Kgaolo 3

Puso ya Boammaaruri ya “Kgōsana ea Kagishō” Gareng ga Baba

1, 2. (a) Ke mafoko afe ao Jesu Keresete a neng a laelana ka one le setlhopha sa barutwa ba gagwe? (b) A mme seno se ne sa raya gore lefatshe le ne le tla sokololwa lotlhe pele ga a busa jaaka “Kgōsana ea Kagishō”?

KA BOKHUTSHWANYANE fela pele ga a tlhatlogela kwa legodimong mo e ka nnang go feta makgolo a dingwaga a le 19 a a fetileng, yo ka nako eo e neng e tla nna “Kgōsana ea Kagishō” mo isagweng, ebong Jesu Keresete, o ne a bua mafoko ano fa a ne a laela setlhopha sa barutwa ba gagwe ba ba ikanyegang: “Ke gōna tsamaeañ, lo dihè merahe eotlhe barutwa, lo ba kolobetsè mo ineñ ya Rara, le ya Morwa, le ya Mōea o o Boitshèpō . . . mme bōnañ, ke bo ke nntse ke na le lona ka metlha eotlhe, le go ea bokhutloñ yoa metlha.”—Mathaio 28:19, 20.

² A mafoko ao a ga Jesu a ne a raya gore lefatshe lotlhe le sokololwe pele ga “bofelo jwa tsamaiso ya dilo” jo bo neng jwa simologa ka 1914? Nnya. Gompieno, gautshwane le bofelo jwa lekgolo la dingwaga la bo-20, lefatshe la setho le kgakala kgakala le go ka sokololelwa mo go Jesu Keresete jaaka Mmoloki wa lone le Kgosi ya lone e e tshwanetseng. Lefa go ntse jalo, seno ga se a kgaupetsa go diragala ga seo Jehofa a neng a se boleletsepele mo dipolelelopeleng tsa Bibela. Ga go ise go ko go nne boikaelelo jwa Modimo gore lefatshe lotlhe la setho le sokololwe pele ga Jesu Keresete a ka simolola go busa jaaka “Kgōsana ea Kagishō.” Phapaanong le seo gotlhelele, go ne ga bolelelwa pele fa a tla simolola go busa gareng ga baba ba gagwe.

3. Ke jang go lebisa ga ga Jesu go Pesalema 110 go neng go supa gore o ne a tla busa gareng ga baba ba gagwe?

³ Le e leng fa a ne a le mono lefatsheng, Jesu Keresete o ne a itse ka lebaka leno. Ka bokhutshwanyane fela pele ga a a swa loso lwa boswela-tumelo, o ne a ganetsanya le baganetsi ba gagwe ba bodumedi mme a lebisa go Pesalema 110. Re bala kaga seno go Luke 20:41-44: “Me a ba raea, a re, Ba bua yañ, ha ba re, Keresete ke morwa Dafide? Gonne Dafide ka esi o bua mo lokwaloñ loa Dipesalema, a re, Yehofa o reile Morèna oa me, a re, Dula kaha lecogoñ ya me ye le siameñ, Go tlo go tsamaeè ke dihè baba ba gago sebeèō sa dinaō tsa gago. Yalo Dafide o mmitsa Morèna, me o bile o nntse morwawè yañ?”

4-6. (a) Ke jang Pesalema 2 ka mo go tshwanang e supang gore Jesu o ne a ka se tlhoke go letela gore lefatshe lotlhe le sokololwe pele ga a ka simolola puso ya gagwe jaaka “Kgōsana ea Kagishō”? (b) Pesalema 2:7 e ne ya diragadiwa leng?

