Baebele ya Reng

A go Tshwanetse ga Nna le Pharologano fa Gare ga Baruti le Bathofela?

Moruti yo Mogolo, Moruti, Rara, Rara yo o Boitshepotshepo, Rabi, Yo o Kwa Godimo, Motlotlegi, Moitshepi, Moitshepi yo Mogolo—tseno ke dingwe tsa direto tse di farologanyang baruti ba madumedi a a farologaneng le bathofela. Go farologanngwa ga baruti le bathofela ke sengwe se se tlwaelegileng mo madumeding a mantsi mme a ke thulaganyo e e tswang kwa Modimong kgotsa a ke ngwao ya batho? Sa botlhokwa le go feta, a Modimo o a go amogela?

POROFESA wa thutabodumedi e bong Cletus Wessels o ne a kwala jaana: “Mo Tesetamenteng e ntšha le mo motlheng wa baaposetoloi, ga go na gope mo go buiwang ka baruti le bathofela.” Encyclopedia of Christianity e tlhalosa jaana: Mokgwa wa gore go nne le go farologanya baruti ba ba etelelang pele le bathofela o simolotse ka iketlo . . . Bathofela ba ba neng ba ya kerekeng ba ne ba tsewa ba sa itse sepe ka Modimo le ka Baebele. Go farologanya batho ka tsela e e ntse jalo go ne ga oketsega mo lekgolong la boraro la dingwaga C.E.—dingwaga tse di fetang makgolo a mabedi morago ga go tla ga ga Jesu Keresete mo lefatsheng!

Ka jalo, fa e le gore go farologanya baruti le bathofela ga se sengwe se se tlhomilweng ke baaposetoloi ba ga Jesu le Bakeresete ba bangwe ba bogologolo, a go phoso? Go ya ka Baebele, go phoso. Ela tlhoko gore ke ka ntlha yang fa go le phoso.

“Lona Lotlhe lo Bakaulengwe”

Lefoko la Modimo le re bolelela gore Bakeresete botlhe ke badiredi ba Modimo mme ga go na ope yo o kwa godimo ga yo mongwe kgotsa yo o kwa tlase ga yo mongwe. (2 Bakorintha 3:5, 6) Mokwadi wa dilo tsa bodumedi e bong Alexandre Faivre o ne a re: Bakeresete ba bogologolo “ba ne ba gatelela gore go se ka ga nna le go farologana gareng ga bone.” Go gana gore go nne le go farologana goo go dumalana le mafoko a ga Jesu a a neng a a bolelela balatedi ba gagwe a a reng: “Lona lotlhe lo bakaulengwe.”—Mathaio 23:8.

Mme gone, banna ba ba godileng semoyeng e ne e le balebedi ba ba neng ba akaretsa badisa le barutisi. (Ditiro 20:28) Le fa go ntse jalo, banna bano e ne e se baruti ba ba duelwang. Bontsi jwa bone e ne e le banna ba ba tlwaelegileng ba ba berekang—banna ba ba nyetseng le borre. Mo godimo ga moo, ba ne ba tshwanelegela go nna balebedi e seng ka go bo ba ile dikolong tse di kgethegileng tsa boruti mme e le ka go bo e le baithuti ba ba tlhoafetseng ba Lefoko la Modimo le ka go bo ba lwela go nna le dinonofo tsa semoya tse Modimo a batlang gore ba nne le tsone. Dinonofo tseno di akaretsa go nna ‘tekatekano mo mekgweng, go itekanela sentle mo mogopolong, go dira dilo ka thulaganyo, go tshola baeng, go tshwanelega go ruta, go nna tekatekano, go sa rate ntwa, go se nne morati wa madi, go nna monna yo o okamelang ba ntlo ya gagwe ka mokgwa o o molemo.’—1 Timotheo 3:1-7.

Lebaka La go Bo go Le Botlhale go Ngaparela Baebele

Baebele ya re: “Lo se ka lwa ya ka kwa ga dilo tse di kwadilweng.” (1 Bakorintha 4:6) Ka maswabi, fa batho ba itlhokomolosa kaelo e e tswang go Modimo, ba senya botsalano jo ba nang le jone le Modimo, mme ke se se diregang mo thulaganyong ya go farologanya baruti le bathofela. Jang? Tsweetswee akanya ka dintlha tse thataro tse di latelang.

