A go Ka Nna le Lefatshe Le le Se Nang Borukhutlhi?

“GO TLHOKEGA maiteko a magolo . . . go fetola dipelo le megopolo ya bone.” Go ne ga fitlhelelwa tshwetso eno morago ga tlhatlhobo e e tsereng dingwaga di le 20 ka botho jwa batho ba go tweng ke dirukhutlhi.

Mme ke eng se se ka fetolang megopolo le dipelo tsa batho ba ba neng ba tseneletse thata mo ditirong tsa thubakanyo le tsa go ipusolosetsa?

Buka e e Kgonang go Fetola Dipelo

Mo dingwageng tsa bo1990, Hafeni o ne a simolola go sekaseka dilo tse a di dumelang tsa bodumedi jwa gagwe mme a swetsa ka gore a ipatlele Baebele. O ne a bolela jaana: “Ke ne ka simolola go sekaseka Diefangele [dibuka tsa Baebele tsa Mathaio, Mareko, Luke le Johane], tse di nang le kgang ya botshelo jwa ga Jesu. Fa ke ntse ke bala, ke ne ka kgatlhwa ka bonako fela ke botho jwa ga Jesu le tsela e e pelonomi le e e se nang tlhaolele e a neng a dirisana le batho ka yone. Seno se ne sa dira gore ke itumele.”

Fa a ntse a balela kwa pele, Hafeni a re: “Go na le temana nngwe ya Baebele e e ileng ya nkama thata—Ditiro 10:34 le 35.” E balega jaana: “Modimo ga a na tlhaolele, mme mo setšhabeng sengwe le sengwe motho yo o mmoifang a ba a dira tshiamo o a amogelesega mo go ene.”

Hafeni o ne a bolela jaana: “Ke ne ka swetsa ka gore batho ka bobone ke bone ba dirang gore go nne le bomorafe, bosetšhaba le letlhoo la merafe e mengwe. Ke ne ka lemoga gore molaetsa wa Baebele o ka kgona go fetola tsela e batho ba akanyang ka yone le gore selo se se botlhokwa thata mo botshelong ke go nna le kamano e e siameng le Modimo. Seno se botlhokwa thata go na le go lwela batho ba morafe, lotso kgotsa mmala o o rileng.”

Joseba yo o nopotsweng mo setlhogong se se fetileng, e ne e le moeteledipele wa setlhopha se sennye sa sesole se se neng se ikaeletse go phampholola seteishene sa mapodise ka bomo. Joseba o tlhalosa jaana: “Mme pele ga re ka diragatsa maikaelelo a rona, ke ne ka tshwarwa mme ka nna dingwaga di le pedi mo kgolegelong.” Moragonyana, mosadi wa gagwe e bong Luci, o ne a simolola go ithuta Baebele le Basupi ba ga Jehofa. Kgabagare Joseba o ne a kopanela mo metlotlong eo.

Joseba o gakologelwa jaana: “Fa ke ntse ke ithuta mo go oketsegileng ka Jesu, ke ne ka simolola go batla go etsa sekao sa gagwe. Mangwe a mafoko a gagwe a a neng a nkama thata, ke a a reng: ‘Botlhe ba ba tsayang tšhaka ba tla nyelela ka tšhaka.’ Ke ne ke itse gore seno se boammaaruri.” (Mathaio 26:52) Joseba o dumela jaana: “Go bolaya motho go rotloetsa fela letlhoo le go dira gore batho ba lelapa la gaabo motho yo o bolailweng ba batle go ipusulosetsa. Thubakanyo e baka kutlobotlhoko fela, ga e dire gore lefatshe le nne botoka.” Joseba o ne a simolola go dira diphetogo mo tseleng e a akanyang ka yone.

Hafeni le Joseba ba iponetse ka bobone gore dithuto tsa Baebele di ka kgona go ama botshelo jwa motho ka tsela e e maatla. Baebele e bolela go re “lefoko la Modimo le a tshela e bile le naya maatla” e bile le kgona go lemoga “maikaelelo a pelo.” (Bahebera 4:12) Maatla a Lefoko la Modimo a ile a thusa batho ba le bantsi gore ba fetole tsela e ba akanyang ka yone le ditiro tsa bone. A mme go na le bosupi jwa gore go na le kutlwano ya lefatshe lotlhe mo gare ga batho ba ruri ba dirisang dithuto tsa Baebele?

Bokaulengwe jo bo Theilweng mo Loratong

Fa Hafeni a ne a simolola go ya kwa dipokanong tsa Basupi ba ga Jehofa, o ne a kgatlhiwa thata ke kutlwano e e fa gare ga ditso e a neng a e bona. O ne a re: “Go dula go bapa le batho ba basweu go ne go nkgatlha tota. Le ka motlha ga ke ise ke ko ke akanye gore mo botshelong jwa me ke tla tsamaya ke bitsa monna yo mosweu mokaulengwe. Seno se ne sa ntlhatswa pelo le go feta gore bodumedi jwa Basupi e tshwanetse ya bo e le jwa boammaaruri, ka gonne ba ne ba na le kutlwano e ke neng ke e eletsa e bile ba ne ba ratana go sa kgathalesege go farologana ga bone ka ditso.”

