka tswa se ne se kaya gore batho bao ga ba tshwanelwe ke go fitlhiwa ka seriti. Le fa go ntse jalo, ga se ka metlha go fisiwa ga ditopo go neng go kaya seo.

Re kgona go bona seo mo pegong ya loso lwa ga Kgosi Saulo le bomorwawe ba bararo. Botlhe ba ne ba swa fa ba ne ba lwa le Bafilisitia. Mongwe wa bomorwa Saulo e ne e le Jonathane, tsala e kgolo ya ga Dafide e e neng e mo eme nokeng. Fa Baiseraele ba diganka ba ba neng ba nna kwa Jabeshe-gileade ba utlwa ka se se diragetseng, ba ne ba ya go tsaya ditopo tseo tse nnè mme ba di fisa, go tswa foo ba fitlha marapo a tsone. Moragonyana Dafide o ne a akgola Baiseraele bao ka ntlha ya se ba se dirileng.—1 Sam. 31:2, 8-13; 2 Sam. 2:4-6.

Tsholofelo ya Dikwalo ke gore baswi ba tla tsosiwa—gore Modimo o tla dira gore motho a boe a tshele gape. Go sa kgathalesege gore motho yo o suleng o fisitswe kgotsa nnyaa, Jehofa ga a kitla a palelwa ke go tsosa motho yoo gape a na le mmele o mosha. Bahebera ba bararo ba ba ikanyegang ba Kgosi Nebukadenesare a neng a laetse gore ba bolaelwe mo leubelong ba ne ba sa tlhoke go boifa gore fa ba ka fisiwa, Modimo o ne a ka se kgone go ba tsosa. (Dan. 3:16-18) Go ntse jalo le ka batlhanka ba ga Jehofa ba ba swetseng kwa dikampeng tsa pogisetso tsa Banasi mme ba fisiwa. Batlhanka ba ga Jehofa ba le mmalwa ba ba ikanyegang ba bolailwe ke go thunya ga dibomo kgotsa ba sule ka tsela nngwe e e dirang gore go se ka ga nna le masalela a ditopo tsa bone. Le fa go ntse jalo, re ka tlhomamisega gore ba tla tsosiwa.—Tshen. 20:13.

Jehofa ga a tlhoke go kopanya mmele wa motho wa bogologolo gore a kgone go mo tsosa. Re kgona go bona seo ka Bakeresete ba batlodiwa ba Modimo a ba tsosetsang kwa legodimong. Fela jaaka Jesu, yo o neng a “tshedisiwa mo moyeng,” Bakeresete ba ba tloditsweng le bone ba tsosiwa e ntse e le bone batho bao mme gone ba na le mmele wa semoya. Ga go karolo epe ya mmele wa bone wa nama e e yang le bone kwa legodimong.—1 Pet. 3:18; 1 Bakor. 15:42-53; 1 Joh. 3:2.

Tsholofelo ya rona ya go tsosiwa ga e a ikaega ka se se diregang ka mmele wa rona, mme e ikaegile ka tumelo e re nang le yone gore Modimo o tla kgona go diragatsa tsholofetso ya gagwe e bile o eletsa go dira jalo. (Dit. 24:15) Gone ke boammaaruri gore re ka tswa re sa tlhaloganye ka botlalo kafa Modimo a ileng a diragatsa kgakgamatso ya tsogo ya baswi ka teng le kafa a tla e diragatsang ka gone mo isagweng. Le fa go ntse jalo, re ikanya Jehofa. O re “tlhomamiseditse” seo ka go tsosa Jesu.—Dit. 17:31; Luke 24:2, 3.

Go tla bo go le molemo gore Bakeresete ba akanyetse se se tlwaelegileng mo ba nnang gone, le tsela e batho ba lebang dilo ka yone mmogo le se se tlhokiwang ke molao malebana le tsela ya go fitlha setopo. (2 Bakor. 6:3, 4) Ka jalo, kgang ya gore setopo se a fisiwa kgotsa nnyaa ke tshwetso ya motho kgotsa ya lelapa.