Ditiragalo Tsa Lefatshe

◼ Clam, mofuta wa kgopa e e ntshitsweng kwa tlase ga Lewatle la North Atlantic e ne ya kaiwa fa e le “phologolo e e tshetseng lobaka lo loleele go gaisa.” Baitsesaense ba ne ba bala dileyara tse di golang mo legapeng la yone mme ba ne ba lemoga gore e na le dingwaga di le 405.—SUNDAY TIMES, BRITAIN.

◼ “Fa maemo a ikonomi a wela tlase, tota le batho ba ba humileng thata ba a amega. Batho ba ba ntseng jalo ba tlhoka thuso ya dingaka tsa bone tsa malwetse a tlhaloganyo gore ba lepalepane le bothata jono.” —THE NEW YORK TIMES, U.S.A.

Thelebishene e Ama Boitshwaro Jwa Tlhakanelodikobo

Setlhogo sengwe se se gatisitsweng mo lokwalopakeng lwa Pediatrics se ne sa re: “Go na le bosupi jo bontsi jwa gore go lebelela tlhakanelodikobo mo thelebisheneng go ama maikutlo le boitshwaro jwa basha ka tlhakanelodikobo.” Tota e bile go ya ka patlisiso nngwe, bana ba ba simololang dingwaga tsa bosha ba ba lebelelang thata dithulaganyo tseo “go ka direga ka makgetlho a a menaganeng gabedi gore ba nne baimana,” go feta ba ba di lebelelang go le gonnye fela. Lebaka lengwe la seno ke gore thelebishene e naya basha kgopolo ya gore tlhakanelodikobo ga e na dikotsi dipe, ka gonne mathata a a tshwanang le go ima motho a sa batle le malwetse a a tshelanwang ka tlhakanelodikobo ga a bontshiwe e le dilo tsa mmatota. Tota e bile, thelebishene ke nngwe ya dilo tse di bopang boitshwaro jwa basha jwa tlhakanelodikobo. Babatlisisi gape ba akantsha gore go tshwanetse ga elwa tlhoko thata le dimakasine, Internet le mmino.

Dipalo Tse di Oketsegileng Tsa Lepero

Dikete di le tharo tsa batho kwa United States di alafelwa lepero, le gape le bidiwang bolwetse jwa Hansen. Go na le batho ba bangwe ba ba ka nnang 150, ba ngwaga le ngwaga go lemogiwang gore ba na le bolwetse jono. Bontsi jwa batho bano ke ba ba tswang kwa dinageng tse dingwe. Le fa go ntse jalo, mokgatlho wa National Hansen’s Disease Program o o leng kwa Baton Rouge, kwa Louisiana, “o bona batho ba ba nang le bolwetse jono ba ba ka nnang 30 ngwaga le ngwaga, ba e leng baagi ba kwa Louisiana le Gulf Coast of Texas ba ba neng ba tsholelwa kwa United States, mme e bile ba ise ba ko ba etele naga epe e e nang le bolwetse jono,” go bolela jalo American Society of Tropical Medicine and Hygiene. Babatlisisi ba sa ntse ba sa tlhaloganye gore bolwetse jono bo anama jang. Fa lepero le lemogiwa le sa ntse le simologa, le ka alafiwa gotlhelele. Mme le fa go ntse jalo, fa bolwetse jono bo setse bo aname mo mmeleng, ditshikana tse di senyegileng di ka se tlhole di kgona go baakanngwa.

Bogodu Jwa Dilwana Tse di Nang le Marang a a Botlhole

Mohamed ElBaradei yo e leng motsamaisimogolo wa International Atomic Energy Agency a re: “Kgang ya gore go ka direga gore dirukhutlhi di fitlhelele didirisiwa tsa nuklea kgotsa dilwana tse di nang le marang a a botlhole ke matshosetsi a magolo.” “Palo e e begetsweng Mokgatlho ono malebana le bogodu kgotsa go latlhega ga didirisiwa tsa nuklea kgotsa dilwana tse di nang le marang a a botlhole e kwa godimo ka tsela e e boifisang—e leng palo e e batlang e tshwara 250 go simolola ka January go fitlha ka June 2008. Selo se sengwe gape se se tshwenyang ke gore didirisiwa le dilwana tseno ga di ke di bonwa.” Ga go itsewe sentle gore a seemo seno se bakiwa ke go tlhokega thata ga dilwana tse di nang le marang a a botlhole, kgotsa a ke ka go bo dinaga dingwe tse e leng maloko a mokgatlho ono di ntshitse dipego tse di nepileng tsa dilo tse di latlhegileng.

Mokwalo wa Bogologolo o o Bonweng Kwa Iseraele

Baithutamarope ba kwa Iseraele ba bone mokwalo wa bogologolo o go bonalang o kwadilwe dingwaga di le 1 000 pele ga Memeno ya Lewatle le le Suleng. Mokwalo ono o o nang le mela e le metlhano e e kwadilweng ka enke mo dikapetleng tsa letsopa, o ne wa bonwa mo dilong tse di epolotsweng kwa Khirbet Qeiyafa kwa Iseraele mo ntlong ya phemelo ya kwa Judea ya lekgolo la bolesome la dingwaga B.C.E. Pego ya dikgang go tswa kwa Hebrew University of Jerusalem e bolela gore, mokwalo ono ga o ise o ranolwe otlhe, mme gone go bonala mokwalo ono o kwadilwe ke mokwadi yo o thapisitsweng e bile o na le “mafoko a a tsamaisanang le mafoko a a jaaka, ‘moatlhodi,’ ‘lekgoba’ le ‘kgosi.’”

[Motswedi wa Setshwantsho mo go tsebe 30]

Gabi Laron/Institute of Archaeology/Hebrew University © Yosef Garfinkel