4. Nna Kelotlhoko fa o Jela Kwa Marekisetsong a Dijo

Jeff, monna yo o itekanetseng wa dingwaga di le 38 e bile a le matlhagatlhaga, o ne a ntsha ba lelapa la gagwe go ya go ja kwa resetšhurenteng nngwe gaufi le Pittsburgh, Pennsylvania, U.S.A. Morago ga kgwedi, Jeff o ne a tlhokafala ka ntlha ya bolwetse jo bo masisi jwa sebete. Ke eng se se bakileng bolwetse joo? Dieiye tse di neng di le mo dijong tsa gagwe di ne di na le mogare wa hepatitis A.

MO E ka nnang halofo ya madi otlhe a a dirisiwang mo dijong kwa nageng nngwe e e kwa Bophirima a dirisiwa mo diresetšhurenteng. Le fa go ntse jalo, mo nageng yone eo, gantsi dijo tsa kwa resetšhurenteng di baka mo e ka nnang halofo ya malwetse a a bakwang ke dijo tse di kgotletsweng.

Gone ke boammaaruri gore fa o tlhopha go ja kwa resetšhurenteng, ga se wena o tla rekang dijo tse di tlileng go apewa, ga se wena o tla phepafatsang phaposi ya boapeelo e bile ga se wena o tla di apayang. Le fa go ntse jalo, o ka tlhopha gore o tla ja kae, o tla ja eng le gore a o tla tsaya dijo tse o di sadisitseng fa o ya gae.

● Sekaseka lefelo le o tla jelang mo go lone.

Daiane, yo o nnang kwa Brazil, a re: “Fa re ya kwa resetšhurenteng lekgetlho la ntlha, ke sekaseka lefelo leo go bona gore a ditafole, matsela a ditafole, dijana le batho ba ba tsamaisang dijo ba lebega ba le phepa e bile ba le bothakga. Fa go sa nna jalo re a tsamaya mme re batla resetšhurente e nngwe.” Mo dinageng dingwe badiredibagolo ba tsa boitekanelo ba tlhola diresetšhurente ka metlha gore a di phepa ba bo ba manega pego ya se ba se boneng mo batho botlhe ba ka kgonang go e bona teng.

● Nna kelotlhoko fa o ya gae ka dijo tse o di sadisitseng kwa resetšhurenteng.

Food and Drug Administration ya kwa United States e gakolola jaana: “Fa e le gore o tla bo o ise o goroge kwa gae pele go wela diura di le pedi o sena go newa dijo, o se ka wa tsaya dijo tse di setseng.” Fa o sadisitse, ya gae ka tlhamalalo fa o fetsa go ja o bo o fitlha o tsenya dijo tse di setseng mo forijing, bogolo jang fa e le gore go mogote o o fetang didikirii di le 32.

Fa o latela ditsela tse nnè tse di tlhalositsweng mo motseletseleng ono wa ditlhogo, o ka dira gore dijo tsa gago di se ka tsa nna kotsi.

[Lebokoso/Setshwantsho mo go tsebe 7]

THAPISA BANA BA GAGO: “Re ruta bana ba rona gore ba tile dijo tse di ka nnang kotsi go jewa.”—Noemi, Philippines