A Boikanyego ga bo sa Tlhola bo Bereka?

GO TSHELA ka boikanyego ka metlha yotlhe—a ga go sa tlhola go bereka mo lefatsheng la jaanong, go le sengwe seo se sa tlholeng se thusa ka sepe kana se na le mosola ope wa mmatota? Go ka bonala go ntse jalo. A ko o akanyetse dikai di sekae fela tsa kafa boikanyologi bo anameng ka gone, ditsela tseo bo leng ka tsone, selekanyo seo bo godileng ka sone, le kafa bo fetogileng morwalo o o jang madi a mantsi ka gone.

Mo dingwageng tsa bosheng, go tsietsa mo lekgethong kwa Jeremane Bophirima go ile ga fopholediwa go nna dirata di le dimilione di le 20 000 ka ngwaga, mme mo Sweden tshenyegelo ya ngwaga le ngwaga e fitlhile go dirata di le dimilione di le 1 440 motho a le mongwe. Jalo fa e le gore o ka ne o nna mo go lengwe la mafatshe ano, boikanyologi bo ama lekgetho le o le duelang. Go tsietsa mo lekgethong la madi a a amogelwang go ntsifetse thata mo United States mo eleng gore goromente o latlhegelwa ke madi a a fopholediwang go dirata di le dimilione di le 200 000 mo lekgethong la ngwaga le ngwaga. A ko o akanye fela kafa madi ao a ka thusang ka gone mo go dueleleng sekoloto se se boitshegang sa ditshenyegelo tsa naga eo! Se sengwe gape ke gore, dikgwebo tse di seng kafa molaong di utswela goromente wa US madi a mangwe a a kanang ka dirata di le dimilione di le 20 000. Go utswa mo mabenkeleng le bogodu jo bongwe mo United States go lopa mabenkele madi a a kanang ka dirata di le dimilione di le 8 000 ka ngwaga, mme seo se tlhatlosa ditlhotlhwa tsa dilwana. Go balela sekoloto sa go founela kgakala mo mothong yo mongwe ka go dirisa nomoro ya gagwe go lopa Ma-Amerika dirata di le dimilione di le 2 ka ngwaga.

Mo Canada “dirukutlhi tsa nako,” bao ba jang nako ya tiro, ba jela bahiri ba bone dirata di le dimilione di le 22 000 ka ngwaga, “mo e ka nnang ga makgetlo a le mararo go feta tatlhegelo yotlhe e e nnang gone ka ntlhaya bahiri wa ba ba dinalanyana, ba ba maferefere, ba ba tsietsang diinšhorense, ba ba dirang bosenyi, ba ba amogelang madi a bogodu, ba ba jang dilo ka molelo le bokebekwa jo bongwe jo bo tlhaselang kgwebo.” Go ya ka patlisiso ya 1986, bothata jwa bogodu jwa nako mo United States bo lopa dirata di le dimilione di le 340 000 ngwaga le ngwaga.

Difeme tse di humileng thata-thata di utswa ka bogagapa mo mebusong ya tsone. Jang? Ka go e rekise tsa didirisiwa le ditshipi ka ditlhotlhwa tse di kwa godimo-dimo: dipannere tsa disente tse 24 ka R19 212; ditshipi tsa radio tsa R1,34 ka R1 628; dipolasetiki tsa maoto a ditilo tsa desente tse 34 ka R2 236. “Tota se se diragalang ke tatlhegelo ya diketekete tsa dirata” tsa puso, ga bolela jalo mopalamente mongwe wa U.S.

Selo se se gakatsang seno, ke dikao tse di sa siamang tsa batho ba ba tlotlegang tseo di dirang gore boikanyego bo seka jwa nna gone. Jaaka o ka ne o lemogile, baeteledipele mo mafatsheng mangwe ba bua maaka, ba timetsa motlhala, ba bipa boammaaruri, le eleng go tila gore ba molato—ee, le eleng go bolaya baganetsi ba bone ba sepolotiki ba bo ba dira ekete motho mongwe o sele ke ene a leng molato.

Jalo a go ikanyega ga go sa tlhola go bereka? A ga go sa tlhola e le tsela e e di gaisang tsotlhe? A boikanyego bo molemo fela ka go bo Lefoko la Modimo le re raya le re re ikanyege? Setlhogo se se latelang se botlhokwa mo go wena fa e le gore o batla dikarabo tsa dipotso tseno.