Botswerere Jwa go Dira “Espresso”

E re ka go na le dibilione tsa batho ba ba nwang kofi ngwaga le ngwaga, kofi e setse e le senō se se ratiwang thata mo lefatsheng.

LOKWALOPAKA lwa Scientific American lo bolela gore, mo barating bangwe ba kofi, espresso e e titietsweng sentle “ke yone kofi e e monate go di gaisa tsotlhe, ka gonne tsela e e kgethegileng e e dirwang ka yone e dira gore moutlwalo wa dinawa tsa yone o utlwale botoka.” Go dirwa ga yone go akaretsa go tshela metsi a a belang mo kofing e e sitsweng.

Mankge mongwe wa madirelo a kofi o ne a bolelela Tsogang! jaana: “Batho ba itumelela mefuta e e farologaneng ya kofi e e dirilweng ka tsela eno kwa mafelong a a dirang kofi mme ba batla go dira kofi e e ntseng jalo le kwa gae.” Metšhine mengwe ya kofi e e dirisiwang kwa gae e kgona go dira seno. Ka ntlha ya seo, kwa dinageng dingwe batho ba le bantsi ba simolola go rata espresso e e itiretsweng kwa gae.

A o monwi wa kofi? A o ka rata go nna setswerere sa go dira mofuta ono wa kofi? Motho o tlhoka go dira eng gore a dire mofuta ono wa kofi sentle? John le rraagwe e bong Gerardo, ba e leng baitse ba dinawa tse di gadikilweng tsa kofi, ba ba nnang kwa Sydney, Australia ba ne ba bodiwa potso eo ke Tsogang!

Go e Tswakanya ka Tsela e e Tshwanelang Kgo!

Madirelo a kofi a ga John le Gerardo, a na le dikgetsi tse dintsi tsa dinawa tse di sa gadikiwang tse di tswang kwa dinageng tse di farologaneng. John a re: “Ke tlhakanya dinawa tsa mefuta e e farologaneng tse di sa gadikiwang ke di tswakanya sentle go ya ka resepe. Mofuta mongwe le mongwe wa dinawa o farologane le e mengwe mme o na le seabe mo tseleng e motswako wa kofi o utlwalang ka yone. Go tsaya nako gore motho a fitlhelele moutlwalo o a o batlang. Tota e bile, ke ile ka fetsa dikgwedi di le thataro ke lekeletsa motswako wa rona wa espresso gore o tshwanele kgo!” Ga go gakgamatse go bo bagadiki ba dinawa tsa kofi ba sa batle gore ope a itse resepe ya bone!

Gerardo ke ene a okametseng tiro ya go gadikiwa ga dinawa tsa kofi, e leng tiro e e tlhokang thapiso e ntsi, ka gonne go gadika go fetola motswako wa dikhemikale mo dinaweng tsa kofi mme go dira gore go nne le dikhemikale tse di fetofetogang di ka nna 500. Fa dinawa di ntse di biloga mo segadiking sa kofi—tanka e e goteditsweng ka gase—di a thuthafala go fitlha di nna le modumo wa go thunya fa metsi le khabonetaeokosaete di tswa mme dinawa di kokomoga. Go kokomoga gono go thuba matlape a a mo dinaweng, go bo go dira gore go tswe dioli tse di nkgang monate. Dioli tseno tsone, ke tsone di nayang espresso tatso le moutlwalo wa yone. Botswerere jwa seno bo ikaegile ka go kgona go gadika dinawa ka tsela e e tshwanetseng, o dirisa mogote wa selekanyo se se tshwanetseng le go di gadika ka lobaka lo lo tshwanetseng.

Fa dinawa di siame, Gerardo o tshela dinawa tseno tse di bolelo e bile di le mmala o o borokwa mo serotwaneng sa tshipi a bo a di futswela ka moya o o tsiditsana gore di se ka tsa sha. John a re: “Morago ga letsatsi le le lengwe kgotsa a mabedi fa dinawa di sena go gadikiwa, moutlwalo wa kofi o tla bo o le monate tota.” Dioli tse di ntshang moutlwalo di tla bo di siametse go dira kofi.

