Go Boela mo Loroleng—Jang?
“O LOROLE, mme o tlaa boela mo loroleng.” Fa motho wa ntlha Atame a ne a utlwa mafoko ao, o ne a itse gore o tshwanetse go lebelela eng. O ne a bopilwe ka lorole lwa lefatshe mme o ne a tla boela gape go nna lorole fela. O ne a tla swa ka gonne a ile a se ka a utlwa Mmopi wa gagwe e bong Jehofa Modimo.—Genesise 2:7, 15-17; 3:17-19.
Baebele e supa gore batho ba bopilwe ka lorole. Gape ya re: “Mowa o o leofang go tlaa swa one.” (Esekiele 18:4; Pesalema 103:14) Loso lo dirile gore batho ba bantsi ba hutsafale mme gangwe le gape lo ile lwa tsosa dipotso tse di malebana le gore ditopo tsa batho di fitlhwa jang.
Mekgwa ya Nako e e Fetileng le ya Gone Jaanong
Batho ba Modimo ba bogologolo ba ne ba fitlha jang ditopo tsa batho? Mo karolong ya yone ya ntlha, Baebele e umaka ditsela tse di farologaneng tse baswi ba neng ba tshwarwa ka tsone, go akaretsa le go ba fitlha mo mmung. (Genesise 35:8) Tlhogo ya lotso e bong Aberahame le mosadi wa gagwe Sara, le barwa ba gagwe Isake le Jakobe ba ne ba fitlhwa mo logageng lwa Makapela. (Genesise 23:2, 19; 25:9; 49:30, 31; 50:13) Baatlhodi ba Iseraele e bong Gitione le Samesone ba ne ba fitlhwa mo ‘diphupung tsa borrabo.’ (Baatlhodi 8:32; 16:31) Se se ka tswa se raya gore batho ba Modimo ba bogologolo ba ne ba rata go nna le ditsha tsa mabitla a ba lelapa. Fa Jesu Keresete a ne a swa mo lekgolong la ntlha la dingwaga C.E., mmele wa gagwe o ne wa fitlhwa mo lebitleng le lesha le le neng le gabilwe mo lefikeng. (Mathaio 27:57-60) Ka jalo, ka kakaretso fela, ditopo tsa batho di ne di fitlhwa mo mmung kana di tsenngwa mo lebitleng. Seno se santse se dirwa mo mafelong a mantsi go dikologa lefatshe.
Lefa go ntse jalo, mo dikarolong tse dingwe tsa lefatshe, go tlhaela thata ga naga le go tura thata ga naga go dira gore go nne bokete go bona setsha sa mabitla. Ka jalo, batho bangwe ba akanya ka ditsela tse dingwe tsa go fitlha ditopo.
Go gasakanya melora fa setopo se sena go fisiwa go oketsega thata. Kwa Engelane mo e ka nnang diperesente di le 40 tsa baswi ba dirwa jalo jaanong. Kwa Sweden, koo diperesente di le 80 tsa ditopo mo mafelong a setoropo di fisiwang gone, go ne ga tlhophiwa dikgwa dingwe gore go gasetswe melora teng. Mme kwa Shanghai le mo ditoropong tse dingwe tse mmalwa tsa China tse di bapileng le lewatle, borraditoropo ba duelela ditshenyegelo tsa go gasetsa mekoa ya melora mo lewatleng ka makgetlho a le mmalwa mo ngwageng.
Melora e ka gasetswa kae? E seng gongwe le gongwe fela. Bangwe ba boifa gore go gasakanya melora go ka nna diphatsa mo tikologong. Lefa go ntse jalo, tota, go anamisiwa ga malwetse go go ka nnang teng go fedisiwa ka go fisiwa ga ditopo. Mo mabitleng mangwe kwa Engelane le kwa diphupung tsa kwa United States go ile ga beelwa mafelo a bojang kana ditshingwana tsa ditšheshe kwa thoko gore go gasetswe melora gone. Gone mme, Bakeresete ba amega thata ka se Dikwalo di se bolelang malebana le go fisiwa ga ditopo le go gasakanngwa ga melora.
Kgopolo ya Dikwalo ke Efe?
Mo katlholong e e kgatlhanong le “kgosi ya Babilone,” moporofeti Isaia o ne a bolela jaana: “O latlhetswe kwa ntle ga phupu ya gago.” (Isaia 14:4, 19) A go gasiwa ga melora go tshwanetse ga bapisiwa le kgang eno ya go nyenyefadiwa? Nnyaa, ka gonne ga go na gope koo go buiwang ka go fisiwa ga setopo le go bolokiwa kana go gasakanngwa ga melora e e salang morago ga foo.
