Baebele e ka Nthusa Jang?

WENA O NE O TLA DIRA ENG?

Akanya ka boemo jono: David o kgweetsa mo lefelong le a sa le tlwaelang gotlhelele. Matshwao a tsela le tikologo di mmontsha gore o mo lefelong le a sa tshwanelang go ka bo a le mo go lone. O lemoga gore o timetse. A ka tswa a ile a tsaya tsela e sele fa a ntse a le mo loetong.

Wena o ne o tla dira eng fa o ne o le David?

EMA MME O AKANYE!

O ka tlhopha go tsaya nngwe ya dikgato tseno:

1. Kopa mongwe gore a go bontshe tsela.

2. Leba mmapa kgotsa dirisa GPS.

3. Tswelela ka loeto ka tsholofelo ya gore o tla bona tsela e e siameng.

Ga go na pelaelo gore Kgato C ga e kitla e go thusa go le kalo.

Kgato B e botoka go na le ya ntlha. Ka gonne o tla tswelela o na le mmapa le GPS mo loetong lwa gago, go go thusa go bona tsela.

Baebele e ka go thusa ka tsela e e tshwanang!

Buka eno e e anamisiwang go gaisa e ka

• go thusa gore o lepalepane le mathata a botshelo

• go thusa gore o ikitse sentle le gore o nne motho yo o botoka

• go bontsha gore o ka tshela jang ka tsela e e molemo

GO ARABA DIPOTSO TSA BOTLHOKWA

Fela fa re simolola go bua, re botsa dipotso.

• Bana ba tswa kae?

• Modimo o nna kae?

Moragonyana, re simolola go botsa dipotso ka se se diregang mo tikologong ya rona.

• Ke eng fa dilo tse di bosula di direga?

• Ke eng fa batho ba swa?

Gotweng fa e le gore Baebele ga e bolo go nna le dikarabo tsa dipotso tseno?

Batho ba le bantsi ba re Baebele e tletse dinaane le ditlhamane, ke buka ya bogologolo e bile go thata go e tlhaloganya. Mme gone, a tota Baebele ke yone bothata kgotsa bothata ke se batho ba se utlwileng ka yone? A ba ka tswa ba boleletswe tshedimosetso e e phoso?

Ka sekai, batho ba akanya gore Baebele ya re Modimo ke ene a laolang lefatshe. A mme gone go ntse jalo? Lefatshe leno le tlhakatlhakane! Le tletse kutlobotlhoko le pogo, bolwetse le loso, khumanego le masetlapelo. A Modimo yo o lorato a ka baka dilo tseno tse di bosula?

A o ka rata go itse karabo ya potso eno? Se Baebele e se buang kaga gore ke mang yo o laolang lefatshe se ka nna sa go gakgamatsa!

Gongwe o lemogile gore kgakololo e e mo boroutšhareng jono e theilwe mo Baebeleng. Basupi ba ga Jehofa ba tlhatswegile pelo gore Baebele ke motswedi o o ka ikanngwang wa kgakololo. Seo ke ka gonne e ‘tlhotlheleditswe ke Modimo e bile e tswela mosola mo go ruteng, mo go kgalemeleng le mo go tlhamalatseng dilo.’ (2 Timotheo 3:16, 17) O tla bo o itirela molemo fa o ka sekaseka buka eno ya bogologolo—mme gone e sa ntse e le mosola le gompieno!