Botswerere Jwa go e Titiela

John o tlhalosa jaana: “Go dira espresso ke mongwe wa mekgwa e e duleng diatla le e e seng motlhofo go gaisa yotlhe ya go dira kofi.” Go dira espresso e e di gaisang tsotlhe go tlhoka motho botswerere jwa go latela dikgato tseno tse tharo tsa konokono ka kelotlhoko: go sila dinawa (1), go papiela dinawa tse di sitsweng mo teng ga serotwana se se tlhotlhang sa motšhine wa kofi (2), le go tshela selekanyo se sennye se se tswang fa e tlhotlhiwa (3). John a re: “Go botlhokwa thata go sila dinawa sentle. Fa dinawa di sa silega sentle kofi e tla nna metsi. Mme fa e silegile thata, kofi e tla nna bogalaka le go utlwala e shele. Fa kofi e tswa mo motšhineng go tla bo go na le lefulo la mmala wa gauta mo godimo ga yone—lefulo leno le supa kafa dioli tsa dinawa tsa kofi di ntshitsweng sentle ka teng.”

Fa John a sena go sila dinawa, o dirisa sedirisiwa sengwe se se papielang se se bidiwang tamper go di papiela thata mo teng ga serotwana se se tlhotlhang, a dira gore kofi e nne monate. Morago ga foo, o tsenya serotwana seo se se tlhotlhang mo teng ga motšhine, a bo a bulela pompo. Mme go bo go tswa seedi se se mmala o o borokwa mo motšhineng. John yo o nang le maitemogelo o kgona go bona ka bonako fa dinawa di sa silega sentle. A re: “Gantsi motho o tshwanetse go lekeletsa ka makgetlho a le mmalwa go dira espresso e e monate e e tshwanelang kgo! A re leke gape, mme jaanong re dirise dinawa tse di sitsweng thata. Mme gape re tla papiela kofi thata gore e rothe ka bonya.”

John o dira diphetogo tse di tlhokegang mme a bo a dira gore motšhine o simolole go titiela kofi gape. Espresso e e tletseng lefulo e tla bo e tswa mo setlhotlhing ka bonya mme a bo a tshela tswina ya dinotshe e e mogote. Fa John a utlwa monko wa yone o o monate, o a nyenya a bontsha gore o kgotsofetse. A re: “Go botlhokwa thata gore re emise go tshela kofi fa mmala wa yone o o borokwa o simolola go fela.” Seno se tsaya metsotswana e ka nna 30. O oketsa jaana: “Go tswelela o tshela kofi go tla dira fela gore e utlwale e le bogalaka le gore go tswe khafeine e ntsi.”

John a re: “Ke akanya gore re sa tswa go dira espresso e e tshwanelang kgo, e e nang le lefulo le le ntsi.” “A go na le mongwe yo o ka ratang go nwa kofi?”

Batho bangwe ba rata espresso ya bone e le ya maemo a a kwa godimo, e gantsi ba e bitsang short black. Ka mafoko a mangwe, ga ba tsenye sepe mo seeding seno fa e se sukiri e nnye fela. Le fa go ntse jalo, ba bangwe, ba tshela mashi a a bolelo gore ba dire cappuccino, latte kgotsa mefuta e mengwe e mentsi ya espresso. Fresh Cup Magazine ya re: “Gompieno, dino tsa espresso tse di tshetsweng mashi di dira diperesente tse di fetang 90 tsa dino tsotlhe tse di rekisiwang tsa espresso.”a

Ke boammaaruri gore go tlotla le ba bangwe o ntse o nwa sengwe se se monate—kofi kgotsa teye, go ikaegile ka gore o rata eng—ke sengwe sa dilo tse di sa reng sepe mme e le se se itumedisang thata mo botshelong. John a re: “Dino tse di monate di dira gore batho ba itumelele go kopana mmogo. Gongwe  seno ke sone se se dirang gore di ratiwe thata jaana!”

[Ntlha e e kwa tlase]

[Lebokoso/Setshwantsho mo go tsebe 15]

GO REKA KOFI LE GO E BOLOKA

Buka nngwe e e gakololang batho ka kgang ya go reka kofi ya re: “Kofi e e gadikilweng e simolola go latlhegelwa ke moutlwalo wa yone morago ga beke, kofi e e sitsweng yone e latlhegelwa ke moutlwalo ura morago ga go silwa mme kofi e e titietsweng yone e latlhegelwa ke moutlwalo morago ga metsotso e le mmalwa.” Ka jalo, fa o ithekela dinawa tsa kofi, go botoka gore o se ka wa reka tse dintsi mme o di boloke mo lefelong le le tsiditsana le le le lefifi. O se ka wa di tsenya mo setsidifatsing, ka gonne di ka nna tsa monya bongola mme tsa latlhegelwa ke moutlwalo wa tsone. Mme ka metlha titiela kofi ya gago ka bonako fela fa o sena go e sila.

[Motswedi wa Setshwantsho mo go tsebe 15]

Photo 3: Images courtesy of Sunbeam Corporation, Australia