Ba Dira Maikano

Dikgwedi di le pedi morago ga gore Baiseraele ba tswe kwa Egepeto, ba ne ba fitlha kwa Thabeng ya Sinai mme ba tlhoma ditente foo. Jehofa o ne a bitsa Moshe gore a tle mo thabeng mme a mo raya a re: ‘Ke golotse Baiseraele. Fa ba ka ntheetsa ba bo ba ikobela melao ya me, ba tla nna batho ba me ba ke ba itlhophetseng.’ Moshe o ne a fologa thaba mme a bolelela Baiseraele se Jehofa a se buileng. Ba ne ba reng? Ba ne ba re: ‘Re tla dira sotlhe se Jehofa a reng re se dire.’

Moshe o ne a tlhatlogela gape kwa thabeng. Fa a le koo, Jehofa o ne a mo raya a re: ‘Ke tla bua le wena mo malatsing a le mararo. Raya batho o re ba se ka ba leka go palama Thaba ya Sinai.’ Moshe o ne a fologa thaba a bo a ya go bolelela Baiseraele gore ba ipaakanyetse go reetsa Jehofa.

Morago ga malatsi a le mararo, Baiseraele ba ne ba bona magadima le leru le lentsho mo thabeng. Gape ba ne ba utlwa modumo o o kwa godimo wa maru le modumo wa lonaka. Mme Jehofa o ne a fologela mo thabeng a le mo molelong. Baiseraele ba ne ba tshogile thata e bile ba roroma. Thaba e ne ya roroma thata le go khurumediwa ke mosi. Modumo wa lonaka o ne o ntse o oketsega. Go tswa foo, Modimo o ne a re: ‘Ke nna Jehofa. O se ka wa obamela medimo epe e mengwe.’

Moshe o ne a boela kwa godimo ga thaba mme Jehofa a mo naya melao ya kafa Baiseraele ba tshwanetseng go mo obamela le go itshwara ka gone. Moshe o ne a kwala melao eo a bo a e balela Baiseraele. Ba ne ba ikana ba re: ‘Re tla dira sotlhe se Jehofa a reng re se dire.’ Ba ne ba dira maikano a gore ba tla obamela Modimo. A mme gone ba ne ba tla dira seo?