Mosha O Baka Jehofa

BASHA ba bulegelwa ke dipaka tse dintsi tsa go neela bosupi fa ba na le kaletso e e nonofileng ya go direla Jehofa. Seno se ne sa bonala mo boitemogelong jwa mosimanyana wa dingwaga tse tlhano mo bophirima jwa Kenya.​—Moreri 12:1.

Mmaagwe o ne a mmotsa ka go re: “O batla go dirang fa o gola?” Mosimanyana o ne a ntse a etse tlhoko mmulatsela mongwe yo o kgethegileng mo phuthegong ya bone mme a araba ka go re: “Ke batla go nna mmulatsela yo o kgethegileng jaaka Mokaulengwe F​——.” Mmaagwe o ne a araba ka go re: “Mme ga go kake ga kgonega; ga o kake wa nna lefa e le mmulatsela wa ka metlha ka gonne ga o na thuto ya Bibela.” Mosimanyana a botsa ka go re: “Ke ka dira eng he?” Mmaagwe o ne a akantsha gore a leke go ruta ditsala tse a tshamekang natso mo sekaelo sa gagwe sa Buka ya Me ya Dipolelo tsa Bibela.

Mosimanyana yoo wa dingwaga tse tlhano o ne a tsaya buka ya gagwe ya Dipolelo tsa Bibela mme a simolola go etela ditsala tsa gagwe, a di laleletsa go ithuta Bibela le ene. Phelelo e ne ya nna efe?

O ne a kgobokanya setlhopha sa ba le lesome gore a ithute le sone. O ne a dirisa ditshwantsho ka botswerere, a botsa dipotso tse di batlisisang mogopolo, a bo a botsa dipotso tse di boeletsang kwa bokhutlong jwa thuto. Fa ba ne ba sa gakologelwe, o ne a boela a bala kgang yotlhe le bone gape. Mmè o ne a tlhalosa gore go ne go itumedisa tota go bona bana bano botlhe ba ntse fa fatshe fa pele ga ntlo ya gagwe ba ithuta mmogo! Morwa wa gagwe wa dingwaga tse tlhano o ne a botsa dipotso, mme botlhe ba ne ba tsholetsa diatla tsa bone ba batla go araba.

Go ne ga itumedisa mmè gape, gamrnogo le phuthego, go bona ba roba-bobedi ba bana bano ba tla dipokanong tsa phuthego. Ba bangwe ba babedi ba ne ba santse ba le bannye thata. Seno sotlhe se ne sa diragala ka go bo mosimanyana wa dingwaga tse tlhano a ne a batla go baka Jehofa le go thusa ba bangwe.