Go Fodisa ka go Rapelela​—Go Gogela ka Eng?

Kereke e tletse ka modumo wa katara, torompeta, meropa, meropana, le disimbala tse di opanngwang. Banna, basadi, le bana ba bina le go opela ba tserwe maikutlo ke go tsenwa ke moya. Seemo seno ke se se tshwanetseng gore go fodisa go simologe.

Motho yo o fodisang ka go rapelela, a apere dipurapure tse ditshweu tse ditelele, o simolola ka go baya monna wa segole yo o gagabang ka maoto le mabogo diatla. Go tswa foo, go latela monna mongwe wa sefofu. yo digalase tsa gagwe tsa matlho tse di lotobo di sirileng matlho a gagwe a a sa boneng. “Ke kgakgamatso!” Babogedi ba goa jalo fa segole seo se simolola go tsamaya le sefofu se simolola go bona . . .

DITIRAGALO tse di ntseng jaana di tlwaelesegile mo dikerekeng di le dintsi tsa Afrika tse di fodisang ka go rapelela. Ruri, batho ba ba fodisang ka go rapelela ba na le balatedi ba le bantsi mo Afrika le mo mafatsheng a mangwe ka ntlha ya maiphako a bone a gore ba ka kgona go rarabolola mathata a mefuta yotlhe ka thapelo le tumelo mo Modimong. Ka gone bangwe ba tla kwa bathong ba ba fodisang ka go rapelela ka mathata a tsa madi. Mme ereka mo bathong ba Ma-Afrika boopa gantsi e le selo se se tlhabisang ditlhong, bangwe ba tla kwa bathong ba ba fodisang ka go rapelela ba solofetse go fodisiwa boopa.

Lefa go ntse jalo mathata a botsogo a goga tlhokomelo ya batho ba ba fodisang ka go rapelela go gaisa tsotlhe. Lemororo diokobatsi tsa kalafi di tletse mo marekisetsong a lefatshe ebile go tlisiwa maiteko a a akgolegan mo lephateng a tsa kalafi go fodisa ba ba lwalang, motho o santse a le kgakala thata le go bona tharabololo ya bothata jwa bolwetsi. Bangwe ba ba ileng ba tlhaselwa ke bolwetsi ba ile ba senya madi a le mantsi ba senka dikalafi, mme ba bo ba sa atlege. Ga go gakgamatse, he, go bo ba le bantsi ka ntlha ya go itlhoboga, ba ya kwa bathong ba ba fodisang ka go rapelela!

Bangwe ba ikutlwa gore go fodisa ka go rapelela go ile ga ba thusa mme ga ba bone thulano epe fa gare ga gone le Bokeresete. Ruri, ereka bafodisi gantsi ba iphaka gore ba dira mo leineng la ga Jesu, ga se selo seo se sa tlwaelegang gore balatedi ba bone ba nne maloko a bodumedi jo bo tlwaelegileng le a kereke e e fodisang ka go rapelela. A mme moobamedi wa boammaaruri wa Modimo o tshwanetse go ya kwa mothong yo o fodisan ka go rapelela? (Yohane 4:23) A mme dihodiso dipe tse di dirwang ke motho yo o ntseng jalo di ka tsewa jaaka tse di tswang kwa Modimong?