Dipotso tse di Tswang go Babadi

◼ Mo lseraeleng wa bogologolo dingwaga tse 49 tse di latelanang di ne di salwa morago ke ngwaga wa Jubile (wa bo-50). A Jubile eo e lebagane le lobaka lo lo latelang tsa beke ya Modimo ya popo ya dingwaga tse 49 000?

Ereka palo ya 49 e fitlhelwa mo mabakeng a mabedi ao, go ka nna ga lebega jaaka ekete Jubile e ne e tla bolelela-pele nako eo e latelang bokhutlo jwa beke ya popo ya dingwaga tse 49 000. Mme kaga batho ka kakaretso ba ba amogelwang ke Modimo, se se diragetseng ka Jubile ya Iseraele se lebaganye thata le se se tla a diragalang mo Pusong ya Dingwaga tse di Sekete, dingwaga tse di sekete tsa bofelo tsa ‘beke [eo] ya popo, eseng se se tlang morago ga beke eo. Tlhokomela motheo wa seno:

Santlha, Molao wa ga Moshe o ne o tlhoka gore mo ngwageng mongwe le mongwe wa bosupa go nne sabata wa lefatshe; go ne go sa tshwanelwa go jala dijalo, go lema, kana go roba. Morago ga ngwaga wa bosupa wa Sabata (ngwaga wa bo-49), go ne go tla ngwaga o o kgethegileng wa Jubile, ngwaga wa bo-50. E ne e le sabata o mo go ona lefatshe le neng le ikhutsa gape. Se se botlhokwa thata, kgololesego e ne e bolelwa. Bahebera ba ba neng ba ithekisitse mo bokgobeng ba ne ba gololwa mo molatong le mo botlhankeng. Gape, boswa jwa lefatshe bo ne bo busetswa mo malapeng a a neng a patelesega go bo rekisa. Ka jalo Jubile e ne e le motlha wa go golola le go tsosolosa wa Baiseraele.​—Lefitiko 25:1-46.

Sa bobedi, go ithuta ga rona tiragatso ya boperofeti jwa Bibela le boemo jwa rona mo go tsamayeng ga nako go bontsha ka botlalo gore ‘malatsi a popo’ (Genesise, kgaolo 1) ke dingwaga di le 7 000 lengwe le lengwe. Go tlhaloganngwa gore puso ya ga Keresete ya dingwaga tse di sekete e tla khutlisa ngwaga wa bo 7 000 ‘letsatsi la boikhutso,’ la Modimo wa ‘letsatsi’ la bofelo la beke ya popo. (Tshenolō 20:6; Genesise 2:2, 3) Fa go iwa ka mogopolo ono, beke yotlhe ya popo e ne e tla nna dingwaga tse di boleele jwa 49 000.

Ka go lemoga go tshwana ga dipalo, bangwe ba ile ba tshwantshanya dingwaga tse 49 tsa Jubile ya bogologolo le dingwaga tse 49 000 tsa beke ya popo. Ka tlhaloganyo eno, ba ile ba akanya gore Jubile ya Iseraele ya ngwaga wa (bo-50) e ne e tshwanetse go emela, kana go tshwantshetsa, se se neng se tla tla morago ga bokhutlo jwa beke ya popo.

Lefa go ntse jalo, gakologelwa gore Jubile e ne ele fela ngwaga wa kgololo le wa tsosoloso ya batho. Beke ya popo segolo-bogolo e bolela ka polanete Lefatshe le kago ya lone. Mme mabapi le tiragatso ya maikaelelo a Modimo mo boemong jwa batho mo lefatsheng, kgolokwe ya lefatshe ka boyone ga e ise e ke e rekisiwe mo botlhankeng mme ka jalo ga e tlhoke go gololwa. Ke setho se tlhokang seo, mme batho ga ba a ka ba tshela ka dingwaga tse di 49 000, mme ba tshedile mo e ka nang tse 6 000. Bibela e bontsha gore moragonyana fa Adame le Efa ba sena go bopiwa, ba ne ba tsuologela Modimo, ka jalo ba tla mo bokgobeng jwa sebe, go sa itekanelang, le loso. Go ya ka Baroma 8:20, 21, Jehofa Modimo o ne a ikaeletse go golola setho se se dumelang go tswa mo bokgobeng jono. Se se felelang ka gore, baobamedi ba boammaaruri mo lefatsheng ba “tla gololwa mo botlhankeñ yoa go bōla, [ba] isiwa mo kgololesegoñ ea kgalalèlō ea bana ba Modimo.’”​—Bona gape Baroma 6:23.

Lemororo setlhopha se sennye se se tlhophilweng go ya kwa legodimong ba ile ba itshwarelwa dibe tsa bone go tswa ka Pentekosete 33 C.E. le go ya pele mme ka jalo ba setse ba itumelela Jubile, Dikwalo di bontsha gore kgololo ya setho se se dumelang e tla nna mo Pusong ya ga Keresete ya Dingwaga tse di Sekete. Se se tla diragala fa a dirisa melemo ya setlhabelo sa gagwe sa thekololo mo sethong. Kwa bokhutlong jwa Puso ya Dingwaga tse di Sekete ya gagwe, setho se tla bo se tlisitswe mo boitekanelong jwa mmele, se gololesegile gotlhelele mo boleong jo bo ruilweng le loso. Fa go tla bo go khutlisitswe mmaba wa bofelo (loso le le neng le ruilwe go tswa kwa go Adame), Keresete o tla busetsa Rraagwe Bogosi kwa bokhutlong jwa dingwaga tse di 49 000 tsa beke ya popo.​—1 Bakorintha 15:24-26.

Ka gone, mabapi le setho se se dumelang se se nang le ditebelelo tsa lefatshe, kgololo le tsosoloso tse di neng di supa ngwaga wa Jubile mo Iseraeleng wa bogologolo di tla tshwana ka tsela e e feletseng mo Sabateng o o tlang wa Puso ya Dingwaga tse di Sekete. Go tloga foo kgololesego le tsosoloso di tla ipelelwa. Seo e tla bo e le kafa tlase ga bobusi jwa ga Keresete, “Gonne Morwa Motho ke morèna oa sabata.”​—Mathaio 12:8.