Dipotso tse di Tswang go Babadi

◼ A moaposetoloi Paulo o ne a bontsha tlhaolo ya bomorafe fa a ne a dumalana le go nyatsa batho ka kakaretso ga Bakereta?

Nyaa, Paulo ga a ka a ineela mo go tlontlololeng batho ba morafe o mongwe ka kakaretso.

Potso eno a tlhaga mo dikakgelong tsa ga Paulo fa a ne a kwalela morutwa Tito lekwalo. Paulo o ne a He a mo tlogela mo setlhaketlhakeng se segolo sa Mediterranean sa mo Kereta “gore [a] rulaganyè dilō tse di neñ di tlhaèla, le gore [a] tlhōme bagolwane mo motsiñ moñwe le moñwe.” Paulo o ne a bontsha ditshwanelego tseo bagolwane ba phuthego ba tshwanetseng go nna le tsone fela o ne a gakolola Tito jaana: “Go na le batho ba le bantsi ba ba ganañ taolō, e le babui ba ba ithamakañ hèla, le batsietsi, me bogolo bōnè ba bogwèra, Ba melomo ea bōnè e chwanetseñ go thiywa, e le batho ba ba ribigetsañ ba matlo ba le mmōgō.”—Tito 1:5, 10, 11.

Paulo o ne a tswelela jaana mo temaneng ya bo 12: “Moñwe oa bōnè, e le mokaedi moñwe oa o rile Bakereta ke baaki ka galè ka galè, ba sehōlōhōlō se se mashwè, ke diyabele tse di bobodu hèla.” Mo temaneng ya bo 13, o ne a oketsa ka go re: “Chupō euō ke boamarure. Me u ba kgalemèlè thata ka ntlha ea gōna mouō, gore ba tlè ba itekanèlè mo tumeloñ.”

Baranodi ba Bibela ba bantsi ba letla kakgelo eno ya ga Paulo e e reng “chupō enō ke boamarure” e tswelela fela morago ga se a neng a se nopola go tswa mo moperofeting wa Mokereta. Ba bangwe ba simolola serapa se sesha ka temana ya bo 13.a Mo dintlheng tse pedi tseno, ke eng seo Paulo a bontshang a ne a dumalana naso?

Kwantle ga pelaelo o ne a sa dumalane le go nyadiwa gope go go akareletsang ga lotso kana ga bomorafe kgatlhanong le Bakereta. Re ka tlhomamisega ka seno, gonne Paulo o ne a itse gore mo Kereta go ne go na le Bakeresete ba ba molemo bao Modimo a neng a ile a ba amogela le go ba tlotsa ka moya wa Gagwe o o boitshepo. (Ditihō 2:5, 11, 33) Go ne go na le Bakeresete ba ba ineetseng ba ba lekaneng go dira diphuthego mo “motsiñ moñwe le moñwe.” Lefa Bakeresete bano e ne a se batho ba ba itekanetseng, re ka tlhomamisega gore a ne a se baaki le dijabele tse di bobodu; go seng jalo ba ne ba ka se tswelele ba amogelwa ke Jehofa. (Bafilipi 3:18, 19; Tshenolō 21:8) Mme jaaka re bona mo merafeng yotlhe gompieno, kwantle ga pelaelo go ne go na le batho ba dipelo tse di ikanyegang mo Kereta bao ba neng ba siametse go amogela molaetsa wa Bokeresete mme ba utlwisiwa botlhoko ke boitsholo jo bo sa siamang joo ba neng ba tshela mo gare ga jone.—Esekiele 9:4; bapisa le Ditihō 13:48.

Mo letlhakoreng je lengwe gape, go ne go na le batho mo Kereta bao ba neng ba sena boitsholo jo bo siameng. Paulo o ne a go bona go tshwanetse go nopola mafoko a go bonalang a simologile mo lekgolong la borataro la dingwaga B.C.E. ka Epimenides, mmoki (moperofeti kana mmueledi) wa Mokereta. Mme Paulo o ne a dumalana le tlhaloso eo fa a dirisiwa mo karolong e e rileng ya baagi ba kwa Kereta.

Bano a ne a le ‘babui ba ba ithamakang fela le batsietsi’ bao ba neng ba amana ka tsela nngwe le Bakeresete ba ba ikanyegang mme ba leka go ‘ribegetsa matlo ba le mmogo.’ Batsietsi ba ba ntseng jalo ba ba timetsang ammaaruri ba tshwanelwa ke tlhaloso e e reng “baaki, ba sehōlōhōlō se se mashwè,” eleng seo se neng se ntse jalo le ka batho ba ba ntseng jalo ba gongwe go sele. (2 Timotheo 3:6, 13) Go feta moo, lefa ale mang yo o neng a setse a le mo diphuthegong yo o neng a tsiediwa gore a tsenelele mo mekgweng e e ntse jalo o ne a tlhoka go ‘kgalemelwa thata.’ Bao kgalemelo a ba solegelang molemo ba ka nna ba thusega go nna dikao tsa ditiro tse di molemo le “puō ea tlhōmamō, e e sa kakeñ ea nyadiwa.”—Tito 2:6-8.

Re tshwanetse go bona seno ale tlhagiso mo go rona rotlhe. Tlhaolo ya lotso kana ya semorafe a ka nna ya tlalatlala go re dikologa. (Bapisa Yohane 7:47-52.) Kwantle ga pelaelo re utlwa baagelani, bao re tsenang sekolo le bone, kana badiri mmogo le rona ba dira dikakgelo tse di tlhaolang batho ka ditlhopha, jaaka tseno, ‘Ruri batho bao ba botsheka ga ba botsalano mme ebile ga ba na boutlwelobotlhoko botlhe fela’; ‘O itse sentle gore batho bao ba borwa ba boikgodiso jang’; kana, ‘Go kotsi go ikanya batho bao ba ba tswang ka kwa ga molelwane.’

Re tshwanetse go lwela go tila go ineela mo go tlhaoleng batho ka ditlhopha re ba akaretsa goo ka gongwe go senang motheo kana go go feteleditsweng. Bangwe ba ka tswa ba le botsalano go feta ba bangwe, fa ba bangwe bone ba sa bue kana ba le bonya go tlwaela batho ba ba sa ba itseng. Lefa go le jalo, re tshwanetse go gakologelwa kwa ntle ga pelaelo gore bangwe ba bakaulengwe ba rona ba Bakeresete ba teng mo bathong ba lotso loo kana morafe oo, gammogo le ba bangwe ba bantsi bao ba iseng ba nne Bakeresete ba boammaaruri mme fela ba na le dinonofo tse di kgatlhisang mme ba nyoretswe tshiamo.

Moaposetoloi Petere o ne a gatelela ntlha ya gore “Modimo [ga] se motlhaodi oa batho: Me mo merahin eotlhe eo o boihan ona, a ba a diha tshiamo, oa lebosega mo go ona.” (Ditihō 10:34, 35) Re ka tlhomamisa ka mo go feletseng gore Paulo o ne a dumalana le seo, a bontsha pono e e tshwanang mo dikwalong tsa gagwe le mo puong ya gagwe. Le rona re tshwanetse go dira fela jalo.

[Ntlha e e kwa tlase]