⁴ Ka mo go phepafetseng he, Jesu Keresete, jaaka Morwa Dafide, o ne a sa tshwanela go simolola go busa morago ga go sokologa ga lefatshe lotlhe. Go na le moo, o ne a tshwanetse go simolola go busa gareng ga baba bao Jehofa Modimo ka ntwa e neng e tla re kgabagare a ba dire sebeo sa dinao tsa Morwawe yo o mo setilong sa Bogosi. Pesalema 2 ka mo go tshwanang, ka mafoko a a latelang, e supa tshimologo ya go busa ga gagwe jaaka “Kgōsana ea Kagishō” gareng ga baba:

⁵ “Ana merahe e shakgaletseñ, le dichaba di tlhatlhanyetsañ selō sa boithamakō? Dikgosi tsa lehatshe dia ikemisa, le balaodi ba logisanya maanō, kaga Yehofa, le kaga Motlodiwa [Keresete wa gagwe] oa gagwè, ba re, A re kgaoleñ dithapō tsa bōnè, le megala ea bōnè re e latlhè mo go rona. Ena eo o dutseñ mo magodimoñ o tla tshèga: Yehofa o tla ba shotla. Ke gōna hoñ o tla buañ nabō ka bogale yoa gagwè yo bogolo, o tla ba rèma marapō ka bogale yoa gagwè yo bo tukañ: Leha go nntse yalo ke tlhomile kgosi ea me mo thabaneñ ea me e e boitshèpō ea Siona.

⁶ “Ke tla bolèla kaga taolō: Yehofa o ntheile, a re [Keresete], U morwaake; ka tsatsi yeno ke gu tsetse. [Pesalema 2:7 e ne ya diragadiwa fa Jehofa a tsosa Morwawe mo baswing, ka gone a nna Rraagwe Jesu ka bosakhutleng. (Baroma 1:4)] Ntōpa, me ke tla gu naea merahe go nna boshwa yoa gago, le dikhutlō tsa lehatshe go nna thuō ea gago. U tla ba thubakanya ka tsamma ea tshipi; u tla ba phatlakanya yaka seyana sa mmopi. Ke gōna yana tlhalehañ, lona dikgosi: lo rutègè, lona baatlhodi ba lehatshe. Dihèlañ Yehofa ka poihō, me lo itumèlè ka tlakasèlō. Atlañ morwa, gore e se re goñwe a galeha, me loa nyèlèla mo tseleñ, ka gonne bogale yoa gagwè bo tla akoha bo tuka. Go segō bōnè botlhè ba ba mo ikanyañ.”

7. Ke eng seo baaposetoloi ba ga Jesu Keresete ba neng ba lebisa go sone ka Pesalema 2 morago ga letsatsi la Pentekosete?

⁷ Go ya ka Ditihō 4:24-27, baaposetoloi ba ga Jesu Keresete ba ne ba lebisa pesalemeng eno ya bobedi morago ga letsatsi la Pentekosete, 33 C.E.: “Ba tlhatloseletsa mancwe a bōnè goñwe kwa Modimoñ, ba re, Morèna, wèna eo u dihilèñ legodimo le lehatshe le lewatlè, le cotlhe tse di mo go cōna: Eo u kileñ ua bua ka Mōea o o Boitshèpō, ka molomo oa ga rra echo Dafide, motlhanka oa gago, ua re, Ana Badichaba ba ne ba shakgalèlañ, le merahe e ne e tlhatlhanyètsañ dilō tsa boithamakō? Dikgosi tsa lehatshe tsa ipaakanya, le balaodi ba phuthèga, e le go tlhabana le Yehofa le Motlodiwa oa gagwè: Gonne amarure, Herode le Ponto Pilatwe, ba na le Badichaba, le batho ba Iseraela, ba le mo motsiñ o, ba ne ba phuthegetse Yesu Motlhanka oa gago eo u boitshèpō, eo u nu u mo tloditse.”

Tirafatso e Kgolwane ya Pesalema 2

8. (a) Tiragatso ya ntlha ya Pesalema 2:1, 2 e ne ya nna leng? (b) Ke fa e sale go tloga leng tiragatso e kgolwane ya Pesalema 2 e neng ya diragadiwa?

