Go Tlhaola Batho ba Bangwe A O TLHAOLA BA BANGWE?

Go le gantsi, batho ba ka tswa ba tlhaola ba bangwe ka ntlha ya lotso lwa bone, mmala wa bone, naga e ba tswang kwa go yone kgotsa puo e ba e buang. Mme go na le dilo tse dingwe gape tse di ka dirang gore batho ba tlhaole ba bangwe jaaka bodumedi jwa bone, bong jwa bone, tsela e ba lebegang ka yone kgotsa maemo mangwe a ba nang le one. Gompieno batho ba tseela ba bangwe kwa tlase ka gonne ba le bannye mo go bone, ba sa rutega thata jaaka bone kgotsa ba na le bokoa bongwe mo mmeleng. Le fa gone ba tsaya batho ba bangwe jalo, bone ga ba akanye gore ba a ba tlhaola.

A le wena o ka tswa o na le bothata jwa go tlhaola batho ba bangwe? Re ka tswa re lemoga gore batho ba na le bothata jwa go tlhaola ba bangwe mme gone re sa lemoge gore le rona re na le jone. Nnete ke gore rotlhe re na le bothata jwa go tlhaola ba bangwe. Porofesa wa thutoloago e bong David Williams a re: “Fa batho ba sa rate batho ba o tsamayang le bone, ba tlile go go tshwara ka tsela nngwe e e rileng mme ba sa lemoge.”

Ka sekai, go na le setlhotshwana sengwe se batho ba neng ba sa se rate kwa Bulgaria. Jovica a re: “Ke ne ke nagana gore ga go na ope yo o siameng mo setlhotshwaneng seo. Mme ke ne ke sa akanye gore ke ne ke ba tlhaola ka tsela nngwe, ka gonne ke ne ke ithaya ke re dilo tse ke di akanyang ka bone ke nnete.”

Dipuso di dirile melao gore go se ka ga nna le tlhaolele. Mme le fa go ntse jalo batho ba sa ntse ba tlhaola ba bangwe. Goreng? Ka gonne melao eo ga e kgone go laola maikutlo kgotsa dikakanyo tsa batho. Se re se akanyang ka batho ba bangwe ke sone se se dirang gore re feleletse re ba tlhaola. A mme seno se raya gore maiteko a go fedisa tlhaolele ga a kitla a atlega? A mme gone tlhaolele e tla tsamaya e fela?