A Bodumedi Ke Tlhotlheletso ya Boitsholo Jo Bontle?

GO ARABA potso eno, dimilione tsa batho ba ne ba tla dumalana le George Bernard Shaw, yo o neng a kwala jaana: “Bodumedi ke tlhotlheletso e kgolo​—tlhotlheletso e e leng ya boammaaruri ya boikaelelo mo lefatsheng.” Se se fapaaneng, mokwadi wa Seesemane wa lekgolo la bo-19 la dingwaga ebong John Ruskin, fa a kwala mo motheong wa boikanyegi, o ne a sotla ka go re: “Bodumedi jwa motho yo o bosula yo eseng wa sepe ka dinako tsotlhe ke sone se se mmodisang.” Ke pono efe e o akanyang gore e gaufi le boammaaruri?

Jaaka bosupi jwa tlhotlheletso ya boitsholo jo bo siameng ya bodumedi, bangwe ba ka nna ba supa motho a le mongwe yo o neng a nna “motho yo o fetogileng” fa a ne a ‘neela botshelo jwa gagwe mo go Jesu Keresete.’ Ke gone ka moo makasine mongwe wa lefatshe lotlhe o neng wa tlhalosa “go sokologa” ga ga Charles Colson, yo a neng a kile a kopanyelediwa mo boferefereng jwa bo-ramaemo. Mongwe fela a ka nna a supela go bao ba iphakang gore bodumedi jwa bone bo ba bolokile go tswa mo botshelong jwa go ithekisa-mmele kana botagwa. Mo mafatsheng a e seng a bokeresete, dimilione tsa Dibibela di ile tsa abiwa, tseo kwantle ga pelaelo di ileng tsa thusa batho ba le bantsi go tokafatsa boitsholo jwa matshelo a bone. Go bonala gore, bodumedi bo ile jwa tsenya tlhotlllieletso ya boitsholo jo bontle mo bathong ba go nna jalo.

Letlhakore le le sa Siamang

Mo letlhakoreng le lengwe, bodumedi jwa ga Hitler e ne e se sepe se se neng se ka mo faposa. Se se ne sa dira gore batho ba ba dipelo di ikanyegang ba ipotse gore ke ka ntlhayang fa ikuelo e e neng e dirilwe go Mopapa Pius XII go kgaola Hitler e ne ya seka ya arabiwa. Catholic Telegraph-Register ya Cincinnati, Ohio, kafa tlase ga setlhogo se se reng “O Godisitswe Jaaka Mokatoliki Mme o Tsuolola Bodumedi Ga Rialo Mogala Go Mopapa,” se bega ka go re, “Go dirilwe ikuelo kwa go Pius XII gore Reichsfuehrer Adolph Hitler a kgaolwe.” Fa kgato eno e ka bo e ile ya tsewa, a e ka bo e ile ya ama matswela a ntwa mme ya thusa go boloka setho mo go bogisegeng? Se se swabisang, mopapa ga a ka a arabela.

Bonyatsi bo tlwaelesegile thata mo dinageng tsa Bokatoliki mo Amerika Borwa. Mme mo Amerika Bokone moruti mongwe wa maemo a a kwa godimo wa Katoliki o ne a kwalela pampiri ya dikgang ka go re: “Amogelang go Ithekisa-mmele Kafa Molaong​—ke Tharabololo e e Boitshepo.” (Philadelphia Daily News) Elatlhoko gape maemo mo dinageng dingwe tsa Porosetanta koo go fapaanela basadi, go tlhakanela dikobo pele ga lenyalo, le go tlhakanela dikobo ka kwantle ga lenyalo di tlwaelesegileng. Re fitlhela lebaka la seno le akantshitswe mo setlhogwaneng sa koranta nngwe: “Baruti ba Didimetse kaga go Tlhakanela Dikobo Pele ga Lenyalo.” Setlhogo se ne sa re: “Baruti ba Amerika ba didimetse mo go bosula mo go rereng kaga go tlhakanela dikobo pele ga lenyalo . . . ba tshoga gore ba tla latlhegelwa ke maloko mangwe a kereke.” (Telegraph, North Platte, Nebraska) Ka gone a bodumedi jotlhe ke tlhotlheletso ya boitsholo jo bontle?

