A Mogopolo Wa Gago Ke oo Nyoretsweng Kitso?
GO NYORELWA kitso ke go “eletsa go itse.” Go nyorelwa kitso go go nonofileng go dira gore motho a tlhoafalele go ithuta, go batlisisa ka dilo. Jehofa o ne a tsenya tlhoafalo eno mo go rona, e le gore mo e ka nnang ka nako eo re tsalwang ka yone fela re gogelwa mo goreng re tlhatlhobe lefatshe leo le re dikologileng. Go nna gone ga rona fela ke tiragalo ya go ithuta eo e senang bokhutlo. Gore re fetoge batsadi bao ba godileng, bao ba tshwanelang, re tshwanelwa ke go kgotsofatsa go nyorelwa kitso ga rona, keletso ya rona ya go batlisisa ka dilo.
Seno se boammaaruri segolo-bogolo mo selekanyong sa semoya. Ditebelelo tsa rona tsa botshelo jo bosakhutleng di ikaegile ka gore re ithute ka Jehofa Modimo. (Yohane 17:3) Bibela e re bolelela gore o batla gore re batlisise ka ene, go ‘mo apaapa le go mmona.’ (Ditihō 17:23, 24, 27) Fa re khutlisa go nyorelwa ga rona kitso kana re palelwa ke go go letlelela gore go gole, kgatelopele ya rona e tla nna bonya thata. Tota, go sa kgatlhegele dilo tsa semoya go ka nna diphatsa.—Pesalema 119:33, 34; Hosea 4:6.
Ka gone, ka metlha go ile ga otlelelwa mo bathong ba ga Jehofa ba metlha ya bogologolo ka moo tao le go ithuta di tlhokafalang ka gone e le gore ba kgotsofatse keletso e e tshwanetseng ya go ithuta. (Duteronome 6:6, 7; 31:12; 2 Ditihalō 17:9) Jesu ebong Mesia e ne e le morutisi yo mogolo yo o kileng a nna teng mo lefatsheng. (Mathaio 9:35) Barutwa ba gagwe ba ne ba latela sekao sa gagwe. Le eleng fa ba ne ba lebane le kganetso, ba ne ba “se ka ba bakèle go ruta, le go rera.” (Ditihō 5:42) Thuto e e ntseng jalo e ne ya tsosa kgatlhego mo megopolong e e nyoretsweng kitso. Ba le bantsi ba ne ba tshwana le Baberea, bao ba neng ba reetsa ka “pelo e e etleetsegileñ, ba lotolotsa mo dikwaloñ ka malatsi aotlhe, ha dilō tse di nntse yalo.”—Ditihō 17:11.
Ka mo go tshwanang, ditiro tse dintsi tsa phuthego ya Bokeresete ya segompieno di theilwe mo go ruteng. Ka gone, phuthego e diragatsa boikaelelo jwa konokono jwa go nna gone ga yone, e leng, go godisa keletso ya go ithuta ka Jehofa le maikaelelo a gagwe le go e kgotsofatsa. Mofuta ono wa go nyorelwa kitso o siame ebile o mosola.
Meedi e e Tshwanetseng ya Go Nyorelwa Kitso
Lefa go ntse jalo, ka dinako dingwe, bana ba tshwanelwa ke gore ba sirelediwe mo go nyorelweng kitso ga bone ka namana. Fa lesea le otlolola letsogo go ama sengwe se se molelo kana ka go nyorelwa kitso le tsenya selo se se dirilweng ka galase mo molomong wa lone go utlwa gore se utlwala jang, le ka nna la gobala. Ga re kgoreletse go gola ga lone fa re sa le kgothaletse go nyorelwa kitso ka tsela eo.
Fa bana ba gola, go nyorelwa ga bone kitso gape go ka ba gogela mo dipharagobeng. Ka gone, mosimane wa dingwaga tsa bolesome a ka rata go itse gore ke eng seo se leng mo makasineng o o tsosang keletso dikobo. Kana mosetsana wa dingwaga tsa bolesome a ka, ka ntlha ya go nyorelwa kitso, lekeletsa ka motsoko kana ka diokobatsi tse dingwe. Setlhopha sa basha se ka kokoana mmogo le go nwa bojalwa bo le bontsi—ba leka go tagwa go bona fela gore go ntse jang! Gape-gape, ga re kgoreletse go gola le go tlhaboga ga tlholego ga mosha yoo fa re sa mo kgothaletse mofuta ono wa go nyorelwa kitso.
A go na le dikarolo tseo go nyorelwa kitso ga Mokeresete yo o godileng go ka mo tsenyang mo dipharagobeng? Ee, ruri. Paulo o ne a tlhagisa Timotheo ka bao ba ka ikuelang mo go rateng dilo ga Mokeresete ka boiteko jwa go faposa tumelo ya gagwe. “Timotheo,” Paulo o ne a bolela jalo, “a u ko u dibèlè shōna se u se neecweñ, u nntse o tlhokomologile dipalabalō tsa boithamakō le dikganetsanyō tsa e e bidiwañ kicō, me e se eōna. Tse bañwe ba e rileñ ka ba di dumetse ba hositse kaga tumèlō.”—1 Timotheo 6:20, 21.
