Timotheo O ne A Batla go Thusa Batho

Timotheo e ne e le lekawana le le neng le rata go thusa batho. O ne a ya kwa mafelong a le mantsi go ya go thusa ba bangwe. Ka ntlha ya seno, botshelo jwa gagwe bo ne bo itumedisa thata. A o ka rata go utlwa ka jone?—

Timotheo o goletse kwa toropong nngwe e e bidiwang Lisetera. Fa a ne a sa ntse a le monnye, nkoko wa gagwe e bong Loise le mmaagwe e bong Yunise ba ne ba simolola go mo ruta ka Jehofa. Fa Timotheo a ntse a gola, o ne a batla go thusa ba bangwe gore ba ithute ka Jehofa.

Fa Timotheo a sa ntse a le mosha, Paulo o ne a mo kopa gore a tsamaye le ene go ya go rera kwa mafelong a mangwe. Timotheo o ne a re: ‘Go siame!’ O ne a batla go ya go thusa ba bangwe.

Timotheo o ne a tsamaya le Paulo go ya kwa toropong ya Thesalonika e e neng e le kwa Makedonia. Gore ba fitlhe koo, ba ne ba tshwanetse go tsamaya ka dinao sekgala se se telele, go tswa foo ba bo ba palama mokoro. Fa ba sena go goroga, ba ne ba thusa batho ba le bantsi go ithuta ka Jehofa. Mme go ne go na le batho bangwe ba ba neng ba galefile mme ba batla go ba utlwisa botlhoko. Ka jalo, Paulo le Timotheo ba ne ba tshwanelwa ke go tsamaya mme ba ye go rera kwa mafelong a mangwe.

Morago ga dikgwedi di le mmalwa, Paulo o ne a kopa Timotheo gore a boele kwa Thesalonika mme a ye go bona gore bakaulengwe ba ne ba tsogile jang. Go ne go tlhokega bopelokgale jo bogolo go boela kwa toropong e e kotsi eo! Mme Timotheo o ne a ya ka gonne o ne a tshwenyegile ka bakaulengwe ba koo. O ne a boela kwa go Paulo ka dikgang tse di itumedisang. Bakaulengwe ba kwa Thesalonika ba ne ba dira sentle thata!

Timotheo o ne a bereka le Paulo ka dingwaga di le dintsi. Paulo o kile a kwala gore Timotheo ke ene motho yo a neng a siametse gore a ka mo roma go ya go thusa diphuthego. Timotheo a ne a rata Jehofa le batho.

A o rata batho mme o batla go ba thusa gore ba ithute ka Jehofa?— Fa e le gore go ntse jalo, o ka nna le botshelo jo bo itumedisang le jo bo kgatlhang fela jaaka Timotheo!