Botshelo le Bodihedi tsa ga Jesu

JESU o ruta mo ntlong ya thuto kwa Kaperenama kaga boemo jwa gagwe jaaka senkgwe sa boammaaruri se se tswang Iegodimong. Kafa go bonalang ka teng puo ya gagwe ke tswelediso ya puisano ya gagwe e a neng a e simolola le batho fa ba ne ba mo fitlhela ba tswa ntlheng ya botlhaba ya Lewatle la Galilea, koo ba neng ba jele dinkgwe le ditlhapi tse ba neng ba di filwe ka kgakgamatso teng.

Jesu o tsweledisa dikakgelo tsa gagwe ’ ka go re: “Senkgwè se ke tla se ntshañ ke nama ea me, gore e nnè botshelō yoa lehatshe.” Dingwaga di le pedi fela pele ga foo, mo dikgakologong tsa 30 C.E., Jesu o ne a boleletse Nikodemo gore Modimo o ratile lefatshe mo go kalo-kalo mo o ntshitseng Morwa wa gagwe go nna Mmoloki. Ka gone, jaanong Jesu o bontsha gore motho ope fela wa lefatshe la setho yo o jang ka tshwantshetso nama ya gagwe, ka go nna le tumelo mo setlhabelong se a neng a tloga a se ntsha, o ne a ka amogela botshelo jo bo sa khutleng.

Lefa go ntse jalo, batho ba kgopisiwa ke mafoko a ga Jesu. “Ana motho eo, o ka re naea nama ea gagwè yañ go e ya?” Ba a botsa. Jesu o batla gore bareetsi ba gagwe ba tlhaloganye gore go ja nama ya gagwe go ne go tla dirwa ka tsela ya tshwantshetso Jan, go gatelela seno, o bua sengwe se se santseng se sa dumelesege fa se dirwa ka mmatota.

“Ha lo sa ye nama ea Morwa Motho, ha lo sa nwe madi a gagwè,” Jesu o a bolela, “ga go na botshelō mo go lona. Eo o yañ nama ea me, a ba a nwa madi a me, o na le botshelō yo bo sa khutleñ; me ke tla mo cosa mo letsatsiñ ya bohèlō. Gonne nama ea me ke seyō rure, le madi a me ke senōō rure. Eo o yañ nama ea me, a ba a nwa madi a me, o nntse mo go nna, le nna mo go èna.”

Ke boammaaruri, fa e le gore mono Jesu o ne a akantsha go jewa ga nama ya batho, thuto ya gagwe e ne e tla utlwala e kgopisa eleruri. Mme, legale, Jesu ga a bue ka go ja nama kana go nwa madi ga mmatota. O gatelela fela gore botlhe ba ba amogelang botshelo jo bo sa khutleng ba tshwanetse go nna le tumelo mo setlhabelong se a neng a tloga a se dira fa a neela mmele wa gagwe o o itekanetseng wa botho a bo a tsholola madi a botshelo jwa ’ gagwe. Lefa go le jalo, le eleng bontsi jwa barutwa ba gagwe ga ba dire boiteko bope jwa go tlhaloganya thuto ya gagwe mme ba ganana ka go re: “Lehoko ye, ke lehoko ye le thata; e mañ eo o ka le utlwañ?”

Ka go bo a itse gore bontsi jwa barutwa ba gagwe ba a ngongorega, Jesu a re: “A go mo goa lo kgopisa? Ana lo no lo tla reñ ha lo bōna Morwa Motho a tlhatlogèla kwa o na a le gōna pele? . . . mahoko a ke a buileñ le lona, ke aōna a a leñ mōea, e bile a botshelō. Me go na le bañwe ba lona ba ba sa dumeleñ.”

Jesu o a tswelela: “Ke gōna ke lo reileñ, ka re, Ga go motho opè eo o ka tlañ mo go nna, ha a se ka a go nèwa ke Rara.” Ka go rialo, bontsi jwa barutwa ba gagwe ba a tsamaya ba bo ba mo tlogela. Jalo Jesu o retologela kwa baaposetoloing ba gagwe ba ba 12 a ba a botsa ka gore: “A le lona lo rata go tsamaea?”

Petere o arabela ka go re: “Morèna, ana re ka ea kwa go mañ? wèna u na le mahoko a botshelō yo bo sa khutleñ. Me re dumetse, re bile rea itse ha e le wèna Moitshepi oa Modimo.” A tshupo e ntle ya boikanyegi, lemororo Petere le baaposetoloi ba bangwe ba ka tswa ba sa tlhaloganya thuto ya ga Jesu ka botlalo mo ntlheng eno!

Lemororo Jesu a itumedisitswe ke karabelo ya ga Petere, o akgela jaana: “A ga kea lo itshenkèla. lona ba ba shomè le bobedi, me moñwe oa lona ke diabolo?” O bua ka Judase Isekariota. Go bonala jaanong Jesu a lemoga mo go Judase “tshimologō,” kana thaego, ya tsela e e bosula.

Jesu o sa tswa go kgoba batho marapo ka go gana maiteko a bone a go mo dira kgosi, mme ba ka nna ba akanya ka go re, ‘Motho yono o ka nna Mesia jang fa a sa tseye boemo jo bo tshwanetseng jwa Bomesia?’ Seno, le sone e ka nna kgang e e santseng e le mo megopolong ya batho. Yohane 6:51-71; 3:16.

◆ Jesu o abela bomang nama ya gagwe, mme bano ba ‘ja nama ya gagwe’ jang?

◆ Ke mafoko afe a mangwe a ga Jesu a a tshosang batho, lefa go le jalo o gatelela eng?

◆ Fa ba bantsi ba tlogela Jesu, Petere o arabela jang?