⁸ Ngwaga ya 33 ya lekgolo la ntlha la dingwaga e ne ya bona tirafatso ya ntlha ya mafoko ao a boperofeti a Pesalema 2:1, 2. Seno e ne e le malebana le monna yo go tweng Jesu Keresete mo lefatsheng. O ne a ile a tlodiwa ka moya o o boitshepo wa ga Jehofa ka nako ya fa a kolobediwa ke Johane Mokolobetsi. Mme tiragatso e kgolwane ya Pesalema 2 e ile ya diragala fa e sale go tloga bokhutlong jwa Metlha ya Baditšhaba ka ngwaga wa 1914. (Luke 21:24) Go ile ga rurifadiwa ka botlalo gore “metlha ea badichaba,” eo e neng ya simologa fa motse wa Jerusalema o senngwa la ntlha ka 607 B.C.E., o ne wa fela ka ngwaga wa 1914.a Ka nako eo molaetsa wa loso o ne wa utlwadiwa mo merafeng ya lefatshe jeno, go akareletsa ya La-Bodumedi.

9. Ke eng seo se neng sa diragala ka tshenyego ya ntlha ya Jerusalema mabapi le Bogosi jwa Modimo jaaka bo ne bo emetswe ke moralo wa segosi wa ga Kgosi Dafide?

⁹ Mo tshenyegong eo ya ntlha ya Jerusalema, ke Bababelona, Bogosi jwa ga Jehofa Modimo mo morafeng wa Iseraele, jaaka fa bo ne bo emelwa ke moralo wa segosi wa ga Kgosi Dafide, bo ne jwa khutla. Fa e sale, Bajuda ba tlholego ga ba ise ba ke ba nne le kgosi e e ba busang mo moralong wa segosi wa ntlo ya ga Dafide. Mme Bogosi jwa Mogodimodimo jo go busang setlogolwana sa ga Dafide, yoo Jehofa a neng a dira le ene kgolagano ya Bogosi jo bo sa khutleng mo moralong wa gagwe, bo ne bo se kitla bo nna fela bo sa dire sepe ka bosakhutleng mo lefatsheng.

10, 11. (a) Ke eng seo Modimo ka moperofeti wa gagwe Esekiele a neng a se bua mabapi le setilo sa Bogosi sa ga Dafide? (b) Ke mang yo o neng a tla “a na le tshiamèlō ea gōna” mo setilong sa bogosi sa ga Dafide? (c) Ke eng seo boidiidi jwa Bajuda ba neng ba se bua fa a ne a itlhagisa jaaka mojaboswa yo o kafa molaong?

¹⁰ Go kgosi ya Jerusalema wa bogologolo, ka bokhutshwanyane fela pele ga tshenyego ya one, Jehofa o ne a dira gore moperofeti wa gagwe Esekiele a bue mafoko ano: “Le wèna moikepi eo u tlhabilweñ loa go shwa, kgōsana ea Iseraela, eo lobaka loa gago lo tsileñ, mo motlheñ oa boikèpō yoa bokhutlō; Morèna Modimo o bua yana: a re, Tlosañ tlhoro: lo rolè serwalō, ga go ketla go tlhōla go nna yalo: goletsañ se se kwa tlhatse, kokobetsañ se se godileñ. Ke tla ribegètsa, ke ribegetsa, ke go ribegetsa: le gōna go mo ga go ketla go tlhōla go nna, go tsamaea go tla èna eo tshiamèlō ea gōna e leñ ea gagwè: me ke tla go mo naea.”—Esekiele 21:25-27.

¹¹ Ene yo “tshiamèlō ea gōna e leñ ea gagwè” o ne a tla jaaka motho yo go tweng Jesu Keresete, mme moralo wa losika lwa gagwe go tswa kwa go Dafide o kwadilwe go Mathaio 1:1-16 le Luke 3:23-31. Gantsi o ne a bidiwa go twe “Morwa Dafide.” Mo letsatsing leo a neng a tla a pagame esela a tsena mo Jerusalema jaaka mofenyi, e le tiragatsong ya boperofeti, boidiidi jo bo itumetseng jwa Bajuda jo bo neng bo mo patile le baaposetoloi ba gagwe ba ne ba goeletsa ka boipelo ba re: “Hosana; Morwa Dafide: Go bakwè eo o tlañ ka leina ya Morèna; Hosana, mo bogodimodimoñ.”—Mathaio 21:9.

