O Leba Baebele Jang?

SE BAEBELE E SE RUTANG

“Lokwalo lotlhe lo tlhotlheleditswe ke Modimo.”​—2 Timotheo 3:16, Thanolo ya Lefatshe le Lesha.

KAFA SEO SE KA RE SOLEGELANG MOLEMO KA GONE

Re bona dikarabo tse di kgotsofatsang tsa dipotso tse di botlhokwa mo botshelong.​—Diane 2:1-5.

Re bona kaelo e re ka e ikanyang ya botshelo jwa letsatsi le letsatsi.​—Pesalema 119:105.

Re nna le tsholofelo ya mmatota ka isagwe.​—Baroma 15:4.

A TOTA RE KA DUMELA SE BAEBELE E SE RUTANG?

Ee, ka ntlha ya mabaka a ka nna mararo:

• Go dumalana ga yone. Baebele e kwadilwe ka lobaka lwa dingwaga di le 1 600 ke batho ba ka nna 40. Ba le bantsi ba bone ga ba a ka ba kopana. Le fa go ntse jalo, buka eno yotlhe e a dumalana e bile e na le setlhogo se le sengwe!

• Hisitori e e ikanyegang. Gantsi baitsehisitori ba lefatshe ga ba kwale ka makoa a batho ba neng ba na le one. Go farologana le seo, bakwadi ba Baebele ba ne ba kwala ba sa fitlhe sepe ka makoa a bone le a ditšhaba tsa bone.​—2 Ditiragalo 36:15, 16; Pesalema 51:1-4.

• Boporofeti jo bo ka ikanngwang. Baebele e ne ya bolelela pele ka go senngwa ga motse wa bogologolo wa Babelona dingwaga di ka nna 200 pele ga seo se direga. (Isaia 13:17-22) Ga e a ka ya tlhalosa fela tsela e Babelona e neng e tla fenngwa ka yone, mme gape e ne ya umaka le leina la motho yo o neng a tla e fenya!​—Isaia 45:1-3.

  Boporofeti jo bongwe jo bontsi jwa Baebele le jone bo ne jwa diragadiwa ka botlalo. Ruri seo ke sone se re neng re ka se solofela ka Lefoko la Modimo!​—2 Petere 1:21.