Jesu o ne a re balatedi ba gagwe ba boammaaruri ba tla itsiwe ka ‘go ratana.’ (Johane 13:34, 35) Gape o ne a gana go nna le seabe mo dikgotlhang tsa dipolotiki mme a raya barutwa ba gagwe a re: “Ga lo karolo ya lefatshe.” (Johane 6:15; 15:19; Mathaio 22:15-22) Go ratana le go sa tseye letlhakore e ne e le dilo tse Bakeresete ba boammaaruri ba neng ba itsege ka tsone ka nako eo, fela jaaka go ntse le gompieno.

Go Dirisa se Jesu a se Rutileng

Mme lorato lo ka kgona jang go tlhotlheletsa batho fa ka fa letlhakoreng le lengwe borukhutlhi bo rotloediwa e bile bo dira gore batho ba kgaogane? Fa dikgang tsa dipolotiki di dira gore go nne le letlhoo, go ikanyega mo lotsong, mo setšhabeng kgotsa mo morafeng, gantsi go dira gore motho, kgotsa setšhaba, se nne kgatlhanong le se sengwe.

Ka sekai, ka 1914, boipelafatso jwa setso bo ne jwa dira gore Gavrilo Princip a bolaye Kgosanakgolo Francis Ferdinand, yo e neng e le mojaboswa wa setulo sa bogosi sa Austria le Hungary. Princip e ne e le leloko la setlhopha se se bidiwang Black Hand, se go ya ka molao wa sone se bolelang gore se rata “go lwela diphetogo go na le go . . . lwela dikgang tsa setso” gore se kgone go fitlhelela mekgele ya sone. Polao eno e ne ya dira gore go nne le ntwa fa gare ga ditšhaba tse di ipitsang tsa Bokeresete mme seno sa felela ka Ntwa ya Lefatshe I e e ileng ya dira gore go swe masole a le dimilione a a neng a bolela gore a latela Jesu, “Kgosana ya Kagiso.”—Isaia 9:6.

Fa ntwa e sena go khutla, moruti mongwe yo o itsegeng e bong Harry Emerson Fosdick, o ne a kgala baeteledipele ba ba ipolelang gore ke Bakeresete go bo ba sa rute maloko a bone gore ba latele sekao sa ga Jesu. O ne a kwala jaana: “Re thapisitse banna gore ba ye ntweng. Re dirile masole bagaka ba rona e bile re beile difolaga tsa ntwa mo dikerekeng tsa rona.” Fosdick o ne a konela jaana: “Ka melomo ya rona re bakile Kgosana ya Kagiso mme gape ka yone melomo eo re tlotlomaditse ntwa.”

Go farologana le seo, buka nngwe ya tsa thutoloago e e gatisitsweng ka 1975 e ne ya bolela jaana: “Basupi ba ga Jehofa ba ile ba nna ba tshegeditse boemo jwa bone jwa ‘boitlhaodi jwa Bokeresete’ ba sa fetoge ka nako ya dintwa tse pedi tse dikgolo tsa lefatshe le dintwa tse dingwe tsa sesole tse di nnileng teng ka nako ya ‘Ntwa ya Molomo.’” Tota le fa Basupi ba ile ba tshwarwa makgwakgwa le go tsenngwa mo kgolegelong, “le ka motlha ga ba ise ba ko ba ipusolosetse ka go dirisa dikgoka.” Buka eo e ne ya konela jaana: “Dithuto tsa Basupi ba ga Jehofa di theilwe mo go dumeleng ga bone gore Baebele ke lefoko le le tlhotlheleditsweng la Modimo.”

Botlhokwa Jwa go Dirisa Dithuto Tsa Baebele

Fa tonakgolo ya nako e e fetileng ya kwa Belgium a fiwa buka ke moagelani wa gagwe e e buang ka botshelo jwa ga Jesu e e nang le setlhogo se se reng Monna Yo Mogolo go Gaisa Botlhe Ba Ba Kileng Ba Tshela, o ne a amiwa thata ke se a neng a se bala. O ne a kwalela moagelani wa gagwe jaana: “Go bonala sentle gore fa batho ba ne ba ka kgatlhegela molaetsa wa Diefangele le go dirisa melaometheo ya ga Jesu Keresete, lefatshe le ka bo le farologane gotlhelele gompieno.”

