Kgaolo 19
‘Ntwa e e Tlang ya Letsatsi le Legolo la Modimo Mothatayotlhe’
1. (a) Ke eng seo merafe e tla akofang e pateletsa Modimo Mothatayotlhe go se kwala mo “lokwaloñ loa dintwa tsa ga Yehofa,” mme buka eo e ne e le efe? (b) Buka eo e tla fitlha tigelong ya yone e e molemo-lemo ka ntwa efe?
KGABAGARE merafe e gorogile mo nakong eo go tlamang Modimo Mothatayotlhe go kwala maduo a bofelo mo “lokwaloñ loa Dintwa tsa ga Yehofa.” (Dipalō 21:14) Buka eo ya sebele e ne e le rekoto ya dintwa tseo Jehofa a neng a di lwela batho ba gagwe. Ka phepafalo Moshe o ne a le bala. Lokwalo lo ka ne lwa bo lo ile lwa simologa fa Aberahame a ne a fenya mo ntweng kgatlhanong le dikgosi tseo di neng di gapile Lote, Jehofa e le ene a tlhabanelang Aberahame. (Genesise 14:1-16, 20) Ka bonakonyana jaanong, ‘lokwalo lwa dintwa tsa ga Jehofa’ lo tla digelwa sentle ka kgaolo e nngwe e e oketsegileng—polelo kaga phenyo ya gagwe e e galalelang. Seo e tla bo e le mo “ntweñ ea letsatsi ye legolo ya Modimo, Mothataeotlhe” kwa Hara-Magedona, makgaolakgang a tsamaiso eno ya dilo. (Tshenolō 16:14, 16) ‘Lokwalo’ lotlhe lo tla supa gore Modimo Mothatayotlhe ga a ise a ke a fenngwe mo tlhabanong, kana mo ntweng.
2, 3. (a) Fa esale tshimologong ya Bokeresete, seemo e ile ya nna sefe malebana le go tlhabana ga ga Jehofa “dintwa” tsa sesole? (b) Ke eng se se tla tlhotlheletsang Jehofa go tlhabanela batlhanka ba gagwe mo motlheng wa rona?
2 Ke boammaaruri, gore go tloga fela kwa tshimologong ya Bokeresete go tla go fitlha jaanong, Jehofa o ile a sireletsa batho ba gagwe ka ditsela tse dingwe kwantle ga dintwa tsa sesole. Jehofa ga a ise a ke a lwele basupi ba gagwe ba Bakeresete ka tsela eo a ileng a lwela Baiseraela ka yone kafa tlase ga Molao wa ga Moshe. Mme nako e tla tla mo isagweng e e fa gaufi fa a tla tlhabanela batlhanka ba gagwe ba ba ineetseng ba motlha wa segompieno ka tsela ya sesole. Ke eng se se tla kgomang ntwa eo ya Hara-Magedona?
3 Pele ga go tlhagoga ga ntwa ya Modimo, Babelona o Mogolo, mmuso wa lefatshe wa bodumedi jwa maaka, o tla bo a sentswe. Satane Diabolo le basinyi ba ba kgatlhanong le bodumedi ba sepolotiki ba Babelona o Mogolo ba tla ganana le lebaka la gore Basupi ba ga Jehofa e nne bone fela setlhopha sa bodumedi se se falotseng. Babusi ba lefatshe ba tla bo ba sa fitlhelela mokgele wa bone wa go nna mo lefatsheng le le sa dumeleng mo Modimong. Jalo, jaanong, ba tla gwantela go ya go tlhasela baobamedi ba ga Jehofa ka mabetwa-e-pelo, yoo bolaodi jwa gagwe jwa lobopo lotlhe ba bo latolang le go bo nyatsa! Ka gone tota-tota ba tla bo ba tlhabana kgatlhanong le Modimo.—Tshenolō 17:14, 16; bapisa Ditihō 5:39.
