Basha ba Botsa Jaana

Nka Laola Jang Bogale Jwa Me?

O galefa gantsi go le kana kang?

□ Le ka motlha

□ Kgwedi nngwe le nngwe

□ Beke nngwe

□ Letsatsi le letsatsi le nngwe

Ke mang yo gantsi a ka dirang gore o galefe?

□ Ga go na ope

□ Ba o tsenang sekolo le bone

□ Batsadi

□ Bana ba gaeno

□ Ba bangwe

Fa tlase fano, tlhalosa seemo se gantsi se go galefisang.

□ ․․․․․

FA O tsentse letshwao la ✔ go bapa le “Le ka motlha,” le “Ga go na ope” mme wa tlogela phatla ya bofelo e sa kwalwa sepe, re a go akgola—o kgona go laola bogale jwa gago!

Le fa go ntse jalo, mongwe le mongwe o itshwara ka tsela e e farologaneng mo maemong a a gwetlhang mme mongwe le mongwe o na le ditlhaelo tse di rileng. Mokwadi wa Baebele e bong Jakobe o ne a re: “Rotlhe re kgotšwa makgetlo a le mantsi.” (Jakobe 3:2) Tota e bile, fa go tla mo kgannyeng ya go galefa, o ka nna wa ikutlwa jaaka Serena wa dingwaga di le 17.a A re: “Ke na le bogale jo bo nnang bo ntse bo gola mo teng ga me, mme ke bo ntshetsa mo go mongwe le mongwe fela yo o nkgopisang. E ka nna batsadi ba me, morwadiarre kgotsa le e leng ntša ya me!”

Go Farologanya Mainane le Boammaaruri

A go thata gore o laole bogale jwa gago? Fa e le gore go ntse jalo, o ka thusega. Mme sa ntlha, mma re bontshe kafa mainane a seng boammaaruri ka teng.

◼ Leinane: “Ga ke kgone go laola bogale jwa me—ke tsela e bontsi jwa ba lelapa la gaetsho ba ntseng ka teng!”

Boammaaruri: O ka tswa o le motho yo o “sekametseng mo tšararegong”—gongwe ka ntlha ya tlhotlheletso ya ba lelapa, tikologo e o leng mo go yone kgotsa ka ntlha ya mabaka a mangwe. Mme se o se dirang ka tšararego eo se ikaegile ka wena. (Diane 29:22) Potso ke gore, O batla go nna kae fa go tla mo kgannyeng ya maikutlo a gago—a o batla go kgweetsa kgotsa a o batla go nna mopalami fela? Bangwe ba ithutile go laola bogale jwa bone mme le wena o ka kgona!—Bakolosa 3:8-10.

Temana ya Konokono: “A kgakalo yotlhe ya letlhoo le bogale le tšhakgalo le go goa thata le puo ya go kgoba di tlosiwe mo go lona.”—Baefeso 4:31.

◼ Leinane: “Fa ke galefile, go botoka gore ke bontshe bogale jwa me go na le gore ke itshware.”

Boammaaruri: Mekgwa eno ka bobedi e ka nna kotsi mo botsogong jwa gago. Gone ke boammaaruri gore go na le nako ya “go bua” kaga go tshwenyega ga gago. (Jobe 10:1) Mme seo ga se reye gore o tshwanetse go nna o ntse o galefile o letetse fela gore mongwe a go kgopise gore o mo galefele. O ka kgona go ithuta go galefa o ntse o laola kgalefo ya gago.

Temana ya Konokono: “Motlhanka wa Morena ga a tlhoke go lwa, mme o tlhoka go nna bonolo mo  go botlhe, . . . a nna a ithibile.”—2 Timotheo 2:24.

◼ Leinane: “Fa nka nna ‘bonolo mo go botlhe,’ mongwe le mongwe o tla nkgatakaka fela.”

Boammaaruri: Batho ba ka kgona go lemoga gore go tlhokega maatla a mantsi go bontsha boikgapo, mme ba tla go tlotla thata fa o ka go dira.

