A e Ne e Tlhamilwe?

Kgapetla ya Khukhwane ya “Cyphochilus”

◼ Kgapetla ya khukhwane ya “Cyphochilus” e na le makape a a tlhatlaganeng a masesane go feta moriri wa motho go menagane ga lesome. Dr. Pete Vukusic wa Exeter Uni­ver­sity kwa Boritane a re: “Fa ke tsenya makape ano kafa tlase ga maekorosekopo ya diileketerone, go ne go ntse jaaka e kete ke lebile lefatshe le lengwe. Go ne go gakgamatsa tota.”

Ela tlhoko: Se Vukusic a se boneng e ne e le tlhaloso ya mmala o mosweu o o galolang wa khukhwane, o o sa amaneng ka gope le sere se se dirang gore go nne le mmala. Sephiri sa gone ke ditlhalenyana tse di tshesane tse makape a dirilweng ka tsone le sekgala se se fa gare ga tsone. Tsela eno e di bopegileng ka yone e anamisa lesedi ka tsela e e botswerere e e sa tlwaelegang. Science Daily e bega jaana: “Leyara ya diminerale tse di dirisiwang kwa madirelong tse di jaaka tse di dirisiwang mo pampiring ya maemo a a kwa godimo, mo dipolasetiking le mo dipenteng dingwe, di ka tlhoka gore di nne bokima jo bo menaganeng gabedi gore di tle di nne le bosweu jo bo tshwanang le jwa khukhwane eno.”

Baitsesaense ba dumela gore kgapetla ya khukhwane ya “Cyphochilus” e e thusa gore e tshwane le mothuthuntshwane o mosweu o gantsi e fitlhelwang mo go one. Mme bomankge ba kgatlhegela thata go itse gore sephiri sa mmala wa khukhwanyana eno, o ka thusa batho jang​—ka sekai, Vukusic o bolela gore dilo tse di ntseng jaaka pampiri e re kwalelang mo go yone, mmala wa meno a rona, tota le go phatsima ga mabone “di tla tokafala thata fa botegeniki bo ka tsaya le go dirisa mokgwa o khukhwane eno e dirilweng ka yone.”

O akanya eng? A kgapetla e tshweu ya khukhwane ya “Cyphochilus” e nnile teng fela ka boyone? Kgotsa a e ne e tlhamilwe?

[Setshwantsho mo go tsebe 24]

Khukhwane ya “Cyphochilus” e lekana le ntlhana ya monwana wa gago (setshwantsho se godisitswe)

[Motswedi wa Setshwantsho]

Department of Entomology, Kasetsart University, Bangkok