“Yehofa oa Mashomōshomō” o Boela Gape mo Tlhabanong
4. (a) Jehofa o arabela jang tlhaselo ya ga Goga? (b) Karabelo eo e tla supa eng, tumalanong le leina la ga “Yehofa oa mashomōshomō”?
4 Satane Diabolo, Gogo wa Magogo wa tshwantshetso, ke ene a tla rulaganyetsang tlhaselo eno mo bathong ba ga Jehofa. Fa Gogo a dirisa masomosomo a gagwe a a sa dumeleng mo Modimong go tlhasela batho ba ga Jehofa, go ba rutla le go ba senya, Jehofa o tla tsaya kgato go tlhabanela batho ba gagwe, jaaka go boleletswe pele go Esekiele 38:2, 12, 18-20. Karabelo ya ga Jehofa e boleletswe pele gape go Sekaria 14:3: “Yehofa o tla bolola, a ea go tlhabana le merahe euō, yaka yale a kile a tlhabana mo motlheñ oa tlhabanō.” Ka tsela eno Modimo wa Bibela o tla supegetsa merafe yotlhe ya segompieno gore o santse a ntse a le Modimo yo eleng Motlhabani, fela jaaka a ne a ntse mo metlheng ya Iseraele wa bogologolo, fa, jaaka go kwadilwe mo Dikwalong tsa Sehebera, a ne a tlhalosiwa jaaka “Yehofa oa mashomōshomō” ka makgetlho a le 260.—Pesalema 24:10; 84:12.
5, 6. (a) Ke ntwa efe e jaanong e simologang, mme ke mang yo o etelelang mephato ya selegodimo kwa pele mo tlhabanong? (b) Ke pego efe e moaposetoloi Johane a e neelang kaga go ya tlhabanong ga mephato ya selegodimo?
5 E tla re fa ‘ntwa ya letsatsi le legolo la Modimo Mothatayotlhe’ e goroga, e tla bo e le nako ya ‘ntwa’ e e tla tshwayang letsatsi leo. Jehofa o neela Ramasole Mogolo wa gagwe, Jesu Keresete, sesupo. Mo leineng la ga Jehofa, ene le masomosomo a selegodimo a didikadike tsa baengele ba itatlhela mo tlhabanong, jaaka ekete ba palame dipitse tsa ntwa. (Yude 14, 15) Jaaka mokwaledi wa ntwa, moaposetoloi Johane o re neela pego ya go sa le gale ya phenyo e e nonofileng eo Ramasole Mogolo wa ga Jehofa a tla e bonang mo “ntweñ ea letsatsi ye legolo ya Modimo, Mothataeotlhe”:
6 “Ka bōna legodimo le atlhamologile; me bōnañ, ga bo go le pitse e le chweu, le eo o e pagameñ, ga twe, Boikañō le Boamarure; me oa atlhola, o bile o diha ntwa mo tshiamoñ. Me matlhō a gagwè ke kgabo ea molelō, me mo tlhogoñ ea gagwè go dirwalō di le dintsi tsa mekgabō . . . Me dintwa tse di mo legodimoñ tsa mo sala moragō di pagame dipitse tse dichweu, ba apere leloba ye le bolèta, ye le leshweu ye lentlè. Me mo ganoñ ya gagwè go cwa chaka e e bogale, gore a kgèmèthè merahe ka eōna: me o tla di busa ka tsamma ea tshipi: me o gata segatisecō sa boyalwa sa bogale yoa chakgalō ea Modimo Mothataeotlhe. Me mo seaparoñ sa gagwè, le kaha seropiñ sa gagwè, go kwadilwe leina, go twe, KGOSI EA DIKGOSI, LE MORÈNA OA BARÈNA.”—Tshenolō 19:11-16.