Mo lekwalong la gagwe la bobedi le le yang kwa go Timotheo, Paulo o ne a neela tlhagiso eno go tswela pele: “E le batho ba ba hositseñ boamarure, ba re, Cogō ea bashwi e setse e hetile, me ba ribegeditse tumèlō ea bañwe.” (2 Timotheo 2:18) A o ka akanya fela gore puo e e ntseng jalo e tshwanetse ya bo e ile ya tsosa go nyorelwa kitso jang? Batho bao ba sa ntshang matlho dinameng ba ka ne ba ile ba ipotsa jaana: ‘Banna bano ba bolelang? Tota ba ka bolela jang gore tsogo e setse e diragetse?’ Ba ne ba ka reetsa ka kgatlhego. Diphelelo? Tumelo ya ba bangwe e ne ya ribegediwa. Go reetsa puo e e ntseng jalo ka ntlha ya go nyorelwa kitso go ne go le kotsi fela jaaka go lekeletsa ka diokobatsi kana go tsosa keletso dikobo ka ntlha ya go nyorelwa kitso go le kotsi.
A seno se kaya gore Bakeresete ba tswalegile, ga ba batle go reetsa megopolo ya batho ba bangwe? Nnyaa, eo ga se yone ntlha. Go na le moo, ba gakololwa gore ba tile go bulela megopolo ya bone dilo tseo di ka ba bakelang kutlo-botlhoko moragonyana ga moo. A o ke o akanye fela gore histori e ka bo e farologane jang fa Efa a ne a ganne go dirisa go nyorelwa kitso ga gagwe ka go reetsa mafoko a a tsietsang a ga Satane Diabolo! (Genesise 3:1-6) Moaposetoloi Paulo o ne a tlhagisa bagolwane ba Efeso ka “diphiri” bao, ka go bontsha moya o o tshwanang le oo Satane a neng a o bontsha mo go Efa, “ba buañ dilō tse di shōkameñ, go tla ba itshadisa barutwa morago.” (Ditihō 20:29, 30) Ba dirisa “mahoko a boitimokanyō” ao a diretsweng go re “ntsha tlhwatlhwa”. Mafoko ano a tlhagisa megopolo eo e leng botlhole mo bomoyeng jwa Mokeresete.—2 Petere 2:3.
Fa e le gore o ne o itse gore selo se se rileng se ne se le botlhole, a o ne o ka se nwa ka ntlha ya go nyorelwa kitso go bona gore se utlwala jang, kana go bona gore a mmele o ne o nonofile ka mo go lekaneng go ka berekana le botlhole joo? Tota le eseng. Ka mo go tshwanang, a go botlhale go bulela mogopolo wa gago mafoko ao a logilweng ka boikaelelo jwa go go tsietsa le go go tlosa mo boammaaruring? Le eseng!
Tlhokomelang Matlhajana a Lefatshe
Go nyorelwa kitso go ka re gobatsa, gape, fa go re gogela mo go reng re tlhatlhobe matlhajana a lefatshe. Botlhajana bo tlhalosiwa jaaka “maiteko a motho a go tlhaloganya le go phutholola boitemogelo jotlhe jwa motho, dilo tseo di bo bakang le melao-metheo ya boammaaruri a dirisa peo-mabaka le go phopholetsa.” Lefa go ntse jalo, kgabagare, bao ba iphakang gore ba na le matlhajana a batho ba feleletsa ba tshwana le bao “ba ba nntseñ ba ithuta, me ba sa nonoha gopè go hitlha mo kicoñ e boamarure.” (2 Timotheo 3:7) Go palelwa ga bone go bakiwa ke phoso eno e le nngwe ya konokono: Ba ikaega ka botlhale jwa batho go na le botlhale jo bo tswang kwa Modimong.
Phoso eno e ne ya senolwa ka boikanyegi ke moaposetoloi Paulo. O ne a buisana le Bakorintha kaga “botlhale yoa lehatshe yeno,” joo eleng “dinyana mo Modimoñ.” (1 Bakorintha 3:19) Mme o ne a tlhagisa Baroma ka bao ba neng ba le “boithamako mo go akanyeñ ga bōnè.” (Baroma 1:21, 22) Sengwe le sengwe seo re nang le sone se tswa kwa go Jehofa. Ka tshwanelo, re leba kwa go ene gore a neele ‘kitso ya boammaaruri le temogo ka botlalo’ le gore a re senolele “dilō tse di boteñ tsa Modimo.” (Bafilipi 1:9, NW; 1 Bakorintha 2:10) Motswedi wa konokono wa botlhale jwa Modimo ke Lefoko la gagwe, ebong Bibela.