“Morwa Dafide” O Mo Setilong sa Bogosi mo Legodimong

12. Fa Metlha ya Baditšhaba e fela ka 1914, Jesu Keresete o ne a le kae, jaaka mojaboswa yo o tlhomameng wa ga Dafide, yo o tlhomilweng mo setilong sa bogosi?

¹² Dingwaga tse 2 520 tsa gore Baditšhaba ba gatake ka dinao Bogosi jwa Modimo jo go busang ntlo ya ga Dafide di ne tsa khutla ka 1914. Go tswa foo ga tla nako ya gore Jesu Keresete, “Morwa Dafide,” a tlhongwe mo setilong sa bogosi, e seng kwano tlase mo setilong sa bogosi sa selefatshe, mme kwa magodimodimong kafa letsogong je legolo la ga Jehofa Modimo!—Daniele 7:9, 10, 13, 14.

13. (a) Ke fa e sale go tloga nakong efe ngwaga ya 1914 e neng ya bolelelwa pele jaaka bofelo jwa Metlha ya Baditšhaba, mme ke bomang? (b) Ke boikutlo bofe jo merafe ya lefatshe e neng e na le jone tebang le “Morwa Dafide” yo o neng a sa tswa go tlhongwa mo setilong sa bogosi?

¹³ Motlha oo o o botlhokwa o no o ile wa bolelelwa pele fa e sale ka 1876 ke bao ba neng ba kopanela le Watch Tower Bible and Tract Society. Mme merafe ya lefatshe, le e leng yone ya La-Bodumedi, e ne ya gana go dumalana gore eo e ne e le nako ya gore ba rolele bolaodi jwa bone mo go “Morwa Dafide” yo o neng a sa tswa go tlhongwa mo setilong sa bogosi. Ba ne ba sa mo amogele jaaka yo o nang le tshwanelo e a e filweng ke Modimo go nna molaodi mo lefatsheng lotlhe, leo e leng sebeo sa dinao sa ga Jehofa Modimo. (Mathaio 5:35) Ba ne ba supa kgano ya bone e e bosula-sula ya Kgosi e e tshwanetseng ka go tshwarega mo ntweng ya ntlha ya lefatshe.

14. (a) Ka go simologa ga Ntwa ya Lefatshe II, ke boikutlo bofe joo merafe e neng ya bo supa tebang le Bakeresete bao ba neng ba kopanela le Mokgatlho wa Watch Tower? (b) Ponong ya seno, ke eng seo boemo jwa lefatshe ka bophara bo se supang?

¹⁴ Mo merafeng yotlhe e e tlhabanang, Bakeresete ba ba ineetseng bao ba neng ba kopanela le Mokgatlho wa Watch Tower ba ne ba nna tlase ga kgatelelo e e boitshegang gore ba kgaogane le maitlhomo a bone a go nna ba gololesegile mo molatong wa madi. Ka nako eo ba ne ba sa tlhaloganye ka botlalo-tlalo patlafalo ya boitlhaodi jwa Bakeresete. Boperofeti jwa “Morwa Dafide,” ebong Jesu Keresete, go barutwa ba gagwe mabapi le “bofelo jwa tsamaiso ya dilo” bo ne jwa nna boammaaruri tota tota ka mo go utlwisang botlhoko: “Me lo tla ilwa ke merahe eotlhe ka ntlha ea leina ya me.” (Mathaio 24:9) Kilo eno ga e a kokobela fa e sale bofelo jwa Ntwa ya Lefatshe I. Ponong ya mabaka ano a a utlwalang a ditiragalo tsa mo motlheng wa segompieno, ke eng seo boemo jwa lefatshe lotlhe bo se supang? Seno: “Kgōsana ea Kagishō” e busa gareng ga baba ba gagwe ba ba leng gone mono lefatsheng!

15. Ke eng se se neng sa diragalela Satane Diabolo le masomosomo a gagwe a badimona fa ntwa e ne e simologa mo legodimong, mme ke ngwaga ofe oo matswela a ka nnang a bo a ile a nna makgaolakgang?