7. Ke eng seo go gata segatisetso sa tshwantshetso sa bojalwa sa bogale jwa Modimo go se supang mo merafeng?
7 Ramasole-Mogolo wa segosi, Jesu Keresete, o etelela pele mephato ya selegodimo mo tlhaselong e e fenyang kgatlhanong le baba ba ba seoposengwe ka Hara-Magedona. O fetola botlhabanelo joo go nna namane e tona ya segatisetso sa bojalwa! Ereka jaana Kgosi ya dikgosi a “gata segatisecō sa boyalwa sa bogale yoa chakgalō ea Modimo Mothataeotlhe,” seno se supa gore merafe e tla phatlakanngwa gotlhelele. E tla latlhelwa mo ‘segatisetsong sa bojalwa’ se segolo jaaka dithetlwa tsa mofine, koo “bogale yoa chakgalō ea Modimo Mothataeotlhe” bo tla ba welang ka tsela e e thubaganyang. Mephato ya selegodimo e tla kopanela mo go gateng “segatisecō sa boyalwa sa bogale yoa chakgalō ea Modimo.”—Tshenolō 14:18-20.
8. Jehofa o tlhalosa jang maano a gagwe a ntwa?
8 Basupi ba ga Jehofa mo lefatsheng ga ba tseye “chaka” kgatlhanong le masomosomo a ga Goga, mme ke Jehofa yo o dirang jalo. Eno ke tlhabano ya gagwe! Mme jaanong kgabagare merafe ya lefatshe leno le le tlhabologileng thata kafa boitseanapeng e tla mmona a tlhabana! Reetsa jaaka fa a tlhalosa maano a gagwe a ntwa: “Ke tla mo [Goga] kuèla chaka mo dithabeñ tsa me cotlhe hela, go bua Morèna Modimo: chaka ea motho moñwe le moñwe e tla yayanya ñwana a rragwè. Me ke tla ganetsanya naè ka kgogodi le madi; me go le èna, le mashomōshomō a gagwè a sekamerwalō ea tsiè, le dichaba tse dintsi tse o nañ nacō, ke tla ba nesetsa leshogodi ye le penologañ, le sehakō se segolo, le molelō, le sulefura. Me ke tla itlotlometsa, ke tla iitshepisa, ke tla itiha gore ke itsiwe mo matlhoñ a merahe e le mentsi; me ba tla itse ha ke le Yehofa.”—Esekiele 38:21-23.
Dibetsa tsa Modimo go Dirisiwa Kgatlhanong le Baba
9. Dingwe tsa dibetsa tsa ntwa tseo Jehofa a tla di dirisang kgatlhanong le baba ba gagwe ke dife?
9 Jaaka dibetsa tsa ntwa, Jehofa o tla kgatikanya dinonofo tsa popo: maru a mantsho a pula ya morwalela, sefako se se selekanyo se se bolayang, dikgabokgabo tsa molelo le sulefura, metsi a a phunyegang mo teng ga lefatshe, le ditladi tse di rathang. Ka go phatsima ga ditsela tseo Modimo a tla bong a bolaya baba ba gagwe ka tsone, lesedi le tla nna legolo thata mo motshegareng le mo bosigong mo eleng gore letsatsi le le tlwaelegileng le kgwedi di tla bonala di sa tlhole di tlhokafala go bonesa. Go tla nna jaaka ekete di ne di eme fela, di sa dire jaaka disedifatsi mme di dumelela gore dibolao tse di fatlhang ka lesedi tsa ga Jehofa di itshupe nonofo e kgolo ya go bonesa ga tsone. (Habakuke 3:10, 11) Jehofa o na le letlotlo le legolo la dilo tsa tlholego go ka di dirisa mo ntweng.—Yoshue 10:11; Yobe 38:22, 23, 29.