O ne a oketsa jaana: “Re ka se tlhoke Lekgotla la Tshireletsego e bile go ka se ka ga nna le ditlhaselo tsa borukhutlhi [mme] thubakanyo e ne e tla thibelwa.” Le fa go ntse jalo, o ne a konela jaana: “Seno ke go ijesa dijo tsa ditoro fela.” A mme gone go ntse jalo? Tota le e leng gone jaanong, mo nakong eno e lefatshe le tletseng thubakanyo ka yone, Baebele e thusitse batho ba le bantsi ba ba farologaneng gore ba gane go dirisa dikgoka le gore ba fenye letlhoo le legolo le le nnang gone ka ntlha ya go bona batho ba bolawa go sa tlhokege ka masomesome a dingwaga.

Jaaka go tlhalositswe mo setlhogong sa rona sa ntlha, Andre o batlile a bolawa ke bomo e e bolaileng ditsala tsa gagwe di le mmalwa. E ne e tlhomilwe ke setlhopha sengwe sa balwelakgololesego. Moragonyana o ne a ithuta a bo a dirisa kgakololo ya Baebele ya gore motho o tshwanetse go ‘itshwarela ka kgololesego.’ (Bakolosa 3:13) Moragonyana, Hafeni, yo o neng a nna leloko la setlhopha seo dingwaga di le dintsi morago ga go thunya ga bomo eo, o ne a ithuta go dirisa melaometheo ya Baebele a bo a tlogela thubakanyo. (Pesalema 11:5) Gone jaanong, bobedi jwa bone ke Basupi ba ga Jehofa mme ba dira mmogo kwa ofising ya thanolo ya Basupi kwa nageng nngwe ya Afrika.

Tsholofelo ya Isagwe e e Babalesegileng

Batho ba le dimilione go ralala lefatshe ba lemogile gore go ithuta Baebele go dira gore ba nne le tsholofelo ka isagwe e e babalesegileng. Ka sekai, ka letsatsi lengwe, Andre o ne a bontsha moagelani mongwe tsholofetso ya Baebele ya lefatshe le lesha la tshiamo. (Isaia 2:4; 11:6-9; 65:17, 21-25; 2 Petere 3:13) Ka tshoganyetso fela, masole a a tshwereng dibetsa a ne a dikologa ntlo mme a laela Andre gore a tswe gore ba tle go mmotsa dipotso. Fa masole a sena go utlwa gore Andre ke morutisi wa Baebele yo moagelani wa gagwe a mo ratang thata, a ne a tsamaya.

Andre o ne a sa tswa go tlhalosa gore Modimo o tla tsaya kgato mo dikgannyeng tsa batho, jaaka a dirile mo motlheng wa ga Noa fa “lefatshe [le ne le] tletse thubakanyo.” (Genesise 6:11) Modimo o ne a fedisa lefatshe la nako eo ka morwalela wa lefatshe lotlhe mme a boloka monna yo o ratang kagiso e bong Noa le ba lelapa la gagwe. Jesu o ne a re: “Fela jaaka malatsi a ga Noa a ne a ntse, go nna gone ga Morwa motho go tla nna jalo.”—Mathaio 24:37-39.

Jesu, “Morwa motho,” ke Mmusi yo Modimo a mo tlhophileng go busa mo pusong ya kwa legodimong e e bidiwang Bogosi jwa Modimo mme go ise go ye kae o tla etelela masomosomo a Modimo a kwa legodimong pele go fedisa thubakanyo mo lefatsheng. (Luke 4:43) Jaaka Kgosi ya kwa legodimong, Jesu o tla ‘direla mongwe le mongwe tshiamiso mme go tla nna le kagiso.’ O tla sireletsa batho ba a ba busang “mo dintshong tse di setlhogo le tsa thubakanyo.”—Pesalema 72:7, 14, Contemporary English Version.

Morago ga foo, botlhe ba ba ratang se se siameng le ba ba busiwang ke Kgosi eno ya kwa legodimong ba tla bona lefatshe le fetolwa go nna paradaise e e nang le kagiso. (Luke 23:42, 43) Baebele e solofetsa gore “kagiso le tshiamiso” di tla “busa mo thabeng le mo thoteng nngwe le nngwe.”—Pesalema 72:1-3, CEV.

A o ka se rate go tshela mo lefatsheng le le busiwang ke kgosi e e ntseng jalo? Ruri lefatshe leno e tla nna le le se nang borukhutlhi.

[Mafoko a a mo go tsebe 7]

Hafeni le Joseba ba iponetse ka bobone gore dithuto tsa Baebele di ka kgona go ama botshelo jwa motho ka tsela e e maatla

[Mafoko a a mo go tsebe 9]

‘Fa batho ba ka bo ba dirisa melaometheo ya ga Jesu Keresete, lefatshe le ka bo le farologane gotlhelele gompieno. Re ka se tlhoke Lekgotla la Tshireletsego e bile go ka se ka ga nna le ditlhaselo tsa borukhutlhi mme thubakanyo e ne e tla thibelwa.’—Tonakgolo ya nako e e fetileng ya kwa Belgium

[Setshwantsho mo go tsebe 8]

Go dirisa melaometheo ya Baebele go thusitse Hafeni le Andre gore ba ratane ka lorato lwa mmatota