A o Ttlhoilwe ka Ntlha ya Tlhaolele?

KE ENG se se tshwanang ka thubakanyo ya merafe, bomorafe, tlhaolele le go gailwa ga merafe? Tsotlhe di bakiwa ke temalo e batho ba nang le yone e e anameng gongwe le gongwe—e leng letlhoo la tlhaolele!

Letlhoo la tlhaolele ke eng? Saetlopedia nngwe e le tlhalosa e le “tsela e motho a akanyang ka yone a sa iphe nako ya go leba dilo sentle pele kana a sa kgathalele go dira jalo.” Jaaka batho ba ba sa itekanelang, re tlwaetse go nna le letlhoo la tlhaolele go ya bokgakaleng jo bo rileng. Gongwe o ka akanya ka makgetlo a o neng wa leba dilo ka tsela nngwe ka one mme o sena mabaka otlhe a a utlwalang a go bo o dirile jalo. Baebele e farologanya ditemalo tseo tse di nang le letlhoo leno le tsela e Jehofa Modimo a lebang dilo ka yone. E bolela jaana: “Jehofa ga a bone jaaka motho a bona; gonne motho o leba bokafantle, mme Jehofa o leba pelo.”—1 Samuele 16:7.

Letlhoo Leno le ka Utlwisa Motho Botlhoko

Ga go belaetse gore ka nako nngwe mongwe le mongwe o kile a se ka a tlhaloganngwa ke yo mongwe. (Bapisa Moreri 7:21, 22.) Ka kakaretso fela, rotlhe re tlhoilwe ka ntlha ya tlhaolele. Lefa go ntse jalo, fa re ntsha megopolo e e nang le letlhoo leno ka bonako, e ka nna ya se ka ya utlwisa motho yo mongwe botlhoko. Go boloka megopolo e e ntseng jalo mo go rona ke gone go ka utlwisang botlhoko. Go ka re tsietsa gore re dumele maaka. Ka sekai, batho ba bangwe ka go bo ba na le letlhoo la tlhaolele ba dumela tota gore motho o ka nna bohula, setshwakga, sematla, kana a nne boikgodiso fela ka gonne e le mongwe wa setlhopha se se rileng sa bodumedi, sa morafe, kana sa setšhaba se se rileng.

Ka makgetlo a le mantsi, go sa tlhaloganye ba bangwe jalo go dira gore o se ka wa ba tshwara sentle, o nne setlhogo mo go bone, kana o ba tshware makgwakgwa. Dimilione tsa batho di bolailwe mo dikganyaolong tsa batho, mo go gailweng ga merafe, mo dipolaong tsa merafe, le mo mefuteng e mengwe ya letlhoo leno le le feteletseng.

Mo lefatsheng lotlhe, dipuso di lekile go fedisa letlhoo la tlhaolele ka go dumelela tshwanelo e e kafa molaong e e ka se kang ya tlolwa ya gore batho ba nne le kgololesego, pabalesego le go lekalekana. Fa o bala molaotheo kana melao ya konokono ya naga ya ga lona, ga go belaetse gore o tla fitlhela seelenyana kana go baakantswe golo gongwe ka boikaelelo jwa go sireletsa ditshwanelo tsa baagi botlhe, go sa kgathalesege lotso lwa bone, bong, kana bodumedi. Lefa go ntse jalo, letlhoo la tlhaolele le aname gongwe le gongwe mo lefatsheng lotlhe.

A o tlhoilwe ka ntlha ya tlhaolele? A o ile wa tsewa gore o motho yo o bohula, yo o setshwakga, yo o sematla, kana yo o ikgodisang, e le fela ka ntlha ya lotso, dingwaga, bong, botšhaba, kana bodumedi? A o timiwa sebaka sa go nna le thuto e e tshwanetseng, tiro, ntlo, le ditirelo tsa setšhaba ka go bo o tlhoilwe ka ntlha ya tlhaolele? Fa go le jalo, o ka itshokela seo jang?

[Setshwantsho mo go tsebe 3]

Go boloka letlhoo la tlhaolele go tlhotlheletsa go nna le moya wa go ila batho ba merafe e mengwe

[Motswedi wa Setshwantsho]

Nina Berman/Sipa Press