10. Go ya ka Sekaria 14:12, ke eng gape se Jehofa a tla se dirisang mo “motlheñ oa tlhabanō” o o tlang?
10 Mo “motlheñ oa tlhabanō” o o tlang, Jehofa o tla dirisa gape kgogodi le “pecō.” Moperofeti Sakaria o ne a kwala jaana kaga seno: “Me e ke eōna pecō e Yehofa o tla betsañ ka eōna dichaba cotlhe tse di tlhabanyeñ le Yerusalema: nama ea bōnè e tla yèga ba sa nntse ba eme ka dinaō, matlhō a bōnè a tla yèga mo kgapeñ tsa aōna, le loleme loa bōnè lo tla yèga mo melomuñ ea bōnè.”—Sekaria 14:12.
11. Ke eng se se tla diragalang fa “pecō” e wela batlhabani bao ba tlhaselang batho ba ga Jehofa?
11 Ekane “pecō” e tla nna ya sebele kana nnyaa, e tla didimatsa melomo eo e atlhamololelwang go bua matshosetsi a a boifisang! Diteme di jegile! Dinonofo tsa go bona di tla khutla, gore batlhasedi ba ba matlhomahibidu ba tlhasele fela ka bofofu. Matlho a jegile! Dinama tsa batlhabani ba ba diganka di tla felelwa ke nonofo ba ntse ba eme ka dinao tsa bone—eseng ba rapaletse fa fatshe jaaka ditoto. Nama e e apesitseng marapo a bone a mmele e jegile!—Bapisa Habakuke 3:5.
12. “Pecō” e tla ama bothibelelo jwa sesole jwa baba le didirisiwa tsa bone jang?
12 “Pecō” e tla wela bothibelelo jwa bone jwa masole ka tshoganyetso. Didirisiwa tsa mosepele tsa go tlhasela ga di ne di kgona go suta! (Sekaria 14:15; bapisa Ekesodo 14:24, 25.) Mafoko a Sekaria 14:6 a supa kafa didirisiwa tsa bone tsa sesole di se kitlang di thusa sepe ka gone ka go re: “Go tla dihala mo motlheñ ouō, go re, lesedi ga le ketla le nna ka phatsimō le ka lotobo.” Ga go lesedi lepe la selegodimo la kamogelo ya bomodimo leo le tla ba phatsimelang. Dipone tse di itiretsweng tsa boitseanape jwa segompieno ga di ne di tlosa lefifi la go sa amogelwe ke Modimo. Dilo tse di tsamaisiwang ga di kitla di suta, jaaka ekete di omeleditswe ke serame—di gatsetse.
13. Ke eng se se tla oketsang poifo eo Jehofa a tla e tlhotlheletsang mo go bao ba ikaeletseng go tlhasela?
13 Seno sotlhe ke se se gamarisang tota! Mme se se tla oketsang poitshego ke tlhakatlhakano e Modimo a tla e dirang gareng ga bao ba reng ba a tlhasela. Go nna seoposengwe ga bone kgatlhanong le Basupi ba ga Jehofa go tla phatlaladiwa. Jaaka batlhabani ba ba lwelang mo patlelong ya botshamekelo ya Roma ba ba rweleng ditlhoro tse di ba bipileng matlho, ba tla tlhabantshana ba sa bonane. Tlhakatlhakano e e bolayang e tla anama jaaka ba ntse ba bolaana.—Sekaria 14:13.
14. (a) Polao e tla nna bogolo jo bo kana kang ka nako eo, mme dinonyane le dibatana tsa naga di tla arola jang mo melemong ya phenyo ya ga Jehofa? (b) Ke boikutlo bofe jo bafalodi ba tla nnang le jone tebang le “babolaiwa ba ga Yehofa”?