Mo go La-Bodumedi, go tlhoka tlhotlheletso ya boitsholo ya bodumedi go supega sentle mo motlheng wa ntwa. A ke o akanyetse maiphako a a utlwalang bontle ano. Ka 1934 Walter W. Van Kirk, mokwaledi wa lephata lengwe la Lekgotla la Dikereke tsa ga Keresete mo Amerika ka nako eo, o ne a kwala jaana: “Bareri le batho fela ba ikanne go ema kgatlhanong le ntwa . . . Go tlhabanela tumelo gono ga kagiso ga dikereke go tlhagoga mo go tlhatswegeng pelo ga gore ntwa e kgatlhanong thata le go rera le tiro ya ga Jesu.” (Religion Renounces War) Morago ga go tlhagisa dikereke di le mmalwa le baruti, buka e ne ya konela jaana: “Dikereke, ka bontsi, di ile tsa tlhalosa ka phepafalo gore ga di sa tlhole di tshwanetse go lebiwa jaaka baema-nokeng mo tirong ya go bolaya le go ganyaola batho. Bareri ba . . . tlhapa diatla tsa bone kaga madi a ba-ga-bone, ba kgaogana le Kaesare.”

Lefa go ntse jalo, dipolelelo-pele tseo tse di nang le tsholofelo ka maswabi ga di aka tsa nna boammaaruri. Fa Ntwa ya Lefatshe II e tlhagoga, go ne go sena bodumedi bope jo bogolo jwa La-Bodumedi jo bo neng jwa ema ka nitamo go ‘gana ntwa.’ A kereke ya lefelo la lona e ne ya dira jalo?

Melelwane e e Senyegileng ya Boitsholo

Fa o sena go seka-seka bosupi mo matlhakoreng oo-mabedi, a o ka seke o dumalane gore mo mabakeng a le mantsi-ntsi, bodumedi jo bo itsegeng jwa lefatshe ga bo ise bo nne maatla a a nonofileng a boitsholo jo bontle? Makasine wa Look o ne wa bolela jaana: “Dikereke . . . di paletswe ke go neela ketelelo-pele ya boitsholo, mme ereka maikarabelo a tsone a le magolo thata, go palelwa ga tsone ke mo go maswe thata.” The Courier-Mail ya Brisbane, Australia, e ne ya akgela mo go palelweng ga bodumedi jwa La-Bodumedi go baakanyetsa ka thibelo mo boitsholong jo bo maswe jwa kafa dikobong: “Fa go tla mo go Bobishopo le Baruti ba maemo a a kwa godimo-dimo . . . ba kwala ka gore go tlhakanela dikobo ka kwantle ga lenyalo e ka nna ya nna tiro e e boitshepo e e ‘bolelang kgalalelo ya Modimo,’ . . . gore kgokafalo ka boyone ga e bosula le gone gore boaka ga bo bosula; mme he monna le mosadi ba ba senang maitemogelo, mme segolo-bogolo mosimane le mosetsana ba ba mo dingwageng tsa bolesome, ba tlhakanngwa ditlhogo ke go sa itseng gore molemo le bosula ke eng. Matswela a kanamiso eno ya megopolo ya Boitsholo jo Bosha e ile ya nna go senyega ga melelwane ya boitsholo.”

Nnyaa, mo go bonalang sentle, bodumedi jwa lefatshe ga se yone tlhotlheletso ya mmannete ya boitsholo jo bontle. Se se fapaaneng, bo tshwanetse go amogela boikarabelo jwa seemo se se hutsafatsang sa boitsholo gompieno. Lefa go ntse jalo, ereka bodumedi bo tshwanelwa ke go raya “tirelo le kobamelo go Modimo kana maatla a a fetang a motho,” a ga bo a tshwanela go nna tlhotlheletso ya molemo mo mafatsheng otlhe kwa bo leng gone? Ke eng se se tlhaelang? Bodumedi jwa gago bo ka nna le tlhotlheletso e e ntseng jalo jang gompieno?