Ke Mang Tota yo o Laolang Lefatshe?

SE BAEBELE E SE RUTANG

“Yo o Bosula o laola lefatshe lotlhe.”​—1 Johane 5:19.

“Morwa Modimo o ne a tla . . . go senya ditiro tsa ga diabolo.”​—1 Johane 3:8, New Century Version.

KAFA SEO SE KA RE SOLEGELANG MOLEMO KA GONE

Re bona tlhaloso e e utlwalang ya go bo lefatshe le na le mathata.​—Tshenolo 12:12.

Re nna le lebaka la go dumela gore lefatshe la rona le tla fetoga go nna le le botoka.​—1 Johane 2:17.

A TOTA RE KA DUMELA SE BAEBELE E SE RUTANG?

Ee, ka ntlha ya mabaka a ka nna mararo:

• Bolaodi jwa ga Satane bo tla fedisiwa. Jehofa o ikemiseditse go fedisa taolo ya ga Satane mo bathong. O solofetsa gore o tla ‘nyeletsa Diabolo,’ le go dirolola tshenyo yotlhe e Satane a e bakileng.​—Bahebera 2:14, Thanolo ya Lefatshe le Lesha.

• Modimo o tlhophile Jesu Keresete gore a buse lefatshe. Jesu ga a tshwane gotlhelele le mmusi wa lefatshe leno, yo o setlhogo le yo o pelotshetlha. Modimo o solofetsa jaana malebana le bolaodi jwa ga Jesu: “O tla utlwela motho wa maemo a a kwa tlase le yo o humanegileng botlhoko . . . O tla golola moya wa bone mo kgatelelong le mo tshiamololong.”​—Pesalema 72:13, 14.

• Modimo ga a ka ke a aka. Baebele e bua jaana ka tlhamalalo: ‘Ga go kgonege gore Modimo a ake.’ (Bahebera 6:18) Fa Jehofa a solofetsa go dira sengwe, go tshwana fela le fa a setse a se dirile! (Isaia 55:10, 11) “Mmusi wa lefatshe leno o tla latlhelwa kwa ntle.”​—Johane 12:31.