14 Polao e kgolo mo letsatsing leo le le a fetang otlhe e tla nna kgolo thata, ka go bo maatla ao a tla bong a bopeletse kafa letlhakoreng la ga Goga mo tlhabanong eo a tla bo a boitshega. (Tshenolō 19:19-21) Seno ruri e tla bo e le thulano ya kgolokwe yotlhe, ka go bo ga go karolo epe mo lefatsheng e e tla falolang tshenyego. Mme gape, ba ba tla bong ba bolailwe ka Hara-Magedona ga ba ne ba epelwa mo mabitleng ao a nang le matshwao a go ba gopola. Dinonyane tsa mefuta yotlhe le diphologolo tsa naga di tla tlhakanela mo melemong ya go fenya ga Modimo mme, ka nako e e tshwanang, di thuse go tlosa mo lefatsheng ditoto di le dintsi tseo di tla bong di namaletse mo mmung jaaka menontsha, di sa lelelwe, di sa fitlhwe, di bifelwa ke bafalodi. (Esekiele 39:1-5, 17-20; Tshenolō 19:17, 18) “Babolaiwa ba ga Yehofa” ba tla bo ba itliseditse ditlhong tsa bosakhutleng.—Yeremia 25:32, 33; Isaia 66:23, 24.
Leina la ga Jehofa le Ntlafaditswe
15. Ke tiragalo efe e e tlhomologileng e e tla bong jaanong e fitlheletswe, mme ka phelelo efe mo leineng la ga Jehofa?
15 Ka gone, “Yehofa oa mashomōshomō” ka Ramasole Mogolo wa gagwe, ebong Jesu Keresete, o tla iponela kgalaletso e e sa feleng. Tiragalo e kgolo thata e e kileng ya nna gone mo lobopong lotlhe e tla bo ka nako eo e fitlheletswe—go tlotlomadiwa ga bolaodi jwa lobopo lotlhe jwa ga Jehofa le go itshepisiwa ga leina la gagwe le le boitshepo. (Esekiele 38:23; 39:6, 7) Jehofa o tla itirela leina le le gaisang sengwe le sengwe se se neng sa tlhalosiwa mo “lokwaloñ loa dintwa tsa ga Yehofa” le mo Dikwalong tsa Sehebera tsa Bibela e e Boitshepo. (Bapisa Isaia 63:12-14.) Abo Jehofa a tla itirela leina le lentle jang ka phenyo ya gagwe e e boitshegang mo “ntweñ ea letsatsi ye legolo ya Modimo, Mothataeotlhe”! Ka boitumelo barati botlhe ba leina leo ba tla kgona go le galaletsa ka bosaengkae, ba opela dipako tsa lone!
16. Ponong ya ‘ntwa ya letsatsi le legolo la Modimo, Mothatayotlhe’ e e tlang, ke thapelo efe e e rapelelwang “boidiidi yo bogolo”?
16 Tswelelapele, he, mo tlhabanong, wena Jehofa wa masomosomo, le Morwao wa segosi Jesu Keresete a le fa go wena! (Pesalema 110:5, 6) A basupi ba gago ba ba ikanyegang mo lefatsheng e nne basupi ba ba itumetseng ba phenyo ya gago e e senang bolekanngo ka Kgosi ya gago Jesu Keresete mo “ntweñ ea letsatsi ye legolo ya Modimo, Mothataeotlhe.” A “boidiidi yo bogolo” ‘bo tswe mo sepitleng se segolo’ ka boipelo gore ba nne basupi ba gago ba selefatshe ka bosaengkae. (Tshenolō 7:14) Mo pabalelong ya gago e e lorato, a ba falolele mo Pusong ya Dingwaga tse di Sekete e go senang ntwa mo go yone ya “Kgōsana ea Kagishō” e e fentseng. A ba nne bosupi jo bo bonalang mo baswing ba ba tsositsweng go tlotlomatsa bolaodi jo ka tshwanelo eleng jwa gago mo lobopong lotlhe. Re go lebogela go bo o kwadile tigelo e e molemo-lemo ya ‘lekwalo la dintwa tsa ga Jehofa.’ A ka bosakhutleng, polelo eno kaga phenyo ya gago e e senang bolekanngo e nne mo dibukeng tsa ditiragalo tsa lobopo lotlhe!
[Setshwantsho mo go tsebe 156, 157]
“Yehofa oa mashomōshomō” o tla tlhabana le merafe