Ke Eng se se Dirang Gore Botshelo Jwa Lelapa bo Itumedise?

SE BAEBELE E SE RUTANG

“Go itumela ba ba utlwang lefoko la Modimo e bile ba le boloka!”​—Luke 11:28, Thanolo ya Lefatshe le Lesha.

KAFA SEO SE KA RE SOLEGELANG MOLEMO KA GONE

Re bontshiwa lorato lwa boammaaruri.​—Baefeso 5:28, 29.

Re bontshiwa tlotlo e e boteng.​—Baefeso 5:33.

Re nna le pabalesego ya mmatota.​—Mareko 10:6-9.

A TOTA RE KA DUMELA SE BAEBELE E SE RUTANG?

Ee, ka ntlha ya mabaka a ka nna mabedi:

• Modimo ke Mosimolodi wa lelapa. Baebele ya re, ‘lelapa lengwe le lengwe le bidiwa’ ka leina la ga Jehofa Modimo. (Baefeso 3:14, 15) Seno se raya gore lelapa le gone ka go bo Jehofa a le bopile. Ke eng fa seo se le botlhokwa?

  Akanya ka seno: Fa o ne o itumelela dijo tse di monate mme o batla go itse gore di dirilwe ka eng, o ne o tla botsa mang? Go a utlwala gore o botse motho yo o di apeileng.

  Ka tsela e e tshwanang, fa re batla go itse gore ke eng se se dirang gore lelapa le itumele, go tla bo go le molemo gore re botse Jehofa, Mosimolodi wa lelapa.​—Genesise 2:18-24.

• Modimo o amega ka wena. Go molemo gore malapa a batle kgakololo ya ga Jehofa, e a re nayang yone mo Lefokong la gagwe. Ka ntlha yang? “Ka gonne o a lo kgathalela.” (1 Petere 5:6, 7) Jehofa o go batlela se se molemolemo​—mme ka metlha kgakololo ya gagwe e mosola!​—Diane 3:5, 6; Isaia 48:17, 18.