Jesu Keresete o ne a bua ka tsogo ya baswi mo lefatsheng e e tla diragalang ka Puso ya gagwe ya Mileniamo fa a ne a re: ‘Botlhe ba ba mo diphupung ba tla utlwa lentswe la [me]. Mme ba tla tswa.’ (Johane 5:28, 29) Lefa go ntse jalo, go supa gore ga go tlhokege lebitla le le rileng gore motho a tsosiwe go tlhomamisiwa mo tlhalosong e nngwe ya boporofeti ya tsogo. Tshenolo 20:13 e bolela jaana: “Lewatle la ntsha baswi ba ba mo go lone, le loso lwa ntsha baswi ba ba mo go lone, le Bobipo jalo.” Ka jalo, selo se se botlhokwa ga se gore motho o ‘boela mo loroleng’ jang kana kae. Go na le moo, ke gore Modimo o a mo gakologelwa mme o a tsosiwa. (Jobe 14:13-15; bapisa Luke 23:42, 43.) Eleruri Jehofa ga a tlhoke diphupu tse dintle go mo thusa gore a gakologelwe batho. Go fisiwa ga setopo ga go thibele motho gore a tsosiwe. Mme fa go gasakanngwa ga melora go dirwa ka maikaelelo a a siameng mme go sena meletlo ya bodumedi jwa maaka, go ka se ka ga thulana le Dikwalo.
Batho ba ba ratang go gasakanya melora ba tla tshwanela gore ba ele tlhoko molao wa naga. Mme e bile go tla nna molemo fa ba ka akanyetsa maikutlo a batho ba ba swetsweng le ba bangwe. Batlhanka ba ga Jehofa ba tla bo ba dira sentle fa ba ka nna kelotlhoko gore go dirisa kgololesego ya bone ya Dikwalo mo kgannyeng eno go se ka ga tlisa kgobo mo leineng le lentle le Bakeresete ba bidiwang ka lone. Seno se botlhokwa segolobogolo mo dinageng tse mo go tsone go fisiwa ga ditopo le go gasiwa ga melora go dumelelwang kafa molaong mme go sa amogelwe ka botlalo mo tikologong. Gone mme, Mokeresete o tla tila mekgwa kana dingwao tse di theilweng mo tumelong ya gore moya wa motho ga o swe.
Kgololesego e e Feletseng mo Lebitleng!
Batho bangwe ba ba buelelang go gasakanngwa ga melora ba re go kaya kgololesego ya go sa fitlhiwe mo mabitleng. Lefa go ntse jalo, selo se e tla nnang kgololesego e kgolo go di feta tsotlhe e tla nna go diragadiwa ga tsholofetso ya Baebele ya gore “mmaba wa bofelo yo o tlaa nyelediwang ke loso.”—1 Bakorinthe 15:24-28.
Se se raya gore mabitla, diphupu, le e leng go gasiwa ga melora, e tla nna dilo tsa nako e e fetileng. Ee, loso lo tla bo lo sa tlhole lo le gone. Moaposetoloi Johane o ne a tlhotlhelediwa go kwala jaana: “Ka utlwa lentswe le legolo le tswa mo setulong sa bogosi le re: ‘Bonang, boago jwa Modimo bo mo bathong, o tlaa aga nabo, ba tlaa nna batho ba one, le Modimo ka osi o tlaa nna nabo, o tlaa nna Modimo wa bone. O tlaa phimola dikeledi tsotlhe mo matlhong a bone; ga go ketla go tlhola go le loso; le gone ga go ketla go tlhola go le bohutsana, le fa e le selelo, le fa e le botlhoko; dilo tsa pele di fetetse ruri.’”—Tshenolo 21:3, 4.
Dilo tseno tsotlhe di tla diragala fa go swa ga motho go go bakiwang ke boleo jwa ga Atame go tla bo go fedisitswe gotlhelele kafa tlase ga Bogosi jwa Modimo. Ka nako eo, batho ba ba kutlo ba tla bo ba sa tlhoke go lebana le go boela mo loroleng.
[Ditshwantsho mo go tsebe 29]
Ditsela tse di tlwaelegileng tsa go fitlha ditopo tsa batho
[Setshwantsho mo go tsebe 31]
Go gasakanngwa ga melora kwa Sagami Bay, Japan
[Motswedi wa Setshwantsho]
Courtesy of Koueisha, Tokyo