Jesu o Tsamaya mo Metsing

Jesu o ne a kgona go fodisa batho ba ba lwalang le go tsosa ba ba suleng. Gape o ne a kgona go laola diphefo le dipula. Fa Jesu a sena go rapela kwa thabeng, o ne a leba kwa Lewatleng la Galalea mme a bona phefo e maatla e foka. Baaposetoloi ba gagwe ba ne ba le mo sekepeng ba leka go dira gore se se ka sa tsewa ke phefo. Jesu o ne a simolola go tsamaya mo godimo ga metsi a ya kwa sekepeng. Baaposetoloi ba ne ba tshogile fa ba bona motho a tsamaya mo godimo ga metsi. Mme Jesu o ne a ba raya a re: ‘Se boifeng. Ke nna.’

Petere o ne a re: ‘Morena fa e le gore ke wena, a nka tswa mo sekepeng mme ke tle kwa go wena?’ Jesu o ne a mo raya a re: ‘O ka tla.’ Petere o ne a tswa mo sekepeng a tsamaya mo godimo ga metsi a ya kwa go Jesu le fa phefo e ne e maatla thata. Mme fa a ntse a atamela, Petere o ne a leba phefo mme a tshoga. O ne a simolola go nwela mo metsing. Petere o ne a goa a re: ‘Morena, nthuse!’ Jesu o ne a mo tshwara ka seatla a bo a re: ‘Goreng o ne o belaela? O tshwanetse o ka bo o nnile le tumelo.’

Fa Jesu le Petere ba tsena mo sekepeng, ka bonako fela ke fa phefo e sisibala. O akanya gore baaposetoloi ba ile ba ikutlwa jang? Ba ne ba re: “Ruri o Morwa Modimo.”

E ne e se lekgetlo la ntlha Jesu a laola maemo a bosa. Nako nngwe fa Jesu le baaposetoloi ba gagwe ba le mo sekepeng, Jesu o ne a ya go robala. Fa a ntse a robetse, phefo e maatla e ne ya simolola go foka. Makhubu a ne a itaagana mo sekepeng mme metsi a tsena mo go sone. Baaposetoloi ba ne ba tsosa Jesu ba goa ba re: ‘Moruti re thuse re tloga re swa!’ Jesu o ne a tsoga mme a laela lewatle a re: ‘Didimala!’ Phefo e ne ya kgaotsa. Jesu o ne a botsa baaposetoloi ba gagwe a re: ‘Goreng lo se na tumelo?’ Ba ne ba bua ba re: ‘Le eleng diphefo le lewatle di a mo utlwa.’ Baaposetoloi ba ne ba ithuta gore fa ba tshepa Jesu, ga ba tlhoke go boifa sepe.