Temana ya Konokono: “Fa go kgonega, kafa go ka kgonegang ka gone mo go lona, agisanang le batho botlhe.”—Baroma 12:18.

Go Laola Bogale Jwa Gago

Fa e le gore o motho yo o galefang motlhofo, gongwe go fitlha jaanong o ntse o pega batho ba bangwe molato go bo o galefa. Ka sekai, a o kile wa re “O nthumotse” kgotsa “Ke ene a dirileng gore ke galefe”? Fa e le gore go ntse jalo, mafoko ao a gago a bontsha gore batho ba bangwe ba laola tsela e o ikutlwang ka yone. O ka dira jang gore e nne wena o laolang maikutlo a gago? Leka se se latelang.

Amogela molato wa gago. Go simologa ka gore o dumele gore ke wena—wena fela—yo o ka kgonang go “dira” gore o galefe. Ka jalo tlogela go pega ba bangwe molato. Go na le gore o re “O nthumotse,” dumela gore, ‘Ke nna ke itetlileng gore a nthumole.’ Go na le gore o re, “Ke ene a dirileng gore ke galefe,” dumela gore ‘Ke nna ke itlhophetseng go galefa.’ Fa o ka dumela gore ke wena o leng molato ka se se diragetseng, o ka kgona go laola maikutlo a gago botoka.—Bagalatia 6:5.

Solofela mathata. Baebele ya re: “Batho ba ba botlhale ba tla bona mathata fa a tla mme ba tla a tila, mme motho yo o sa akanyeng o tla tsena ka tlhamalalo mo go one mme a bo a ikwatlhaya moragonyana.” (Diane 22:3 Today’s English Version) Ka jalo he, tharabololo e ka nna go solofela mathata. Ipotse gore, ‘Ke leng mo go diregang gore ke galefe?’ Ka sekai, mosetsana mongwe yo o bidiwang Megan a re: “Ke bereka bosigo, mme fa ke fetsa tiro ya me ke a bo ke lapile thata. Ke ka nako eo mo e keteng sengwe le sengwe se ka nkgalefisang.”

Potso: Ke mo maemong afe go ka diregang gore o galefe?

․․․․․

Ikemisetse go tsiboga ka tsela e e botoka. Fa o rumolwa, goga mowa, fokotsa modumo wa lentswe la gago mme o bue ka bonya. Go na le gore o latofatse motho ka gore (“Legodu ke wena! O tsere jeresi ya me o sa nkopa!”) leka go tlhalosa kafa seo se go amang ka teng. (“Go mpitisa pelo tota fa ke batla go apara jeresi ya me mme ke bo ke lemoga gore o e ‘ikadimile’ kwantle ga go nkopa.”)

Leka go dira se se latelang: Akanya ka seemo sengwe sa bosheng se mo go sone o ileng wa galefa.

1. Ke eng se se ileng sa go galefisa?

․․․․․

2. O ile wa itshwara jang? (O ile wa reng mme/ kgotsa o ile wa dira eng?)

․․․․․

3. O ka bo o ile wa tsibogela seo jang ka tsela e e botoka?

․․․․․

Akanya ka ditlamorago. Go na le melaometheo e le mmalwa ya Baebele e e ka go thusang go dira seo. Ka sekai:

◼ Diane 12:18 ya re: “Go na le yo o buang a sa akanye jaaka e kete ka ditlhabo tsa tšhaka.” Mafoko a ka utlwisa botlhoko, mme fa o ka galefa, ga go na pelaelo gore o tla bua sengwe se o tla se ikwatlhaelang moragonyana.

◼ Diane 29:11 ya re: “Sematla se ntsha moya wa sone otlhe, mme yo o botlhale o o boloka o ritibetse go fitlha kwa bofelong.” Kwa bofelong, go phamoga ka bogale go dira fela gore wena o lebege o le seeleele.