1. Go farologanya batho ka maemo a boruti go raya gore motho o tshwanetse go bo a tlhophilwe ka tsela e e kgethegileng gore a nne modiredi wa Modimo. Le fa go ntse jalo, Baebele ya re Bakeresete botlhe ba boammaaruri ba tshwanetse go direla Modimo le go baka leina la gagwe. (Baroma 10:9, 10) Fa go tla mo kgannyeng ya go nna modiredi mo phuthegong, banna botlhe ba Bakeresete ba kgothalediwa go kgaratlhela go nna le tshiamelo eo, e leng selo se se tlwaelegileng mo Basuping ba ga Jehofa.—1 Timotheo 3:1.

2. Go farologanya baruti le bathofela go dira gore baruti ba tlotlomale mme seo se supiwa ke direto tsa bodumedi tse ba bidiwang ka tsone. Le fa go ntse jalo, Jesu o ne a re: “Yo o itshwarang jaaka yo mmotlanyana mo gare ga lona lotlhe ke ene yo mogolo.” (Luke 9:48) Jesu o ne a akantse ka boikutlo jo bo ntseng jalo fa a ne a bolelela balatedi ba gagwe gore ba se ka ba bidiwa ka direto tsa bodumedi.—Mathaio 23:8-12.

3. Fa baruti ba duelwa, ba rwesa bathofela morwalo o o bokete bogolo jang fa e le gore baruti bao ba tshela botshelo jo bo manobonobo. Kafa letlhakoreng le lengwe, balebedi ba Bakeresete ba a bereka e le gore ba kgone go itlamela ka dilo tse ba di tlhokang mme ka go dira jalo, ba tlhomela ba bangwe sekao se se molemo.a—Ditiro 18:1-3; 20:33, 34; 2 Bathesalonika 3:7-10.

4. E re ka moruti a ikaega ka batho ba bangwe gore ba mo tlamele ka madi, a ka nna a raelesega go tlhofofatsa boammaaruri jwa Baebele gore a itumedise maloko a kereke. Tota e bile, Dikwalo di ne tsa bolelela pele gore seno se ne se tla direga. “Go tla nna le lobaka lwa nako lo ba tla se keng ba iteseletse go amogela thuto e e itekanetseng, mme, tumalanong le dikeletso tsa bone, ba tla ikokoanyetsa barutisi gore ditsebe tsa bone di tsikitliwe.”—2 Timotheo 4:3.

5. Go farologanngwa ga baruti le bathofela go dira gore batho ba bangwe ba akanye gore ke baruti fela ba ba tshwanetseng go tlhokomela dilo tsa semoya, mme bone ba tshwanetse fela go ya kerekeng beke le beke. Le fa go ntse jalo, Bakeresete botlhe ba tshwanetse go tshwenyega ka se ba se tlhokang mo semoyeng mme ba nne baithuti ba ba molemo ba Baebele.—Mathaio 4:4; 5:3.

6. Fa bathofela ba sa itse se Baebele e se rutang ba ka nna ba tsiediwa motlhofo ke baruti mme e bile ba ka ba ja ntsoma. Eleruri, hisitori e na le dikai tse dintsi tsa seo.b—Ditiro 20:29, 30.

E le gore ba latele se se leng mo Baebeleng, Basupi ba ga Jehofa ga ba na baruti mme ba na le badisa ba semoya ba ba sa duelweng mme ba direla letsomane la Modimo ka go rata. Ke eng o sa etele Holo ya Bogosi nngwe e e mo lefelong le o nnang mo go lone gore o iponele seo ka bowena?

[Dintlha tse di kwa tlase]

A O KILE WA IPOTSA GORE. . .

◼ Batho ba Modimo botlhe ba tshwanetse go lebana jang?—Mathaio 23:8.

◼ Banna ba Bakeresete ba tshwanelegela jang go nna balebedi mo phuthegong?—1 Timotheo 3:1-7.

◼ Ke eng fa Modimo a sa amogele kgang ya go farologanya baruti le bathofela?—1 Bakorintha 4:6.

[Mafoko a a mo go tsebe 23]

Go farologana le baruti, Jesu o ne a itshwara jaaka yo “mmotlanyana”