Kgaolo 13
Go Ithuta ka Dithaelo tsa ga Jesu
KA BOFEFO fela morago ga a sena go kolobediwa, Jesu o gogelwa kwa nageng ya Judea ke moya wa Modimo. O na le dilo di le dintsi tse a tshwanetseng go akanya ka tsone, ka go bo ka kolobetso ya gagwe “magodimo a mo atlhamologèla” e le gore a lemoge dilo tsa selegodimo. Tota, go na le dilo di le dintsi tseo a tshwanetseng go tlhatlhanya ka tsone!
Jesu o nna malatsi a le 40 le masigo a le 40 mo nageng mme ga a je sepe ka nako eno. Go tswa foo, fa Jesu a tshwerwe ke tlala fela thata, Diabolo o a mo atamela go mo raela, a re: “A e re ha u le Morwa Modimo, u laolè mayè a, u re, a hetogè dinkgwè.” Mme Jesu o itse gore go phoso go dirisa maatla a gagwe a a gakgamatsang go kgotsofatsa dikeletso tsa gagwe tsa senama. Ka jalo o gana go raelwa.
Mme Diabolo ga a ineele. O leka go mo tshwara ka tsela e nngwe gape. O gwetlha Jesu gore a itige mo loboteng lwa tempele e le gore baengele ba Modimo ba tle ba mo legelele. Mme Jesu ga a raelesege go dira tshupo e e ntseng jalo e e gakgamatsang. Fa a tsopola Dikwalo, Jesu o bontsha gore go phoso go leka Modimo ka tsela eno.
Mo thaelong ya boraro, Diabolo o bontsha Jesu magosi otlhe a lefatshe ka tsela nngwe e e gakgamatsang mme a bo a re: “Dilō cotlhe tse ke tla di gu naea, ha u ka wèla ha hatshe ua nkōbamèla.” Mme gape Jesu o gana go ineela mo thaelong ya go dira phoso, a ikgethela go nna a ntse a ikanyega go Modimo.
Re ka ithuta go tswa dithaelong tseno tsa ga Jesu. Ka sekai, di bontsha gore, Diabolo ga se nonofo fela ya bosula, jaaka batho bangwe ba bolela, mme gore ke motho wa mmatota, yo o sa bonaleng. Thaelo ya ga Jesu gape e bontsha gore mebuso yotlhe ya selefatshe ke di tsa ga Diabolo. Ka gonne go leka ga ga Diabolo go a neela Keresete go ne go ka nna thaelo ya mmatota jang fa e le gore tota e ne e se a gagwe?
Mme akanya kaga seno: Diabolo o ne a re o ne a iketleeditse go duelela Jesu tiro e le nngwe fela ya kobamelo, o ne a ka mo neela le eleng magosi otlhe a lefatshe. Diabolo o ka nna a leka go re raela ka tsela e e tshwanang, ka gongwe ka go re baya mo dipakeng tse di eledisang go ipapalela letlotlo la lefatshe, maatla, kana maemo. Mme abo re tla bo re le botlhale jang ne fa re ka latela sekao sa ga Jesu ka go nna re ntse re ikanyega go Modimo go sa kgathalesege gore thaelo e ka tswa e le efe! Mathaio 3:16; 4:1-11; Mareko 1:12, 13; Luke 4:1-13.
▪ Ke dilo dife tse go bonalang Jesu a tlhatlhanya ka tsone ka nako ya malatsi a a 40 fa a le mo nageng?
▪ Diabolo o ne a leka go raela Jesu jang?
▪ Re ka ithuta eng mo dithaelong tsa ga Jesu?