◼ Diane 14:30 ya re: “Pelo e e ritibetseng ke botshelo jwa setshedi sa senama.” Go galefa motlhofo ga go a siamela botsogo jwa gago! Mosetsana mongwe yo o bidiwang Anita a re: “Ba le bantsi mo lelapeng la gaetsho ba tshwenngwa ke haebolate mme e re ka ke ngomoga pelo ka bonako go dira  gore ke nne kelotlhoko gore ke se ka ka galefa.”

O ka ithuta eng mo go seno? Akanya ka ditlamorago tsa mafoko a gago le se o se dirang. Heather wa dingwaga di le 18 a re: “Ke ipotsa gore, ‘Go tla diragala eng fa nka galefela motho yono? O tla akanya eng ka nna? Go tla ama jang kamano ya rona? Ke ne ke tla ikutlwa jang fa mongwe a ne a ka dira nna jalo?’” Le wena o ka ipotsa dipotso tse di ntseng jalo pele ga o araba ka bogale ka go bua kgotsa ka go romela molaetsa—e ka tswa o o romela ka lekwalo, ka founo kgotsa o o romela ka sedirisiwa sengwe sa eleketoroniki kgotsa ka go kwala e-mail.

Potso: Go tla diragala eng fa mongwe a ka go kgopisa mme wena o bo o tsibogela seo ka go romela molaetsa o o supang kgalefo?

․․․․․

Kopa thuso. Diane 27:17 ya re: “Batho ba ithuta mo go ba bangwe, fela jaaka tshipi e lootsa tshipi.” (TEV) Ke eng o sa botse motsadi kgotsa tsala nngwe e e godileng gore ene o kgona jang go nna a ritibetse?

Ela tlhoko kgatelopele ya gago. Nna le buka e o kwalelang mo go yone mme o ele tlhoko kgatelopele ya gago. Nako nngwe le nngwe fa o palelwa ke go itshwara, kwala (1) gore go diragetse eng, (2) gore o ile wa itshwara jang le (3) tsela e e botoka e o ka tsibogelang seo ka teng. Fa nako e ntse e tsamaya, o tla fitlhela gore tsela e e botoka ya go tsiboga e nna yone ya ntlha e o e dirisang!

Go na le ditlhogo tse di oketsegileng tsa “Basha ba Botsa Jaana” tse o ka di bonang mo atereseng eno ya Internet www.watchtower.org/ype

[Ntlha e e kwa tlase]

DILO TSE O KA AKANYANG KA TSONE

Ka dinako tse dingwe, tota le batho ba re neng re sa akanya gore ba ka galefa ba ile ba galefa ka nakwana. Re ka ithuta eng mo dikaing tseno?

◼ Moshe.—Dipalo 20:1-12; Pesalema 106:32, 33.

◼ Paulo le Barenabase.—Ditiro 15:36-40.

[Lebokoso/Ditshwantsho mo go tsebe 18]

SE BALEKANE BA GAGO BA SE BOLELANG

“Fa ke tlhalosa maikutlo a me mo tayaring ya me—kgotsa ke a tlhalosetsa mmè—go nthusa gore ke nne ke ritibetse.”—Alexis, United States.

“Fa ke ngomogile pelo thata, go gwanta go fokotsa bogale mme go tsamaya kwa ntle go dira gore ke akanye sentle.”—Elizabeth, Ireland.

“Ke tlosa tlhaloganyo ya me mo seemong se se leng teng mme ke bo ke ipotsa gore, ‘Go tla direga eng fa nka simolola go omana?’ Gantsi ke lemoga gore go ka se thuse sepe!” —Graeme, Australia.

[Lebokoso mo go tsebe 18]

A O NE O ITSE?

Ka dinako dingwe Modimo ka boene o a galefa. Le fa go ntse jalo, ka metlha maikutlo a gagwe a a tshwanela, mme o a laola ka botlalo. Ga a ke a itshwara ka tsela e e sa tshwanelang!—Bona Ekesodo 34:6; Duteronome 32:4; le Isaia 48:9.

[Setshwantsho mo go tsebe 19]

Ke wena yo o tla dirang tshwetso ya gore a bogale jwa gago bo tswa mo taolong