Tumelo ya Gagwe e a Lekwa

Aborahame o ne a ruta morwawe e bong Isake gore a rate Jehofa le go tshepa ditsholofetso tsotlhe tsa gagwe. Mme fa Isake a na le dingwaga tse 25, Jehofa o ne a kopa Aborahame gore a dire sengwe se go neng go le thata go se dira. Ke eng seo?

Modimo o ne a raya Aborahame a re: ‘Tsweetswee tsaya morwao yo o esi mme o mo ntshe setlhabelo kwa thabeng e e kwa nageng ya Moria.’ Aborahame o ne a sa tlhaloganye gore ke eng fa Jehofa a ne a mo kopa gore a dire jalo. Mme o ne a reetsa Jehofa.

Mo mosong o o latelang, Aborahame o ne a tsamaya le Isake le batlhanka ba gagwe ba babedi mme ba leba kwa Moria. Morago ga malatsi a le mararo, ba ne ba kgona go bona dithaba tse di kgakala. Aborahame o ne a raya batlhanka ba gagwe a re ba lete fa ene le Isake ba ya go ntsha setlhabelo. Aborahame o ne a naya Isake dikgong mme ene a tsaya thipa. Isake o ne a botsa rraagwe a re: ‘Phologolo e re tlileng go e ntsha setlhabelo e kae?’ Aborahame o ne a mo raya a re: ‘Ngwanaka, Jehofa o tla e ntsha.’

Fa ba goroga kwa thabeng, ba ne ba aga sebeso. Go tswa foo, Aborahame o ne a bofa Isake diatla le dinao mme a mo pega mo godimo ga sebeso.

Aborahame o ne a tsholetsa thipa. Ka nako eo, moengele wa ga Jehofa o ne a bua go tswa kwa legodimong a re: ‘Aborahame! O se ka wa gobatsa mosimane! Jaanong ke a bona gore o dumela mo Modimong ka gonne o ne o ikemiseditse go ntsha morwao setlhabelo.’ Go tswa foo, Aborahame o ne a bona phelefu e tsene ka dinaka mo setlhareng. O ne a bofolola Isake ka bonako mme a ntsha phelefu eo setlhabelo.

Go tloga ka letsatsi leo, Jehofa o ne a bitsa Aborahame a re ke tsala ya gagwe. A o itse gore ka ntlha yang? Aborahame o ne a dira sengwe le sengwe se Jehofa a neng a mo laela gore a se dire le fa a ne a sa tlhaloganye lebaka la go bo Jehofa a re a se dire.

Jehofa o ne a boa a solofetsa Aborahame a re: ‘Ke tla go segofatsa ke bo ke ntsifatsa bana kgotsa ditlogolwana tsa gago.’ Seno se ne se raya gore Jehofa o tla dirisa losika lwa ga Aborahame go segofatsa batho botlhe ba ba siameng.