¹⁵ Modimo Mothatayotlhe o ne a diragatsa botsalo jwa Bogosi jwa Bomesia jo bo solofeditsweng ka nako ya gagwe e a e beileng go sa kgathalesege baba botlhe ba ba neng ba le gone kwa legodimong le mo lefatsheng. Tshenolō 12:1-9 e bontsha gore morago ga botsalo jwa Bogosi jwa “ñwana oa mosimane” kwa magodimong go tswa sebopelong sa phuthego ya seka-mosadi wa ga Jehofa, jaaka go ne go ntse, ka bofefo fela ntwa e ne ya simologa mo legodimong ka bolone. Magodimo a a boitshepo a ne jaanong a sa tlhole a le lefelo la kgogela ya tshwantshetso, ebong Satane Diabolo, le baengele ba gagwe ba badimona. Mo ntweng eno, eo batho ba neng ba sa e bone ka matlho, “Morwa Dafide” yo o neng a neilwe nonofo ya segosi o ne a tlhabana a bo a fenya mme a piriganya Satane Diabolo le masomosomo a gagwe a badimona go tswa kwa legodimong go ba kganelela mo sebakeng seno sa kgolokwe ya rona ya lefatshe. Go nyenyefadiwa mono ga mephato ya bosatane ka phepafalo go ne ga diragadiwa ka botlalo ka 1918, ngwaga e Ntwa ya Lefatshe I e neng ya fela ka yone.

A Fokoleditswe Maemo, Diabolo O A Tlhabana

16, 17. (a) Satane Diabolo yo o fokoleditsweng maemo o tlhabantshanya le bomang? (b) O dirisa bomang go tlhabana ntwa eno?

¹⁶ Satane Diabolo yo o fokoleditsweng maemo, ebong kgogela ya tshwantshetso, jaanong o gaketse thata segolo-bogolo tebang le phuthego ya seka-mosadi ya ga Jehofa Modimo. (Tshenolō 12:17) Ka gone o tlhabana ntwa e e matlho mahibidu le masalela a Bakeresete ba ba ineetseng ba ba itshenketsweng ka moya bao ba nang le tshupo ya gore ke mmaabo wa semoya.—Bagalatia 4:26.

¹⁷ Satane o tlhabana gape le “dinku di sele,” bao ka kutlo ba dirang mmogo le masalela a a tloditsweng mo go supeng kaga botsalo jwa Bogosi. (Yohane 10:16) Ga a dirise fela masomosomo a gagwe a badimona a a fokoleditsweng maemo, a jaanong a leng mono lefatsheng, mme gape o dirisa karolo e e bonalang ya phuthego ya gagwe go tsweledisa ntwa eno kgatlhanong le masalela le “dinku di sele.”

18. (a) Lemororo Diabolo ka bogale a lwa ntwa kgatlhanong le masalela a a tloditsweng le balekane ba bone, ke maatla afe a a sireletsang ao ba nang le one? (b) Ke karolo efe ya puso ya “Kgōsana ea Kagishō” eo e atamelang bofelo jwa yone?

¹⁸ Puso ya “Kgōsana ea Kagishō” gareng ga baba ba gagwe kwa tlase mono lefatsheng e atamela go fela. O ile a dirisanya le boemo ka botlhale. Motshegare le bosigo baengele ba gagwe ba ba ikanyegang ba ba boitshepo ba nna ba eme sentle, ba iketleeleditse go amogela ditaolo tsa segosi go tswa mo go ene go tsaya kgato ka bofefo. Ba direla jaaka maatla a a sireletsang masalela a a tloditsweng le balekane ba bone, ebong “boidiidi yo bogolo” jwa “dinku di sele,” jaaka fa bano ba tswelela go direla dikgatlhego tsa Bogosi mo nakong eno e e ntseng e fela ka potlako ya fa “Kgōsana ea Kagishō” a ntseng a busa gareng ga baba ba gagwe.—Tshenolō 7:9.

[Ntlha e e kwa tlase]