Ereka matlhajana a batho a tlhokomologa Lefoko la Modimo, ga re a tshwanela go tlodisa kotsi e bo e tlhagisang matlho le ka motlha ope. Go akanya ga segompieno ga botlhajana go ile ga dira gore barutisi ba le bantsi ba La-Bodumedi ba amogele thuto ya go itlhagelela ga dilo. Ebile ba tlogela tumelo ya bone mo goreng Bibela e tlhotlheleditswe ba ya le botshwaya-diphoso jwa maemo a a kwa godimo ka boiteko jwa gore ba tlotlwe ke boramatlhale. Matlhajana a sepolotiki le a loago ao a otlelelang kgololesego ya motho ka namana a ile a gogela kwa seweng sa go ntsha dimpa, go anama ga boitshwaro jo bo sa siamang jwa kafa dikobong, kgobololo ya diokobatsi, le ditlwaelo tse dingwe tse di senyang. Go akanya ga go rata dilo tse di bonalang gompieno go gogela batho ba le bantsi kwa goreng ba lekanye boitumelo le katlego ka dilo tsa bone tse di bonalang.
Matlhajana ano otlhe a emela maiteko a go rarabolola mathata kana go batlana le boitumelo ka peo-mabaka ya batho mme kwantle ga go thusiwa ke Modimo. Otlhe a tlhokomologa boammaaruri jwa konokono joo Jeremia a neng a bo lemoga: “Yehofa, kea itse ha tsela ea motho e se mo go èna ka esi: ga goeō mo mothuñ eo o tsamaeañ ka dinaō go siamisa dikgatō tsa gagwè.” (Yeremia 10:23) Boitumelo le poloko ya rona di ikaegile ka go utlwa ga rona Jehofa le go ikaega ka ene. Ka gone ke tsela ya botlhale go gana teko ya go leseletsa go nyorelwa kitso ga rona, re bulela mogopolo wa rona megopolo ya batho eo e ka bodisang go akanya ga rona mme kgabagare ga re tlogela re timetso mo gare ga bao ba senang tsholofelo.
Go Nyorelwa Kitso Kaga Bokhutlo joo bo Atamelang
Fa esale jaaka Jehofa a ne a senola kwa Edena gore o ne a na le boikaelelo jwa go tlosa diphelelo tse di boikepo tsa botsuolodi jwa ga Satane, batlhanka ba Gagwe ba ba ikanyegang ka gale ba ile ba rata go itse thata kaga ka moo boikaelelo jwa Modimo bo tla diragalang ka gone. Aitsane, le eleng baengele ba ile ba bontsha go nyorelwa kitso malebana le seno! (1 Petere 1:12) Ka motlha wa ga Jesu, ba le bantsi ba ne ba kgatlhegela eletota go itse nako e e nepagetseng eo Bogosi bo tla tlang ka yone. Lefa go ntse jalo, Jesu o ne a ba bolelela kgapetsa gore e ne e se thato ya ga Jehofa gore ba itse. (Mathaio 25:13; Mareko 13:32; Ditihō 1:6, 7) Boiteko bope jwa go tlhoma letlha le le rileng e ne e tla nna boeleele. Mo boemong jwa seo, o ne a ba kgothaletsa ka botlhale gore ba tlhokomele maikarabelo a bone a Bokeresete, ba nne le boikutlo jwa go potlaka letsatsi lengwe le lengwe.—Luke 21:34-36.
Gompieno, ditiragalo tsa lefatshe di neela bosupi jo bogolo jwa gore bokhutlo bo atametse, mme go nyorelwa kitso go a gola kaga letlha leo bo tla tlang ka lone. Ditiragalo dingwe di ka ne di ile tsa tlhatswa ba bangwe pelo gore ba lemogile letsatsi leo le oura. Ba nnile le tlalelo e kgolo, gongwe le eleng go ya bokgakaleng jwa go wa mo go direleng Modimo, fa ditebelelo tsa bone di ne di sa diragale. Go botoka thata gore go tlogelwe kgang eno mo diatleng tsa ga Jehofa, ka tsholofetso ya gore o tla tlisa bokhutlo ka nako e e tshwanetseng. Go tlametswe ka sengwe le sengwe seo re se tlhokang e le gore re iketleeletse.
Ka Moo Teka-tekano e Tlhokafalang ka Gone
Jalo, jaaka dilo tse dingwe tse dintsi mo botshelong, go nyorelwa kitso ga rona e ka nna tshegofatso kana phutso. Fa go kaelwa ka tshwanelo, go ka senola majana a a tlhokegang thata a kitso eo e tlisang boipelo le tapologo. Go nyorelwa kitso go go molemo kaga Mmopi wa rona, thato ya gagwe, le maikaelelo a gagwe go ka kgotsofatsa le go nna mosola thata. Go nyorelwa kitso goo go leseleditsweng, go go sa siamang go ka re digela mo go phopholetseng mo go seng kana ka sepe le dikgopolo tsa batho moo tumelo ya mmatota le poifomodimo di se kakeng tsa nna gone. Ka gone, fa go nyorelwa kitso ga gago go dira matshosetsi a go go gogela mo sengweng seo se belaetsang, “itisè, e se re kgotsa loa . . . katogana le tlhōmamō ea lona.”—2 Petere 3:17.